1. сереййакаттхераапада̄наван̣н̣ана̄

аджджха̄йако мантадхаротиа̄дикам̣ а̄йасмато сереййакаттхерасса апада̄нам̣. айампи пуримаджинаваресу ката̄дхика̄ро тато паресу аттабха̄васахассесу виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле бра̄хман̣акуле ниббатто вин̃н̃утам̣ патва̄ тин̣н̣ам̣ веда̄нам̣ па̄рам̣ гантва̄ итиха̄са̄дисакалабра̄хман̣адхаммесу кот̣иппатто екасмим̣ дивасе аббхока̄се сапарива̄ро т̣хито бхагавантам̣ дисва̄ пасаннама̄насо сереййапуппхам̣ гахетва̄ а̄ка̄се кхипанто пӯджеси. та̄ни пуппха̄ни а̄ка̄се вита̄нам̣ хутва̄ сатта̄хам̣ т̣хатва̄ паччха̄ антарадха̄йим̣су. со там̣ аччхарийам̣ дисва̄ атӣва пасаннама̄насо тенева пӣтисоманассена ка̄лам̣ катва̄ тусита̄дӣсу ниббатто таттха диббасукхаманубхавитва̄ тато мануссасукхаманубхавитва̄ имасмим̣ буддхуппа̄де екасмим̣ кулагехе ниббатто вин̃н̃утам̣ па̄пун̣итва̄ пуббава̄сана̄балена саттхари пасанно паббаджитва̄ начирассева араха̄ ахоси.

1. со апарабха̄ге пура̄катакусалам̣ саритва̄ соманассаджа̄то пуббачарита̄пада̄нам̣ пака̄сенто аджджха̄йако мантадхаротиа̄дима̄ха. там̣ хет̣т̣ха̄ вуттаттхамева.

3. сереййакам̣ гахетва̄на̄ти сирисе бхавам̣ джа̄типуппхам̣ сереййам̣, сереййамева сереййакам̣, там̣ сереййакам̣ гахетва̄на̄ти самбандхо. бхагавати пасанно джа̄тисуманамакул̣ачампака̄дӣни пуппха̄ни патит̣т̣хапетва̄ пӯджетум̣ ка̄лам̣ наттхита̄йа таттха сампаттам̣ там̣ сереййакам̣ пуппхам̣ гахетва̄ пӯджесинти аттхо. сесам̣ саббаттха утта̄намева̄ти.

сереййакаттхераапада̄наван̣н̣ана̄ саматта̄.