9. дхаммайамакам̣

1. пан̣н̣аттиуддесава̄раван̣н̣ана̄

1-16. ида̄ни тесан̃н̃ева мӯлайамаке десита̄нам̣ кусала̄дидхамма̄нам̣ ма̄тикам̣ т̣хапетва̄ читтайамака̄нантарам̣ деситасса дхаммайамакасса ван̣н̣ана̄ хоти. таттха кхандхайамаке вуттанайенева па̄л̣иваваттха̄нам̣ ведитаббам̣. йатха̄ хи таттха пан̣н̣аттива̄ра̄дайо тайо маха̄ва̄ра̄, авасеса̄ антарава̄ра̄ ча хонти, татха̄ идха̄пи. ‘‘йо кусалам̣ дхаммам̣ бха̄вети, со акусалам̣ дхаммам̣ паджахатӣ’’ти а̄гататта̄ панеттха парин̃н̃а̄ва̄ро, бха̄вана̄ва̄ро на̄ма̄ти ведитаббо. таттха йасма̄ абйа̄като дхаммо нева бха̄ветаббо, на паха̄таббо, тасма̄ там̣ падамева на уддхат̣ам̣. пан̣н̣аттива̄ре панеттха тин̣н̣ам̣ кусала̄дидхамма̄нам̣ васена падасодханава̄ро, падасодханамӯлачаккава̄ро, суддхадхаммава̄ро, суддхадхаммамӯлачаккава̄роти имесу чатӯсу ва̄ресу йамакаган̣ана̄ ведитабба̄.

1. пан̣н̣аттиниддесава̄раван̣н̣ана̄

17-32. пан̣н̣аттива̄раниддесе пана кусала̄ кусаладхамма̄ти кусала̄нам̣ екантена кусаладхамматта̄ ‘‘а̄манта̄’’ти вуттам̣. сесависсаджджанесупи есева найо. авасеса̄ дхамма̄ на акусала̄ дхамма̄ти авасеса̄ дхамма̄ акусала̄ на хонти, дхамма̄ пана хонтӣти аттхо. имина̄ найена саббависсаджджана̄ни ведитабба̄ни.

пан̣н̣аттива̄раван̣н̣ана̄.

2. паваттива̄раван̣н̣ана̄

33-34. паваттива̄ре панеттха паччуппаннака̄ле пуггалава̄расса ануломанайе ‘‘йасса кусала̄ дхамма̄ уппаджджанти, тасса акусала̄ дхамма̄ уппаджджанти; йасса ва̄ пана акусала̄ дхамма̄ уппаджджанти, тасса кусала̄ дхамма̄ уппаджджантӣ’’ти кусаладхаммамӯлака̄ни две йамака̄ни, акусаладхаммамӯлакам̣ еканти тӣн̣и йамака̄ни хонти. тасса пат̣иломанайепи ока̄сава̄ра̄дӣсупи есева найо. еваметтха саббава̄ресу тин̣н̣ам̣ тин̣н̣ам̣ йамака̄нам̣ васена йамакаган̣ана̄ ведитабба̄. аттхавиниччхайе панеттха идам̣ лаккхан̣ам̣ – имасса хи дхаммайамакасса паваттимаха̄ва̄ре ‘‘уппаджджанти нируджджхантӣ’’ти имесу уппа̄даниродхесу кусала̄кусаладхамма̄ та̄ва екантена паваттийам̣йева лаббханти, на чутипат̣исандхӣсу. абйа̄катадхамма̄ пана паватте ча чутипат̣исандхӣсу ча̄ти тӣсупи ка̄лесу лаббханти. еваметтха йам̣ йаттха йаттха лаббхати, тасса васена таттха таттха виниччхайо ведитаббо.

татридам̣ найамукхам̣ – кусала̄кусала̄нам̣ та̄ва екаккхан̣е ануппаджджанато ‘‘но’’ти пат̣иседхо като. абйа̄ката̄ ча̄ти читтасамут̣т̣ха̄нарӯпавасена вуттам̣.

35-36. йаттха кусала̄ дхамма̄ нуппаджджантӣти асан̃н̃абхавам̣ сандха̄йа вуттам̣. теневеттха ‘‘а̄манта̄’’ти виссаджджанам̣ катам̣. уппаджджантӣти идампи асан̃н̃абхавам̣йева сандха̄йа вуттам̣. абйа̄ката̄нам̣ пана ануппаттит̣т̣ха̄насса абха̄ва̄ ‘‘наттхӣ’’ти пат̣иккхепо като.

49. дутийе акусалети бхавам̣ асса̄детва̄ уппаннесу никантиджаванесу дутийе джаваначитте. дутийе читте ваттама̄нети пат̣исандхито дутийе бхаван̇гачитте ваттама̄не саха ва̄ пат̣исандхийа̄ бхаван̇гам̣ випа̄кавасена екамева катва̄ бхаваникантийа̄ а̄ваджджаначитте. тан̃хи кирийачиттатта̄ абйа̄катаджа̄тийам̣ випа̄като дутийам̣ на̄ма хоти.

57. йасса читтасса анантара̄ аггамагганти готрабхучиттам̣ сандха̄йа вуттам̣. кусала̄ дхамма̄ уппаджджиссантӣти те аггамаггадхаммейева сандха̄йа вуттам̣.

79. йасса читтасса анантара̄ аггамаггам̣ пат̣илабхиссанти, тасса читтасса уппа̄даккхан̣ети идам̣ читтаджа̄тивасена вуттам̣. таджджа̄тикасса хи ека̄ваджджанена уппаннасса тато оримачиттасса уппа̄даккхан̣епи етам̣ лаккхан̣ам̣ лаббхатева.

99. ниродхава̄репи кусала̄кусала̄нам̣ екато анируджджханато ‘‘но’’ти вуттам̣. имина̄ найамукхена саббаттха виниччхайо ведитабботи.

дхаммайамакаван̣н̣ана̄ нит̣т̣хита̄.