6. дукадукапат̣т̣ха̄наван̣н̣ана̄

дукадукапат̣т̣ха̄непи хетусахетукам̣ дхаммам̣ пат̣ичча хетусахетуко дхаммо уппаджджати хетупаччайа̄ти пан̃худдха̄равасенева сан̇кхепато десана̄ ката̄. таттха хетудукам̣ сахетукадука̄дӣхи, сахетукадука̄дӣни ча тена саддхим̣ йоджита̄ни. екекам̣ пана дукам̣ сесехи, сеса̄ ча техи саддхим̣ пат̣ипа̄т̣ийа̄ йоджетабба̄. идан̃хи дукадукапат̣т̣ха̄нам̣ на̄ма ‘дукесуйева дуке паккхипитва̄’ деситам̣. тенеттха саббадукехи саддхим̣ саббадука̄нам̣ йоджана̄ ведитабба̄. па̄л̣и пана сан̇кхитта̄. йена йена ча падена саддхим̣ йам̣ йам̣ падам̣ йоджанам̣ на гаччхати, там̣ там̣ ха̄петва̄ва десана̄ ката̄ти.

дукадукапат̣т̣ха̄наван̣н̣ана̄.

етта̄вата̄ –

тикан̃ча пат̣т̣ха̄наварам̣ дукуттамам̣,

дукам̣ тикан̃чева тикам̣ дукан̃ча;

тикам̣ тикан̃чева дукам̣ дукан̃ча,

чха ануломамхи найа̄ сугамбхӣра̄ти. –

ат̣т̣хакатха̄йам̣ вуттага̄тха̄йа дӣпита̄. дхамма̄нуломапат̣т̣ха̄не чха найа̄ ниддит̣т̣ха̄ хонти. паччайавасена панеттха екекасмим̣ пат̣т̣ха̄не анулома̄дайо чатта̄ро чатта̄ро найа̄ти екена парийа̄йена чатувӣсатинайапат̣иман̣д̣итам̣ ануломапат̣т̣ха̄нам̣йева ведитаббам̣.