7. упасенаван̇гантапуттаттхераапада̄наван̣н̣ана̄

падумуттарам̣ бхагавантантиа̄дикам̣ а̄йасмато упасенаван̇гантапуттаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле хам̣саватӣнагаре кулагехе ниббаттитва̄ вайаппатто саттху сантикам̣ гантва̄ дхаммам̣ сун̣анто саттха̄рам̣ екам̣ бхиккхум̣ самантапа̄са̄дика̄нам̣ аггат̣т̣ха̄не т̣хапентам̣ дисва̄ саттху адхика̄ракаммам̣ катва̄ там̣ т̣ха̄нантарам̣ паттхетва̄ йа̄ваджӣвам̣ кусалам̣ катва̄ девамануссесу сам̣саранто имасмим̣ буддхуппа̄де на̄лакага̄ме рӯпаса̄рӣ бра̄хман̣ийа̄ куччхимхи ниббатти, упасенотисса на̄мам̣ ахоси. со вайаппатто тайо веде угган̣хитва̄ саттху сантике дхаммам̣ сутва̄ пат̣иладдхасаддхо паббаджитва̄ упасампада̄йа екавассико ‘‘арийагаббхам̣ вад̣д̣хемӣ’’ти екам̣ кулапуттам̣ аттано сантике упасампа̄детва̄ тена саддхим̣ саттху сантикам̣ гато. саттха̄ра̄ часса тасса авассикасса бхиккхуно саддхивиха̄рикабха̄вам̣ сутва̄ ‘‘атилахум̣ кхо твам̣, могхапуриса, ба̄хулла̄йа а̄ватто’’ти (маха̄ва. 75) гарахито ‘‘ида̄на̄хам̣ йади парисам̣ нисса̄йа саттха̄ра̄ гарахито, парисам̣йева пана нисса̄йа саттху паса̄дам̣ карисса̄мӣ’’ти випассана̄йа каммам̣ каронто начирассева арахаттам̣ па̄пун̣и. араха̄ пана хутва̄ сайампи саббе дхутан̇гадхамме сама̄да̄йа ваттати, ан̃н̃епи тадаттха̄йа сама̄дапеси, тена нам̣ бхагава̄ самантапа̄са̄дика̄нам̣ аггат̣т̣ха̄не т̣хапеси. со апарена самайена косамбийам̣ калахе уппанне бхиккхусан̇гхе ча двидха̄бхӯте екена бхиккхуна̄ там̣ калахам̣ париваджджитука̄мена ‘‘етарахи кхо калахо уппанно, бхиккхусан̇гхо ча двидха̄бхӯто, катхам̣ ну кхо майа̄ пат̣ипаджджитабба’’нти пут̣т̣хо вивекава̄сато пат̣т̣ха̄йа тасса пат̣ипаттим̣ катхеси. евам̣ тхеро тасса бхиккхуно ова̄дада̄на̄падесена аттано татха̄ пат̣ипаннабха̄вам̣ дӣпенто ан̃н̃ам̣ бйа̄ка̄си.

86. со евам̣ паттаетадаггат̣т̣ха̄но аттано пуббакаммам̣ саритва̄ соманассавасена пуббачарита̄пада̄нам̣ пака̄сенто падумуттарам̣ бхагавантантиа̄дима̄ха. паббха̄рамхи нисӣдантанти пурато бха̄рам̣ намитам̣ онамитанти паббха̄рам̣ вивекака̄мам̣ ванамаджджхе сайам̣джа̄тапаббатапаббха̄ре нисиннам̣ наруттамам̣ бхагавантам̣ ахам̣ упагаччхим̣ самӣпам̣ гатоти аттхо.

87. кан̣ика̄рапуппха дисва̄ти татха̄ упагаччханто тасмим̣ падесе супуппхитам̣ кан̣ика̄рам̣ дисва̄. ван̣т̣е чхетва̄нахам̣ тада̄ти тасмим̣ татха̄гатасса дит̣т̣хака̄ле там̣ пуппхам̣ ван̣т̣е ван̣т̣асмим̣ чхетва̄на чхиндитва̄на. алан̇каритва̄ чхаттамхӣти тена пуппхена чхаттам̣ чха̄детва̄. буддхасса абхиропайинти паббха̄ре нисиннасса буддхасса муддхани ака̄синти аттхо.

88. пин̣д̣апа̄тан̃ча па̄да̄синти тасмим̣йева нисиннасса бхагавато пин̣д̣апа̄там̣ пака̄рена ада̄сим̣ бходжесинти аттхо. параманнам̣ субходжананти сундарабходжанасан̇кха̄там̣ параманнам̣ уттама̄ха̄рам̣. буддхена наваме таттха̄ти тасмим̣ вивекат̣т̣ха̄не буддхена саха наваме ат̣т̣ха саман̣е самитапа̄пе кхӣн̣а̄савабхиккхӯ бходжесинти аттхо.

йам̣ ваданти сумедхоти йам̣ готамасамма̄самбуддхам̣ бхӯрипан̃н̃ам̣ патхависама̄нам̣ пан̃н̃ам̣ сумедхам̣ сундарам̣ саббан̃н̃ута̄дипан̃н̃авантам̣. сумедхо ити сундарапан̃н̃о ити ваданти пан̣д̣ита̄ ито каппато сатасахассе каппе есо готамо самма̄самбуддхо бхависсатӣти самбандхо. сесам̣ сувин̃н̃еййамева̄ти.

упасенаван̇гантапуттаттхераапада̄наван̣н̣ана̄ саматта̄.