3. пан̃ха̄пуччхакаван̣н̣ана̄

462. пан̃ха̄пуччхаке па̄л̣иануса̄ренева иддхипа̄да̄нам̣ кусала̄дибха̄во ведитаббо. а̄рамман̣аттикесу пана саббепете аппама̄н̣ам̣ нибба̄нам̣ а̄раббха паваттито аппама̄н̣а̄рамман̣а̄ ева, на магга̄рамман̣а̄; сахаджа̄тахетувасена пана маггахетука̄, на магга̄дхипатино. чатта̄ро хи адхипатайо ан̃н̃аман̃н̃ам̣ гарум̣ на каронти. касма̄? сайам̣ джет̣т̣хакатта̄. йатха̄ хи самаджа̄тика̄ самавайа̄ саматха̄ма̄ самасиппа̄ чатта̄ро ра̄джапутта̄ аттано аттано джет̣т̣хаката̄йа ан̃н̃аман̃н̃асса апачитим̣ на каронти, евамимепи чатта̄ро адхипатайо па̄т̣ийеккам̣ па̄т̣ийеккам̣ джет̣т̣хакадхаммата̄йа ан̃н̃аман̃н̃ам̣ гарум̣ на каронтӣти екантенева на магга̄дхипатино. атӣта̄дӣсу ека̄рамман̣абха̄вепи на ваттабба̄. нибба̄насса пана бахиддха̄дхамматта̄ бахиддха̄рамман̣а̄ на̄ма хонтӣти. еваметасмим̣ пан̃ха̄пуччхаке ниббаттиталокуттара̄ва иддхипа̄да̄ катхита̄. самма̄самбуддхена хи суттантабха̄джанӣйасмим̣йева локийалокуттарамиссака̄ иддхипа̄да̄ катхита̄, абхидхаммабха̄джанӣйапан̃ха̄пуччхакесу пана локуттара̄йева̄ти. евамайам̣ иддхипа̄давибхан̇гопи тепариват̣т̣ам̣ нӣхаритва̄ва дасситоти.

саммохавиноданийа̄ вибхан̇гат̣т̣хакатха̄йа

иддхипа̄давибхан̇гаван̣н̣ана̄ нит̣т̣хита̄.