3. нирайапа̄лакатха̄ван̣н̣ана̄

866. ида̄ни нирайапа̄лакатха̄ на̄ма хоти. таттха ‘‘нирайе нерайикакамма̄нева нирайапа̄ларӯпавасена вадхенти, наттхи нирайапа̄ла̄ на̄ма сатта̄’’ти йесам̣ ладдхи, сеййатха̄пи андхака̄нам̣; те сандха̄йа пуччха̄ сакава̄дисса, пат̣ин̃н̃а̄ итарасса. атха нам̣ ‘‘йади таттха нирайапа̄ла̄ на сийум̣, каммака̄ран̣а̄пи на бхавеййум̣. ка̄ран̣икесу хи сати ка̄ран̣а̄’’ти чодетум̣ наттхи нирайесӯтиа̄дима̄ха.

867-868. аттхи мануссесӯти паччаккхена н̃а̄панаттхам̣. йатха̄ хи мануссесу сати ка̄ран̣икесу ка̄ран̣а̄, евам̣ таттха̄пӣти айаметтха адхиппа̄йо. аттхи нирайесӯти пуччха̄ парава̄дисса, пат̣ин̃н̃а̄ итарасса. на вессабхӯ нопи ча петтира̄джа̄ти парава̄дина̄ сакасамайато суттам̣ а̄бхатам̣. там̣ пана са̄сана̄вачариканти сакава̄дина̄ анун̃н̃а̄там̣. таттха вессабхӯти еко дево. петтира̄джа̄ти петтивисайе петамахиддхико. сома̄дайо па̄кат̣а̄ ева. идам̣ вуттам̣ хоти – аттано каммехи ито пан̣уннам̣ паралокам̣ паттам̣ пурисам̣ на ете вессабхӯа̄дайо хананти. йехи пана со каммехи таттха пан̣унно, та̄ни сака̄ни камма̄нийева нам̣ таттха ханантӣти каммассакатам̣ дӣпети, на нирайапа̄ла̄нам̣ абха̄вам̣. сакава̄дина̄ пана таменам̣, бхиккхавети а̄бхата̄ни суттапада̄ни нӣтаттха̄нева̄ти.

нирайапа̄лакатха̄ван̣н̣ана̄.