2. саччава̄ра̄диван̣н̣ана̄

719. ида̄ни йе сан̇гахава̄ре пан̃ча аттха̄ ча дхамма̄ ча сан̇гахита̄, тесам̣ пабхедадассананайена пат̣исамбхида̄ вибхаджитум̣ пуна чатассотиа̄дина̄ найена пабхедава̄ро а̄раддхо. со саччава̄рахетува̄радхаммава̄рапаччайа̄ка̄рава̄рапарийаттива̄равасена пан̃чавидхо. таттха паччайасамуппаннасса дуккхасаччасса паччайена паттаббасса нибба̄насса ча аттхабха̄вам̣, пхаланиббаттакасса самудайасса нибба̄насампа̄пакасса арийамаггасса ча дхаммабха̄ван̃ча дассетум̣ ‘саччава̄ро’ вутто. йасса кассачи пана хетупхаланиббаттакасса хетуно дхаммабха̄вам̣, хетупхаласса ча аттхабха̄вам̣ дассетум̣ ‘хетува̄ро’ вутто. таттха ча хетупхалаккамавасена уппат̣ипа̄т̣ийа̄ пат̣хамам̣ дхаммапат̣исамбхида̄ ниддит̣т̣ха̄. йе пана дхамма̄ тамха̄ тамха̄ рӯпа̄рӯпаппабхеда̄ хетуто джа̄та̄, тесам̣ аттхабха̄вам̣, тасса тасса ча рӯпа̄рӯпадхаммаппабхедасса хетуно дхаммабха̄вам̣ дассетум̣ ‘дхаммава̄ро’ вутто. джара̄маран̣а̄дӣнам̣ пана аттхабха̄вам̣, джара̄маран̣а̄дисамудайасан̇кха̄та̄нам̣ джа̄тиа̄дӣнан̃ча дхаммабха̄вам̣ дассетум̣ ‘паччайа̄ка̄рава̄ро’ вутто. тато парийаттисан̇кха̄тасса тасса тасса бха̄ситасса дхаммабха̄вам̣, бха̄ситасан̇кха̄тена паччайена паттаббасса бха̄ситаттхасса ча аттхабха̄вам̣ дассетум̣ ‘парийаттива̄ро’ вутто.

таттха ча йасма̄ бха̄ситам̣ н̃атва̄ тассаттхо н̃а̄йати, тасма̄ бха̄ситабха̄ситаттхаккамена уппат̣ипа̄т̣ийа̄ пат̣хамам̣ дхаммапат̣исамбхида̄ ниддит̣т̣ха̄. парийаттидхаммасса ча пабхедадассанаттхам̣ ‘‘таттха катама̄ дхаммапат̣исамбхида̄’’ти пуччха̄пуббан̇гамо пат̣иниддесава̄ро вутто. таттха суттантиа̄дӣхи навахи ан̇гехи ниппадесато танти гахита̄. айам̣ имасса бха̄ситасса аттхо, айам̣ имасса бха̄ситасса аттхоти имасмимпи т̣ха̄не бха̄ситавасена ниппадесато танти ева гахита̄ти.

суттантабха̄джанӣйаван̣н̣ана̄.