2. екаттхамбхикаттхераапада̄наван̣н̣ана̄

сиддхаттхасса бхагаватотиа̄дикам̣ а̄йасмато екаттхамбхада̄йакатхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле ванакаммико хутва̄ екасмим̣ вибхавасампанне куле ниббатто. тасмим̣ самайе саббе саддха̄ пасанна̄ упа̄сака̄ екаччханда̄ ‘‘бхагавато упат̣т̣ха̄наса̄лам̣ карома̄’’ти даббасамбха̄раттха̄йа ванам̣ пависитва̄ там̣ упа̄сакам̣ дисва̄ ‘‘амха̄кам̣ екам̣ тхамбхам̣ детха̄’’ти йа̄чим̣су. со там̣ паваттим̣ сутва̄ ‘‘тумхе ма̄ чинтайиттха̄’’ти те саббе уййоджетва̄ екам̣ са̄рамайам̣ тхамбхам̣ гахетва̄ саттху дассетва̄ тесам̣йева ада̄си. со тенева соманассаджа̄то тадева мӯлам̣ катва̄ ан̃н̃а̄ни да̄на̄дӣни пун̃н̃а̄ни катва̄ тато чуто девалоке ниббатто апара̄парам̣ чхасу ка̄ма̄вачаресу диббасампаттийо анубхавитва̄ мануссесу ча аггачаккаваттисампаттим̣ анекава̄рам̣ анубхавитва̄ асан̇кхйеййам̣ падесараджджасампаттин̃ча анубхавитва̄ имасмим̣ буддхуппа̄де саддха̄сампанне екасмим̣ куле ниббатто ма̄та̄питӯхи саддхим̣ бхагавато сантике дхаммам̣ сутва̄ пат̣иладдхасаддхо паббаджитва̄ ладдхӯпасампадо каммат̣т̣ха̄нам̣ гахетва̄ манасикаронто начирассева араха̄ ахоси.

13. со евам̣ паттаарахатто аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто сиддхаттхасса̄тиа̄дима̄ха. таттха сиддхаттхасса бхагавато бхагйасампаннасса самма̄самбуддхасса. маха̄пӯгаган̣оти маха̄упа̄сакасамӯхо аху ахосӣти аттхо. саран̣ам̣ гата̄ ча те буддханти ‘‘буддхам̣ саран̣а’’нти гата̄ бхаджим̣су джа̄ним̣су ва̄ те упа̄сака̄. татха̄гатам̣ саддаханти буддхагун̣ам̣ аттано читтасанта̄не т̣хапентӣти аттхо.

14. саббе сан̇гамма мантетва̄ти саббе сама̄гамма саннипатитва̄ мантетва̄ ан̃н̃аман̃н̃ам̣ сан̃н̃а̄петва̄ екаччханда̄ хутва̄ ма̄л̣ам̣ упат̣т̣ха̄наса̄лам̣ саттхуно аттха̄йа куббанти каронтӣти аттхо. даббасамбха̄ресу екаттхамбхам̣ алабханта̄ браха̄ване маха̄ване вичинантӣти самбандхо.

15. техам̣ аран̃н̃е дисва̄на̄ти ахам̣ те упа̄саке аран̃н̃е дисва̄на ган̣ам̣ самӯхам̣ упагамма самӣпам̣ гантва̄ ан̃джалим̣ паггахетва̄на дасан̇гулисамодха̄нам̣ ан̃джалим̣ сираси катва̄ ахам̣ ган̣ам̣ упа̄сакасамӯхам̣ ‘‘тумхе имам̣ ванам̣ киматтхам̣ а̄гататтха̄’’ти тада̄ тасмим̣ ка̄ле парипуччхинти самбандхо.

16. те сӣлаванто упа̄сака̄ ме майа̄ пут̣т̣ха̄ ‘‘ма̄л̣ам̣ майам̣ каттука̄ма̄ хутва̄ екаттхамбхо амхехи на лаббхатӣ’’ти вийа̄кам̣су висесена катхайим̣сӯти самбандхо.

17. мамам̣ майхам̣ екаттхамбхам̣ детха, ахам̣ там̣ дасса̄ми саттхуно сантикам̣ ахам̣ тхамбхам̣ а̄харисса̄ми, те бхаванто тхамбхахаран̣е аппоссукка̄ усса̄харахита̄ бхавантӯти самбандхо.

24. йам̣ йам̣ йонупападжджа̄мӣти йам̣ йам̣ йоним̣ деваттам̣ атха ма̄нусам̣ упагаччха̄мӣти аттхо. бхумматтхе ва̄ упайогавачанам̣, йасмим̣ йасмим̣ девалоке ва̄ мануссалоке ва̄ти аттхо. сесам̣ утта̄наттхамева̄ти.

екаттхамбхикаттхераапада̄наван̣н̣ана̄ саматта̄.