8. дуссада̄йакаттхераапада̄наван̣н̣ана̄

тивара̄йам̣ пуре рамметиа̄дикам̣ а̄йасмато дуссада̄йакаттхерасса апада̄нам̣. айампа̄йасма̄ пуримаджинаваресу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле ра̄джакуле ниббатто вуддхиппаттака̄ле йувара̄джабха̄вам̣ патва̄ па̄кат̣о екам̣ джанападам̣ лабхитва̄ татра̄дхипатибхӯто сакаладжанападава̄сино да̄напийавачанааттхачарийа̄сама̄наттхата̄сан̇кха̄техи чатӯхи сан̇гахаваттхӯхи сан̇ган̣ха̄ти. тасмим̣ самайе сиддхаттхо бхагава̄ там̣ джанападам̣ сампа̄пун̣и. атха со йувара̄джа̄ пан̣н̣а̄ка̄рам̣ лабхитва̄ таттха сукхумаваттхена бхагавантам̣ пӯджеси. бхагава̄ там̣ ваттхам̣ хаттхена пара̄маситва̄ а̄ка̄сам̣ паккханди. тампи ваттхам̣ бхагавантамева анубандхи. атха со йувара̄джа̄ там̣ аччхарийам̣ дисва̄ атӣва пасанно ан̃джалим̣ паггайха ат̣т̣ха̄си. бхагавато сампаттасампаттат̣т̣ха̄не саббе джана̄ там̣ аччхарийам̣ дисва̄ аччхарийаббхутачитта̄ ан̃джалим̣ паггайха ат̣т̣хам̣су. бхагава̄ виха̄рамева агама̄си. йувара̄джа̄ тенева кусалакаммена тато чуто девалоке уппанно таттха диббасампаттим̣ анубхавитва̄ мануссесу чаккаваттиа̄дисампаттийо анубхавитва̄ имасмим̣ буддхуппа̄де вибхавасампанне екасмим̣ куле ниббатто вин̃н̃утам̣ патто гхара̄ва̄сам̣ сан̣т̣хапетва̄ ратанаттайе пасанно бхагавато дхаммадесанам̣ сутва̄ пат̣иладдхасаддхо паббаджитва̄ ва̄йаманто начирассева араха̄ ахоси.

38. со екадивасам̣ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто тивара̄йам̣ пуре рамметиа̄дима̄ха. таттха тиварана̄маке нагаре раман̣ӣйе ахам̣ ра̄джапутто хутва̄ сиддхаттхам̣ бхагавантам̣ ваттхена пӯджесинти аттхо. сесам̣ сувин̃н̃еййамева̄ти.

дуссада̄йакаттхераапада̄наван̣н̣ана̄ саматта̄.