1. пан̣н̣аттиуддесава̄раван̣н̣ана̄

1-9. ида̄ни мӯлайамаке деситейева кусала̄дидхамме а̄йатанавасена̄пи сан̇ган̣хитва̄ кхандхайамака̄нантарам̣ деситасса а̄йатанайамакасса ван̣н̣ана̄ хоти. таттха кхандхайамаке вуттанайенева па̄л̣иваваттха̄нам̣ ведитаббам̣. йатхева хи таттха пан̣н̣аттива̄ро, паваттива̄ро, парин̃н̃а̄ва̄роти тайо маха̄ва̄ра̄ хонти, татха̄ идха̄пи. вачанаттхопи несам̣ таттха вуттанайенева ведитаббо. идха̄пи ча пан̣н̣аттива̄ро уддесаниддесавасена двидха̄ ваваттхито. итаре ниддесавасенева. ‘таттха два̄даса̄йатана̄нӣ’ти падам̣ а̄дим̣ катва̄ йа̄ва на̄йатана̄ на маноти, та̄ва пан̣н̣аттива̄расса уддесава̄ро ведитаббо. таттха два̄даса̄йатана̄нӣти айам̣ йамакавасена пуччхитабба̄нам̣ а̄йатана̄нам̣ уддесо. чаккха̄йатанам̣…пе… дхамма̄йатананти тесан̃н̃ева пабхедато на̄мававаттха̄нам̣. йамакавасена пуччха̄сукхаттхан̃четтха пат̣хамам̣ пат̣ипа̄т̣ийа̄ аджджхаттарӯпа̄йатана̄ни вутта̄ни. паччха̄ ба̄хирарӯпа̄йатана̄ни. парийоса̄не мана̄йатанадхамма̄йатана̄ни.

йатха̄ пана хет̣т̣ха̄ кхандхавасена, евамидха имесам̣ а̄йатана̄нам̣ васена падасодханава̄ро, падасодханамӯлачаккава̄ро, суддха̄йатанава̄ро, суддха̄йатанамӯлачаккава̄роти, чатта̄рова найава̄ра̄ хонти. екеко четтха ануломапат̣иломавасена дувидхойева. тесаматтхо таттха вуттанайенева ведитаббо. йатха̄ пана кхандхайамаке падасодханава̄расса ануломава̄ре ‘рӯпам̣ рӯпаккхандхо, рӯпаккхандхо рӯпа’нтиа̄дӣни пан̃ча йамака̄ни, татха̄ идха ‘чаккху, чаккха̄йатанам̣; чаккха̄йатанам̣; чаккхӯ’тиа̄дӣни два̄даса. пат̣иломава̄репи ‘на чаккху, на чаккха̄йатанам̣; на чаккха̄йатанам̣, на чаккхӯ’тиа̄дӣни два̄даса, падасодханамӯлачаккава̄расса панеттха ануломава̄ре екека̄йатанамӯлака̄ни ека̄даса ека̄даса катва̄ дваттим̣сасатам̣ йамака̄ни. пат̣иломава̄репи дваттим̣сасатамева. суддха̄йатанава̄расса̄пи ануломава̄ре два̄даса, пат̣иломава̄ре два̄даса, суддха̄йатанамӯлачаккава̄расса̄пи ануломава̄ре екека̄йатанамӯлака̄ни ека̄даса ека̄даса катва̄ дваттим̣сасатам̣ йамака̄ни. пат̣иломава̄репи дваттим̣сасатамева̄ти евамидха чхасаттата̄дхикехи пан̃чахи йамакасатехи, двипан̃н̃а̄са̄дхикехи ека̄дасахи пуччха̄сатехи, чатура̄дхикехи тевӣса̄йа аттхасатехи ча пат̣иман̣д̣ито пан̣н̣аттива̄расса уддесава̄ро ведитаббо.

пан̣н̣аттиуддесава̄раван̣н̣ана̄.