2. упава̄наттхераапада̄наван̣н̣ана̄

падумуттаро на̄ма джинотиа̄дикам̣ а̄йасмато упава̄наттхерасса апада̄нам̣. айампа̄йасма̄ пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле далиддакуле ниббаттитва̄ вин̃н̃утам̣ патто бхагавати париниббуте тасса дха̄тум̣ гахетва̄ мануссадевана̄гагарул̣акумбхан̣д̣айаккхагандхаббехи саттаратанамайе саттайоджанике тхӯпе кате таттха судхотам̣ аттано уттараса̄т̣акам̣ вел̣агге лаггетва̄ а̄бандхитва̄ дхаджам̣ катва̄ пӯджам̣ ака̄си. там̣ гахетва̄ абхисамматако на̄ма йаккхасена̄пати девехи четийапӯджа̄раккхан̣аттхам̣ т̣хапито адиссама̄нака̄йо там̣ а̄ка̄се дха̄ренто четийам̣ тиккхаттум̣ падаккхин̣ам̣ ака̄си. со там̣ дисва̄ бхиййосоматта̄йа пасаннама̄насо хутва̄ тена пун̃н̃акаммена девамануссесу сам̣саранто имасмим̣ буддхуппа̄де са̄ваттхийам̣ бра̄хман̣акуле ниббаттитва̄ упава̄ноти ладдхана̄мо вайаппатто джетаванапат̣иггахан̣е буддха̄нубха̄вам̣ дисва̄ пат̣иладдхасаддхо паббаджитва̄ випассана̄йа каммам̣ каронто арахаттам̣ патва̄ чхал̣абхин̃н̃о ахоси. йада̄ бхагавато апха̄су ахоси, тада̄ тхеро ун̣ходакам̣ татха̄рӯпам̣ па̄накан̃ча бхесаджджам̣ бхагавато упана̄меси. тенасса саттхуно рого вӯпасами. тасса бхагава̄ анумоданам̣ ака̄си.

52. евам̣ со паттаарахаттапхало адхигатаетадаггат̣т̣ха̄но аттано пуббакаммам̣ саритва̄ соманассавасена пуббачарита̄пада̄нам̣ пака̄сенто падумуттаро на̄ма джинотиа̄дима̄ха. таттха саббесам̣ локийалокуттарадхамма̄нам̣ па̄рагӯ парийоса̄нам̣ нибба̄нам̣ гато патто падумуттаро на̄ма джино джитапан̃чама̄ро бхагава̄ аггиккхандхо ива чхаббан̣н̣а̄ буддхарам̣сийо джалитва̄ саббалокам̣ дхаммападжджотена обха̄сетва̄ самбуддхо сут̣т̣ху буддхо авиджджа̄ниддӯпагата̄йа паджа̄йа сава̄сана̄йа килесанидда̄йа пат̣ибуддхо викаситанеттапан̇каджо париниббуто кхандхапаринибба̄нена ниббуто адассанам̣ гатоти самбандхо.

57. джан̇гха̄ти четийакаран̣ака̄ле упачинитабба̄нам̣ ит̣т̣хака̄нам̣ т̣хапанаттха̄йа, нибандхийама̄насопа̄напанти.

88. судхотам̣ раджакена̄ханти ваттхадховакена пурисена сут̣т̣ху дховитам̣ сувисуддхакатам̣, уттареййапат̣ам̣ мама уттараса̄т̣акам̣ ахам̣ вел̣агге лаггитва̄ дхаджам̣ катва̄ уккхипим̣, амбаре а̄ка̄се усса̄песинти аттхо. сесам̣ сувин̃н̃еййамева̄ти.

упава̄наттхераапада̄наван̣н̣ана̄ саматта̄.