6. кусума̄санийаттхераапада̄наван̣н̣ана̄

нагаре дхан̃н̃аватийа̄тиа̄дикам̣ а̄йасмато кусума̄санийаттхерасса апада̄нам̣. айампи пуримаджинаваресу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле бра̄хман̣акуле ниббатто вин̃н̃утам̣ патто махаддхано маха̄бхого тин̣н̣ам̣ веда̄нам̣ па̄рам̣ гато бра̄хман̣асиппесу кот̣иппатто сакапарасамайакусало ма̄та̄питаро пӯджетука̄мо пан̃ча уппалакала̄пе аттано самӣпе т̣хапетва̄ нисинно бхиккхусан̇гхапаривутам̣ випассим̣ бхагавантам̣ а̄гаччхантам̣ дисва̄ нӣлапӣта̄дигханабуддхарасмийо ча дисва̄ пасаннама̄насо а̄санам̣ пан̃н̃а̄петва̄ таттха та̄ни пуппха̄ни сантхаритва̄ бхагавантам̣ таттха нисӣда̄петва̄ сакагхаре ма̄ту аттха̄йа пат̣ийатта̄ни сабба̄ни кха̄данӣйабходжанӣйа̄ни гахетва̄ сапарива̄рам̣ бхагавантам̣ сахаттхена сантаппенто бходжеси. бходжана̄васа̄не екам̣ уппалахаттхам̣ ада̄си. тена соманассаджа̄то паттханам̣ ака̄си. бхагава̄пи анумоданам̣ катва̄ пака̄ми. со тена пун̃н̃ена девамануссесу две сампаттийо анубхавитва̄ имасмим̣ буддхуппа̄де са̄ваттхийам̣ вибхавасампанне екасмим̣ куле ниббатто вин̃н̃утам̣ патто бхогайасехи вад̣д̣хито ка̄месу а̄дӣнавам̣ дисва̄ гхара̄ва̄сам̣ паха̄йа паббаджито начирассева араха̄ ахоси.

65. со апарабха̄ге пуббе катакусалам̣ пуббенива̄сан̃а̄н̣ена саритва̄ соманассаппатто пуббачарита̄пада̄нам̣ пака̄сенто нагаре дхан̃н̃аватийа̄тиа̄дима̄ха. дхан̃н̃а̄нам̣ пун̃н̃аванта̄нам̣ кхаттийабра̄хман̣агахапатимаха̄са̄ла̄нам̣ анекесам̣ кула̄нам̣ а̄каратта̄ дхан̃н̃аватӣ, атха ва̄ мутта̄ман̣иа̄дисаттаратана̄нам̣ саттавидхадхан̃н̃а̄нам̣ упабхогапарибхога̄нам̣ а̄каратта̄ дхан̃н̃аватӣ, атха ва̄ дхан̃н̃а̄нам̣ буддхапаччекабуддхакхӣн̣а̄сава̄нам̣ васанат̣т̣ха̄нам̣ а̄ра̄мавиха̄ра̄дӣнам̣ а̄каратта̄ дхан̃н̃аватӣ, тасса̄ дхан̃н̃аватийа̄. нагаранти паттхенти еттха упабхогапарибхогаттхика̄ джана̄ти нагарам̣, на гаччхатӣти ва̄ нагам̣, ра̄джайувара̄джамаха̄матта̄дӣнам̣ васанат̣т̣ха̄нам̣. нагам̣ ра̄ти а̄дада̄ти ган̣ха̄тӣти нагарам̣, ра̄джа̄дӣнам̣ васанат̣т̣ха̄насамӯхабхӯтам̣ па̄ка̄рапарикха̄дӣхи париккхиттам̣ париччхиннат̣т̣ха̄нам̣ нагарам̣ на̄ма̄ти аттхо. нагаре йада̄ ахам̣ випассисса бхагавато сантике бйа̄каран̣ам̣ алабхим̣, тада̄ тасмим̣ дхан̃н̃аватийа̄ нагаре бра̄хман̣о ахосинти самбандхо. сесам̣ саббаттха утта̄намева̄ти.

кусума̄санийаттхераапада̄наван̣н̣ана̄ саматта̄.