5. саммукха̄тхавикаттхераапада̄наван̣н̣ана̄

джа̄йама̄не випассимхӣтиа̄дикам̣ а̄йасмато саммукха̄тхавикаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле бра̄хман̣акуле ниббатто саттавассикака̄лейева сакасиппе ниппхаттим̣ патто гхара̄ва̄сам̣ сан̣т̣хапетва̄ васанто випассимхи бодхисатте уппанне саббабуддха̄нам̣ лаккхан̣а̄ни ведаттайе диссама̄на̄ни та̄ни ра̄джаппамукхасса джанака̄йасса випассӣбодхисаттасса лаккхан̣ан̃ча буддхабха̄ван̃ча бйа̄каритва̄ джана̄нам̣ ма̄насам̣ нибба̄песи, анека̄ни ча тхутивачана̄ни ниведеси. со тена кусалакаммена чха ка̄ма̄вачарасампаттийо анубхавитва̄ мануссесу ча чаккаваттисампаттийо анубхавитва̄ имасмим̣ буддхуппа̄де кулагехе ниббатто вин̃н̃утам̣ патто саддха̄джа̄то паббаджитва̄ начирассева араха̄ ахоси. катакусалана̄мена саммукха̄тхавикаттхероти па̄кат̣о.

41. со аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто джа̄йама̄не випассимхӣтиа̄дима̄ха. випассимхи самма̄самбуддхе джа̄йама̄не уппаджджама̄не ма̄тукуччхито никкханте ахам̣ па̄тубхӯтам̣ нимиттам̣ ка̄ран̣ам̣ буддхабха̄васса хетум̣ бйа̄карим̣ катхесим̣, анека̄ни аччхарийа̄ни па̄кат̣а̄ни ака̄синти аттхо. сесам̣ вуттанайа̄нуса̄рена сувин̃н̃еййамева̄ти.

саммукха̄тхавикаттхераапада̄наван̣н̣ана̄ саматта̄.