5. могхара̄джаттхераапада̄наван̣н̣ана̄

аттхадассӣ ту бхагава̄тиа̄дикам̣ а̄йасмато могхара̄джаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле кулагехе ниббаттитва̄ вин̃н̃утам̣ патто екадивасам̣ саттху сантике дхаммам̣ сун̣анто саттха̄рам̣ екам̣ бхиккхум̣ лӯкхачӣварадхара̄нам̣ аггат̣т̣ха̄не т̣хапентам̣ дисва̄ там̣ т̣ха̄нантарам̣ а̄кан̇кханто пан̣идха̄нам̣ катва̄ таттха таттха бхаве пун̃н̃а̄ни каронто аттхадассисса бхагавато ка̄ле пуна бра̄хман̣акуле ниббаттитва̄ бра̄хман̣а̄нам̣ виджджа̄сиппесу ниппхаттим̣ гато екадивасам̣ аттхадассим̣ бхагавантам̣ бхиккхусан̇гхапаривутам̣ ратхийам̣ гаччхантам̣ дисва̄ пасаннама̄насо пан̃чапатит̣т̣хитена вандитва̄ сираси ан̃джалим̣ катва̄ ‘‘йа̄вата̄ рӯпино саттха̄’’тиа̄дӣхи чхахи га̄тха̄хи абхиттхавитва̄ бха̄джанам̣ пӯретва̄ мадхум̣ упанеси. саттха̄ там̣ пат̣иггахетва̄ анумоданам̣ ака̄си. со тена пун̃н̃акаммена девамануссесу сам̣саранто кассапабхагавато ка̄ле кат̣т̣хава̄ханасса на̄ма ран̃н̃о амаччо хутва̄ ниббатто тена саттху а̄найанаттха̄йа песито саттху сантикам̣ гантва̄ дхаммам̣ сутва̄ пат̣иладдхасаддхо паббаджитва̄ вӣсативассасахасса̄ни саман̣адхаммам̣ катва̄ тато чуто екам̣ буддхантарам̣ сугатӣсуйева париваттенто имасмим̣ буддхуппа̄де бра̄хман̣акуле ниббаттитва̄ могхара̄джа̄ти ладдхана̄мо ба̄варӣйабра̄хман̣асса сантике уггахитасиппо сам̣вегаджа̄то та̄пасапаббаджджам̣ паббаджитва̄ та̄пасасахассапарива̄ро аджита̄дӣхи саддхим̣ саттху сантикам̣ песито тесам̣ паннарасамо хутва̄ пан̃хам̣ пуччхитва̄ виссаджджанапарийоса̄не арахаттам̣ па̄пун̣и. арахаттам̣ пана патва̄ саттхалӯкхам̣ сутталӯкхам̣ раджаналӯкханти висесена тивидхенапи лӯкхена саманна̄гатам̣ пам̣сукӯлам̣ дха̄реси. тена нам̣ саттха̄ лӯкхачӣварадхара̄нам̣ аггат̣т̣ха̄не т̣хапеси.

64. евам̣ со пан̣идха̄на̄нурӯпена арахаттапхалам̣ патва̄ аттано пуббасамбха̄рам̣ дисва̄ пуббакамма̄пада̄нам̣ пака̄сенто аттхадассӣ ту бхагава̄тиа̄дима̄ха. там̣ саббам̣ утта̄наттхамева.

73. пут̣акам̣ пӯрайитва̄на̄ти пут̣акам̣ вуччати ва̄ракам̣, гхат̣ам̣ ва̄. анел̣акам̣ ниддосам̣ маккхикан̣д̣авирахитам̣ кхуддамадхуна̄ гхат̣ам̣ пӯретва̄ там̣ убхохи хаттхехи паггайха пака̄рена а̄дарена гахетва̄ махесино бхагавато упанесинти самбандхо. сесам̣ сувин̃н̃еййамева̄ти.

могхара̄джаттхераапада̄наван̣н̣ана̄ саматта̄.