3. пан̃ха̄пуччхакаван̣н̣ана̄

215. пан̃ха̄пуччхаке чатуннампи сачча̄нам̣ кхандхавибхан̇ге вуттанайа̄нуса̄ренева кусала̄дибха̄во ведитаббо. а̄рамман̣аттикесу пана самудайасаччам̣ ка̄ма̄вачарадхамме асса̄дентасса паритта̄рамман̣ам̣ хоти, махаггатадхамме асса̄дентасса махаггата̄рамман̣ам̣, пан̃н̃аттим̣ асса̄дентасса наваттабба̄рамман̣ам̣. дуккхасаччам̣ ка̄ма̄вачарадхамме а̄раббха уппаннам̣ паритта̄рамман̣ам̣, рӯпа̄рӯпа̄вачарадхамме а̄раббха уппаттика̄ле махаггата̄рамман̣ам̣, нава локуттарадхамме паччавеккхан̣ака̄ле аппама̄н̣а̄рамман̣ам̣, пан̣н̣аттим̣ паччавеккхан̣ака̄ле наваттабба̄рамман̣ам̣. маггасаччам̣ сахаджа̄тахетувасена саббада̄пи маггахетукам̣ вӣрийам̣ ва̄ вӣмам̣сам̣ ва̄ джет̣т̣хакам̣ катва̄ маггабха̄вана̄ка̄ле магга̄дхипати, чхандачиттесу ан̃н̃атара̄дхипатика̄ле наваттаббам̣ на̄ма хоти. дуккхасаччам̣ арийа̄нам̣ маггапаччавеккхан̣ака̄ле магга̄рамман̣ам̣, тесам̣йева маггам̣ гарум̣ катва̄ паччавеккхан̣ака̄ле магга̄дхипати, сесадхаммапаччавеккхан̣ака̄ле наваттаббам̣ хоти.

две сачча̄нӣти дуккхасамудайасачча̄ни. ета̄ни хи атӣта̄дибхеде дхамме а̄раббха уппаттика̄ле атӣта̄диа̄рамман̣а̄ни хонти. самудайасаччам̣ аджджхатта̄дибхеде дхамме асса̄дентасса аджджхатта̄диа̄рамман̣ам̣ хоти, дуккхасаччам̣ а̄кин̃чан̃н̃а̄йатанака̄ле наваттабба̄рамман̣ампӣти ведитаббам̣. ити имасмим̣ пан̃ха̄пуччхаке две сачча̄ни локийа̄ни хонти, две локуттара̄ни. йатха̄ ча имасмим̣, евам̣ пуримесупи двӣсу. самма̄самбуддхена хи тӣсупи суттантабха̄джанӣйа̄дӣсу локийалокуттара̄нева сачча̄ни катхита̄ни. евамайам̣ саччавибхан̇гопи тепариват̣т̣ам̣ нӣхаритва̄ва бха̄джетва̄ дасситоти.

саммохавиноданӣйа̄ вибхан̇гат̣т̣хакатха̄йа

саччавибхан̇гаван̣н̣ана̄ нит̣т̣хита̄.