6. читакапӯджакаттхераапада̄наван̣н̣ана̄

васа̄ми ра̄джа̄йатанетиа̄дикам̣ а̄йасмато читакапӯджакаттхерасса апада̄нам̣. айампи пуримабуддхесу ката̄дхика̄ро тато парам̣ уппаннуппаннабхаве виват̣т̣ӯпаниссайа̄ни пун̃н̃а̄ни упачинанто сикхисса бхагавато ка̄ле ра̄джа̄йатанаруккхадевата̄ хутва̄ ниббатто антарантара̄ девата̄хи саддхим̣ дхаммам̣ сутва̄ пасанно бхагавати париниббуте сапарива̄ро гандхадӣпадхӯпапуппхабхериа̄дӣни га̄ха̄петва̄ бхагавато а̄л̣аханат̣т̣ха̄нам̣ гантва̄ дӣпа̄дӣни пӯджетва̄ анекехи тӯрийехи анекехи ва̄дитехи там̣ пӯджеси. тато пат̣т̣ха̄йа сакабхаванам̣ упавит̣т̣хопи бхагавантамева саритва̄ саммукха̄ вийа вандати. со тенева пун̃н̃ена тена читтаппаса̄дена ра̄джа̄йатанато ка̄лам̣ като тусита̄дӣсу ниббатто диббасампаттим̣ анубхавитва̄ тато мануссесу мануссасампаттим̣ анубхавитва̄ имасмим̣ буддхуппа̄де кулагехе ниббатто вин̃н̃утам̣ патто бхагавати уппанначиттаппаса̄до бхагавато са̄сане паббаджитва̄ начирассева араха̄ ахоси.

49. со апарабха̄ге аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто васа̄ми ра̄джа̄йатанетиа̄дима̄ха. ра̄джа̄йатанети девара̄джӯнам̣ а̄йатанам̣ ра̄джа̄йатанам̣, тасса руккхасса на̄мадхеййо ва̄. париниббуте бхагаватӣти парисамантато кин̃чи анавасесетва̄ кхандхапаринибба̄нака̄ле паринибба̄насамайе паринибба̄наппаттасса сикхино локабандхуноти самбандхо.

50. читакам̣ агама̄саханти чандана̄гарудевада̄рукаппӯратаккола̄дисугандхада̄рӯхи читам̣ ра̄сигатанти читам̣, читамева читакам̣, буддхага̄равена читакам̣ пӯджанаттха̄йа читакасса самӣпам̣ ахам̣ агама̄синти аттхо. таттха гантва̄ катакиччам̣ дассенто тӯрийам̣ таттха ва̄детва̄тиа̄дима̄ха. там̣ саббам̣ сувин̃н̃еййамева̄ти.

читакапӯджакаттхераапада̄наван̣н̣ана̄ саматта̄.