10. падумапӯджакаттхераапада̄наван̣н̣ана̄

химавантасса̄видӯретиа̄дикам̣ а̄йасмато падумапӯджакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле бра̄хман̣акуле ниббатто вин̃н̃утам̣ патва̄ сакасиппе ниппхаттим̣ патва̄ таттха са̄рам̣ апассанто буддхуппаттито пуретарам̣ уппаннатта̄ ова̄да̄нуса̄санам̣ алабхитва̄ гхара̄ва̄сам̣ паха̄йа исипаббаджджам̣ паббаджитва̄ химавантасса авидӯре готамакам̣ на̄ма паббатам̣ нисса̄йа ассамам̣ ка̄ретва̄ пан̃ча̄бхин̃н̃а̄ ат̣т̣ха сама̄паттийо ниббаттетва̄ джха̄насукхенева виха̄си. тада̄ падумуттаро бхагава̄ буддхо хутва̄ сатте сам̣са̄рато уддхаранто тасса̄нукампа̄йа химавантам̣ агама̄си. та̄пасо бхагавантам̣ дисва̄ пасаннама̄насо сакасиссе сама̄нетва̄ техи падумапуппха̄ни а̄хара̄петва̄ пӯджеси. со тена пун̃н̃ена девамануссесу сам̣саранто убхайасампаттийо анубхавитва̄ имасмим̣ буддхуппа̄де са̄ваттхийам̣ кулагехе ниббатто саддхо пасанно паббаджитва̄ начирассева араха̄ ахоси.

97. со аттано пун̃н̃акаммам̣ саритва̄ соманассаджа̄то пуббачарита̄пада̄нам̣ пака̄сенто химавантасса̄видӯретиа̄дима̄ха. готамо на̄ма паббатоти анекесам̣ йаккхадевата̄нам̣ а̄ва̄сабха̄вена адхит̣т̣ха̄навасена готамасса бхаванатта̄ готамоти па̄кат̣о ахоси. паваттати тит̣т̣хатӣти паббато. на̄гаруккхехи сан̃чханноти рухати тит̣т̣хатӣти руккхо. атха ва̄ патхавим̣ кхананто уддхам̣ рухатӣти руккхо, на̄на̄ анекаппака̄ра̄ чампакакаппӯрана̄гаагаручандана̄дайо руккха̄ти на̄на̄руккха̄, техи на̄на̄руккхехи сан̃чханно парикин̣н̣о готамо паббатоти самбандхо. маха̄бхӯтаган̣а̄лайоти бхаванти джа̄йанти уппаджджанти вад̣д̣ханти ча̄ти бхӯта̄, маханта̄ ча те бхӯта̄ ча̄ти маха̄бхӯта̄, маха̄бхӯта̄нам̣ ган̣о самӯхоти маха̄бхӯтаган̣о, маха̄бхӯтаган̣асса а̄лайо патит̣т̣ха̄ти маха̄бхӯтаган̣а̄лайо.

98. вемаджджхамхи ча тасса̄сӣти тасса готамасса паббатасса вемаджджхе аббхантаре ассамо абхиниммито ниппха̄дито катоти аттхо. сесам̣ утта̄намева̄ти.

падумапӯджакаттхераапада̄наван̣н̣ана̄ саматта̄.

терасамаваггаван̣н̣ана̄ саматта̄.