4. саннит̣т̣ха̄пакаттхераапада̄наван̣н̣ана̄

аран̃н̃е кут̣икам̣ катва̄тиа̄дикам̣ а̄йасмато саннит̣т̣ха̄пакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле кулагехе ниббатто вин̃н̃утам̣ патто гхарабандханена баддхо гхара̄ва̄се а̄дӣнавам̣ дисва̄ ваттхука̄макилесака̄ме паха̄йа химавантасса авидӯре паббатантаре аран̃н̃ава̄сам̣ каппеси. тасмим̣ ка̄ле падумуттаро бхагава̄ вивекака̄мата̄йа там̣ т̣ха̄нам̣ па̄пун̣и. атха со та̄пасо бхагавантам̣ дисва̄ пасаннама̄насо вандитва̄ нисӣданаттха̄йа тин̣асантхарам̣ пан̃н̃а̄петва̄ ада̄си. таттха нисиннам̣ бхагавантам̣ анекехи мадхурехи тин̣д̣ука̄дӣхи пхала̄пхалехи сантаппеси. со тена пун̃н̃акаммена тато чуто девесу ча мануссесу ча апара̄парам̣ сам̣саранто две сампаттийо анубхавитва̄ имасмим̣ буддхуппа̄де екасмим̣ кулагехе ниббатто саддха̄сампанно паббаджито випассанам̣ вад̣д̣хетва̄ начирассева араха̄ ахоси. кхурагге арахаттапхалаппаттийам̣ вийа нирусса̄хенева сантипадасан̇кха̄те нибба̄не сут̣т̣ху т̣хитатта̄ саннит̣т̣ха̄пакаттхероти па̄кат̣о.

70. араха̄ пана хутва̄ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто аран̃н̃е кут̣икам̣ катва̄тиа̄дима̄ха. таттха аран̃н̃ети сӣхабйаггха̄дӣнам̣ бхайена манусса̄ еттха на раджджанти на раманти на аллӣйантӣти аран̃н̃ам̣, тасмим̣ аран̃н̃е. кут̣иканти тин̣аччхаданакут̣икам̣ катва̄ паббатантаре васа̄ми ва̄сам̣ каппесинти аттхо. ла̄бхена ча ала̄бхена ча йасена ча айасена ча сантут̣т̣хо виха̄синти самбандхо.

72. джаладжуттамана̄маканти джале джа̄там̣ джаладжам̣, падумам̣, джаладжам̣ уттамам̣ джаладжуттамам̣, джаладжуттамена сама̄нам̣ на̄мам̣ йасса со джаладжуттамана̄мако, там̣ джаладжуттамана̄макам̣ буддханти аттхо. сесам̣ па̄л̣инайа̄нуйогена сувин̃н̃еййамева̄ти.

саннит̣т̣ха̄пакаттхераапада̄наван̣н̣ана̄ саматта̄.