9. вачанасодханаван̣н̣ана̄

55-59. ида̄ни вачанасодханам̣ хоти. таттха йадетам̣ пуггало упалаббхатӣти вачанам̣, там̣ содхетум̣ пуггало упалаббхати, упалаббхати пуггалоти. пуччха̄ сакава̄дисса. тассаттхо – йадетам̣ пуггало упалаббхатӣти пададвайам̣, там̣ екаттхам̣ ва̄ бхавеййа на̄наттхам̣ ва̄. йади та̄ва на̄наттхам̣, йатха̄ ан̃н̃ам̣ рӯпам̣, ан̃н̃а̄ ведана̄, евам̣ ан̃н̃о пуггало, ан̃н̃о упалаббхатӣти а̄паджджати. атхекаттхам̣, йатха̄ йам̣ читтам̣ там̣ мано, евам̣ свева пуггало, со упалаббхатӣти а̄паджджати. тена там̣ вада̄ми ‘‘йади те йо пуггало, со упалаббхати, евам̣ санте йо йо упалаббхати, со со пуггалоти а̄паджджати, ким̣ сампат̣иччхаси ета’’нти? тато пуггалава̄дӣ йасма̄ пуггаласса упалаббхатам̣ иччхати, на упалаббхама̄на̄нампи рӯпа̄дӣнам̣ пуггалабха̄вам̣, тасма̄ пуггало упалаббхати, упалаббхати ке хи чи пуггало ке хи чи на пуггалотиа̄дима̄ха. тассаттхо – мама пуггало аттхи пуггалоти саттху вачанато упалаббхати. йо пана упалаббхати, на со саббо пуггало, атха кхо ке хи чи пуггало ке хи чи на пуггалоти. таттха ко-ка̄раттхе ке-ка̄ро, хи-ка̄ро ча нипа̄таматто. кочи пуггало, кочи на пуггалоти айам̣ панеттха аттхо. идам̣ вуттам̣ хоти – пуггалопи хи рӯпа̄дӣсупи йо кочи дхаммо упалаббхатийева, таттха пуггалова пуггало. рӯпа̄дӣсу пана кочипи на пуггалоти. тато там̣ сакава̄дӣ а̄ха – пуггало ке хи чи упалаббхати ке хи чи на упалаббхатӣти. тассаттхо – пуггало упалаббхатӣти пададвайасса аттхато екатте йади упалаббхатӣти анун̃н̃а̄то дхаммо пуггалато анан̃н̃опи кочи пуггало кочи на пуггало, пуггалопи те кочи упалаббхати, кочи на упалаббхатӣти а̄паджджати, ким̣ сампат̣иччхаси етанти? со пуггаласса анупаладдхим̣ аниччханто на хеванти пат̣иккхипати. ито парам̣ ‘‘а̄джа̄на̄хи ниггаха’’нтиа̄ди саббам̣ сан̇кхиттам̣. виттха̄рато пана ведитаббам̣. пуггало саччикат̣т̣хотиа̄дӣсупи есева найо. сабба̄ни хета̄ни упалаббхативевачана̄нева, апича йасма̄ ‘‘пуггало упалаббхатисаччикат̣т̣хапараматтхена̄’’ти айам̣ пуггалава̄дино пат̣ин̃н̃а̄, тасма̄сса йатхева пуггало упалаббхатӣти ладдхи, евамевам̣ пуггало саччикат̣т̣хотипи а̄паджджати. йа̄ панасса пуггало аттхӣти ладдхи, тасса̄ виджджама̄нотивевачанамева, тасма̄ сабба̄нипета̄ни вачана̄ни содхита̄ни.

60. таттха йам̣ аваса̄не ‘‘пуггало аттхи, аттхи на саббо пуггало’’тиа̄ди вуттам̣, татра̄йамадхиппа̄йо – йан̃хетам̣ парава̄дина̄ ‘‘пуггало аттхи, аттхи кехичи пуггало, кехичи на пуггало’’ти вуттам̣, там̣ йасма̄ аттхато пуггало аттхи, аттхи на саббо пуггалоти еттакам̣ хоти, тасма̄ нам̣ сакава̄дӣ сампат̣иччха̄петва̄ ида̄ни нам̣ евам̣ ануйун̃джати. тайа̄ хи ‘‘аттхи пуггало аттахита̄йа пат̣ипанно’’ти вачанаматтам̣ нисса̄йа ‘‘пуггало аттхӣ’’ти ладдхи гахита̄, йатха̄ ча бхагавата̄ етам̣ вуттам̣, татха̄ ‘‘сун̃н̃ато локам̣ авеккхассу, могхара̄джа̄, сада̄ сато’’тиа̄дина̄ (су. ни. 1125) найена ‘‘наттхӣ’’типи вуттам̣, тасма̄ йатхева те ‘‘пуггало аттхи, аттхи на саббо пуггало’’ти ладдхи, татха̄ пуггало наттхи, наттхи на саббо пуггалотипи а̄паджджати, ким̣ етам̣ сампат̣иччхасӣти? атха нам̣ асампат̣иччханто на хева̄ти пат̣иккхипати. сесаметтха ниггаха̄дивидха̄нам̣ вуттанайенева ведитаббанти.

вачанасодханаван̣н̣ана̄ нит̣т̣хита̄.