(7.) саттаканиддеса̄диван̣н̣ана̄

806. саттавидхена н̃а̄н̣аваттхуниддесе джа̄типаччайа̄ джара̄маран̣антиа̄дина̄ найена паваттиниваттивасена ека̄дасасу пат̣иччасамуппа̄дан̇гесу екекасмим̣ ка̄латтайабхедато паччавеккхан̣ан̃а̄н̣ам̣ ватва̄ пуна ‘‘йамписса там̣ дхаммат̣т̣хитин̃а̄н̣а’’нти евам̣ тадева н̃а̄н̣ам̣ сан̇кхепато кхайадхаммата̄дӣхи пака̄рехи вуттам̣. таттха джа̄типаччайа̄ джара̄маран̣ам̣, асати джа̄тийа̄ наттхи джара̄маран̣анти н̃а̄н̣адвайам̣ паччуппаннаддха̄навасена вуттам̣. атӣтампи аддха̄нам̣, ана̄гатампи аддха̄нанти евам̣ атӣте н̃а̄н̣адвайам̣, ана̄гате н̃а̄н̣адвайанти чха. та̄ни дхаммат̣т̣хитин̃а̄н̣ена саддхим̣ сатта. таттха дхаммат̣т̣хитин̃а̄н̣анти паччайа̄ка̄ран̃а̄н̣ам̣. паччайа̄ка̄ро хи дхамма̄нам̣ паваттит̣т̣хитика̄ран̣атта̄ дхаммат̣т̣хитӣти вуччати; таттха н̃а̄н̣ам̣ дхаммат̣т̣хитин̃а̄н̣ам̣. етассева чхаббидхасса н̃а̄н̣ассетам̣ адхивачанам̣. евам̣ екекасмим̣ ан̇ге има̄ни сатта сатта катва̄ ека̄дасасу ан̇гесу саттасаттати хонти. таттха кхайадхамманти кхайагаманасабха̄вам̣. вайадхамманти вайагаманасабха̄вам̣. вира̄гадхамманти вираджджанасабха̄вам̣. ниродхадхамманти нируджджханасабха̄вам̣. имина̄ ким̣ катхитам̣? апаравипассана̄йа пуримавипассана̄саммасанам̣ катхитам̣. тена ким̣ катхитам̣ хоти? саттаккхаттум̣ випассана̄пат̣ивипассана̄ катхита̄. пат̣хаман̃а̄н̣ена хи саббасан̇кха̄ре аничча̄ дуккха̄ анатта̄ти дисва̄ там̣ н̃а̄н̣ам̣ дутийена дат̣т̣хум̣ ват̣т̣ати, дутийам̣ татийена, татийам̣ чатуттхена, чатуттхам̣ пан̃чамена, пан̃чамам̣ чхат̣т̣хена, чхат̣т̣хам̣ саттамена. евам̣ сатта випассана̄пат̣ивипассана̄ катхита̄ хонтӣти.

саттаканиддесаван̣н̣ана̄.

807. ат̣т̣хавидхена н̃а̄н̣аваттхуниддесе сота̄паттимагге пан̃н̃а̄ти сота̄паттимаггамхи пан̃н̃а̄. имина̄ сампайуттапан̃н̃а̄ва катхита̄. сесападесупи есева найоти.

ат̣т̣хаканиддесаван̣н̣ана̄.

808. нававидхена н̃а̄н̣аваттхуниддесе анупуббавиха̄расама̄паттӣсӯти анупуббавиха̄расан̇кха̄та̄су сама̄паттӣсу. та̄сам̣ анупуббена анупат̣ипа̄т̣ийа̄ виха̄ритаббат̣т̣хена анупуббавиха̄рата̄, сама̄паджджитаббат̣т̣хена сама̄паттита̄ дат̣т̣хабба̄. таттха пат̣хамаджджха̄насама̄паттийа̄ пан̃н̃а̄тиа̄дайо ат̣т̣ха сампайуттапан̃н̃а̄ ведитабба̄. навама̄ паччавеккхан̣апан̃н̃а̄. са̄ хи ниродхасама̄паттим̣ сантато пан̣ӣтато паччавеккхама̄насса паваттати. тена вуттам̣ – ‘‘сан̃н̃а̄ведайитаниродхасама̄паттийа̄ вут̣т̣хитасса паччавеккхан̣ан̃а̄н̣а’’нти.

наваканиддесаван̣н̣ана̄.