9. сопа̄каттхераапада̄наван̣н̣ана̄

паббха̄рам̣ содхайантасса̄тиа̄дикам̣ а̄йасмато сопа̄каттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле ан̃н̃атарасса кут̣умбикасса путто хутва̄ ниббатти. екадивасам̣ саттха̄рам̣ дисва̄ бӣджапӯрапхала̄ни саттху упанеси, парибхун̃джи бхагава̄ тасса̄нукампам̣ упа̄да̄йа. со бхиккху саттхари сан̇гхе ча абхиппасанно сала̄кабхаттам̣ пат̣т̣хапетва̄ сан̇гхуддесавасена тин̣н̣ам̣ бхиккхӯнам̣ йа̄вата̄йукам̣ кхӣрабхаттам̣ ада̄си. со техи пун̃н̃ехи апара̄парам̣ девамануссесу сампаттийо анубхаванто екада̄ мануссайонийам̣ ниббатто екасса паччекабуддхасса кхӣрабхаттам̣ ада̄си.

евам̣ таттха таттха пун̃н̃а̄ни катва̄ сугатӣсуйева париббхаманто имасмим̣ буддхуппа̄де пуримакамманиссандена са̄ваттхийам̣ ан̃н̃атара̄йа дуггатиттхийа̄ куччхимхи пат̣исандхим̣ ган̣хи. са̄ там̣ дасама̄се куччхина̄ парихаритва̄ парипакке габбхе виджа̄йанака̄ле виджа̄йитум̣ асакконтӣ муччхам̣ а̄паджджитва̄ бахувелам̣ мата̄ вийа нипаджджи. н̃а̄така̄ ‘‘мата̄’’ти сан̃н̃а̄йа суса̄нам̣ нетва̄ читакам̣ а̄ропетва̄ девата̄нубха̄вена ва̄тавут̣т̣хийа̄ ут̣т̣хита̄йа аггим̣ адатва̄ паккамим̣су. да̄рако паччхимабхавикатта̄ девата̄нубха̄венева арого хутва̄ ма̄тукуччхито никкхами. ма̄та̄ пана ка̄ламака̄си. девата̄ мануссарӯпенупагамма там̣ гахетва̄ суса̄нагопакасса гехе т̣хапетва̄ катипа̄хам̣ ка̄лам̣ патирӯпена а̄ха̄рена посеси. тато парам̣ суса̄нагопако аттано путтам̣ катва̄ вад̣д̣хеси. со татха̄ вад̣д̣хенто тасса путтена суппийена на̄ма да̄ракена саддхим̣ кӣл̣анто вичари. тасса суса̄не джа̄тасам̣вад̣д̣хабха̄вато сопа̄коти саман̃н̃а̄ ахоси.

атхекадивасам̣ саттавассикам̣ там̣ бхагава̄ паччӯсавела̄йам̣ н̃а̄н̣аджа̄лам̣ паттхаритва̄ венеййабандхаве олокенто н̃а̄н̣аджа̄ласса антогатам̣ дисва̄ суса̄нат̣т̣ха̄нам̣ агама̄си. да̄рако пуббахетуна̄ чодийама̄но пасаннама̄насо саттха̄рам̣ упасан̇камитва̄ вандитва̄ ат̣т̣ха̄си. саттха̄ тасса дхаммам̣ катхеси. со дхаммам̣ сутва̄ паббаджджам̣ йа̄читва̄ питара̄ ‘‘анун̃н̃а̄тосӣ’’ти вутто питарам̣ саттху сантикам̣ а̄неси. тасса пита̄ саттха̄рам̣ вандитва̄ ‘‘имам̣ да̄ракам̣ пабба̄джетха, бханте’’ти ануджа̄ни, там̣ пабба̄джетва̄ бхагава̄ метта̄бха̄вана̄йа нийоджеси. со метта̄каммат̣т̣ха̄нам̣ гахетва̄ суса̄не вихаранто начирассева метта̄джха̄нам̣ па̄дакам̣ катва̄ випассанам̣ вад̣д̣хетва̄ арахаттам̣ саччха̄ка̄си. араха̄ хутва̄пи ан̃н̃есам̣ соса̄никабхиккхӯнам̣ метта̄бха̄вана̄видхим̣ дассенто ‘‘йатха̄пи екапуттасми’’нти (тхерага̄. 33) га̄тхам̣ абха̄си. идам̣ вуттам̣ хоти – йатха̄ екапуттаке пийе мана̄пе ма̄та̄ пита̄ ча кусалӣ екантахитесӣ бхавеййа, евам̣ пураттхима̄дибхеда̄су сабба̄су диса̄су ка̄мабхава̄дибхедесу ва̄ саббесу бхавесу дахара̄дибхеда̄су сабба̄су аваттха̄супи т̣хитесу саббесу саттесу екантахитесита̄йа кусалӣ бхавеййа ‘‘митто, уда̄сино, паччаттхико’’ти сӣмам̣ акатва̄ сӣма̄йа самбхедавасена саббаттха екарасам̣ меттам̣ бха̄веййа̄ти имам̣ пана га̄тхам̣ ватва̄ ‘‘саче тумхе а̄йасманто евам̣ меттам̣ бха̄веййа̄тха, йе те бхагавата̄ ‘сукхам̣ супатӣ’тиа̄дина̄ (а. ни. 11.15; пари. 331; ми. па. 4.4.6) ека̄даса метта̄нисам̣са̄ ча вутта̄, екам̣сена тесам̣ бха̄гино бхаватха̄’’ти ова̄дам̣ ада̄си.

112. евам̣ со паттапхала̄дхигамо аттано катапун̃н̃ам̣ паччавеккхитва̄ сан̃джа̄тасоманассо пуббачарита̄пада̄нам̣ дассенто паббха̄рам̣ содхайантасса̄тиа̄дима̄ха. таттха паббха̄ранти сила̄паббатасса вивекат̣т̣ха̄нам̣, там̣ паббаджита̄нурӯпатта̄ ит̣т̣хакапа̄ка̄рам̣ катва̄ два̄ракава̄т̣ам̣ йоджетва̄ бхиккхӯнам̣ васанаттха̄йа ада̄си, пака̄рена бхаро паттхетабботи паббха̄ро, там̣ содхайантасса мама сантикам̣ сиддхаттхо на̄ма бхагава̄ а̄гаччхи па̄пун̣и.

113. буддхам̣ упагатам̣ дисва̄ти евам̣ мама сантикам̣ а̄гатам̣ дисва̄ та̄дино ит̣т̣ха̄нит̣т̣хесу акампийасабха̄ватта̄ та̄дигун̣айуттасса локаджет̣т̣хасса буддхасса сантхарам̣ тин̣апан̣н̣а̄дисантхарам̣ кат̣т̣хаттхарам̣ пан̃н̃а̄петва̄ нит̣т̣ха̄петва̄ пуппха̄санам̣ пуппхамайам̣ а̄санам̣ ахам̣ ада̄сим̣.

114. пуппха̄сане нисӣдитва̄ти тасмим̣ пан̃н̃атте пуппха̄сане нисӣдитва̄ локана̄йако сиддхаттхо бхагава̄. маман̃ча гатиман̃н̃а̄йа̄ти майхам̣ гатим̣ а̄йатим̣ уппаттит̣т̣ха̄нам̣ ан̃н̃а̄йа джа̄нитва̄ аниччатам̣ аниччабха̄вам̣ уда̄хари катхеси.

115. аничча̄ вата сан̇кха̄ра̄ти вата екантена сан̇кха̄ра̄ паччайехи самечча сама̄гантва̄ карӣйама̄на̄ саббе саппаччайадхамма̄ хутва̄ абха̄ват̣т̣хена аничча̄. уппа̄давайадхамминоти уппаджджитва̄ винассанасабха̄ва̄ уппаджджитва̄ па̄тубхавитва̄ ете сан̇кха̄ра̄ нируджджханти винассантӣти аттхо. тесам̣ вӯпасамо сукхоти тесам̣ сан̇кха̄ра̄нам̣ висесена упасамо сукхо, тесам̣ вӯпасамакарам̣ нибба̄намева екантасукханти аттхо.

116. идам̣ ватва̄на саббан̃н̃ӯти саббадхаммаджа̄нанако бхагава̄ лока̄нам̣ джет̣т̣хо вуд̣д̣хо нара̄нам̣ а̄сабхо падха̄но вӣро идам̣ аниччапат̣исам̣йуттам̣ дхаммадесанам̣ ватва̄на катхетва̄ амбаре а̄ка̄се хам̣сара̄джа̄ ива набхам̣ а̄ка̄сам̣ аббхуггамӣти самбандхо.

117. сакам̣ дит̣т̣хим̣ аттано ладдхим̣ кхантим̣ ручим̣ аджджха̄сайам̣ джахитва̄на паха̄йа. бха̄вайа̄ниччасан̃н̃аханти аничче аниччанти паваттасан̃н̃ам̣ ахам̣ бха̄вайим̣ вад̣д̣хесим̣ манаси ака̄сим̣. таттха ка̄лам̣ като аханти таттха тиссам̣ джа̄тийам̣ тато джа̄тито ахам̣ ка̄лам̣ като мато.

118. две сампаттӣ анубхотва̄ти мануссасампаттидиббасампаттисан̇кха̄та̄ две сампаттийо анубхавитва̄. суккамӯлена чодитоти пура̄н̣акусаламӯлена, мӯлабхӯтена кусалена ва̄ чодито сан̃чодито. паччхиме бхаве сампаттети парийоса̄не бхаве сампатте па̄пун̣ите. сапа̄кайонупа̄гаминти сакам̣ пачитабхаттам̣ сапа̄кам̣ йоним̣ упа̄гамим̣. йасса куласса аттано пачитабхаттам̣ ан̃н̃ехи абхун̃джанӣйам̣, тасмим̣ чан̣д̣а̄лакуле ниббаттосмӣти аттхо. атха ва̄ са̄ вуччати сунакхо, сунакхоччхит̣т̣хабхаттабхун̃джанакачан̣д̣а̄лакуле джа̄тоти аттхо. сесам̣ утта̄наттхамева̄ти.

сопа̄каттхераапада̄наван̣н̣ана̄ саматта̄.