9. найатха̄читтасса ва̄ча̄тикатха̄ван̣н̣ана̄

564. ида̄ни найатха̄читтасса ва̄ча̄тикатха̄ на̄ма хоти. таттха йасма̄ кочи ан̃н̃ам̣ бхан̣исса̄мӣти ан̃н̃ам̣ бхан̣ати, тасма̄ найатха̄читтасса ва̄ча̄ читта̄нурӯпа̄ читта̄нугатика̄ на хоти, вина̄пи читтена паваттатӣти йесам̣ ладдхи; сеййатха̄пи пуббаселийа̄нам̣; те сандха̄йа пуччха̄ сакава̄дисса, пат̣ин̃н̃а̄ итарасса. атха нам̣ ‘‘йади там̣самут̣т̣ха̄пакам̣ читтам̣ на сийа̄, пхасса̄дайопи тасмим̣ кхан̣е на сийу’’нти чодетум̣ апхассакасса̄тиа̄дима̄ха. на бхан̣итука̄мотиа̄дӣсу йасма̄ ан̃н̃ам̣ бхан̣исса̄мӣти ан̃н̃ам̣ бхан̣антопи бхан̣итука̄мойева на̄ма хоти, тасма̄ на хева̄ти пат̣иккхипати.

565. нану аттхи кочи ан̃н̃ам̣ бхан̣исса̄мӣтиа̄дӣсу чӣваранти бхан̣итука̄мо чӣранти бхан̣еййа. таттха ан̃н̃ам̣ бхан̣итука̄мата̄читтам̣, ан̃н̃ам̣ бхан̣аначиттам̣, ити пуббабха̄гена читтена асадисатта̄ айатха̄читто на̄ма хоти, тенасса кевалам̣ ана̄патти на̄ма хоти, на пана чӣранти вачанасамут̣т̣ха̄пакачиттам̣ наттхи, ити ачиттака̄ са̄ ва̄ча̄ти аттхам̣ сандха̄йа имина̄ уда̄харан̣ена ‘‘найатха̄читтасса ва̄ча̄’’ти патит̣т̣ха̄пита̄пи аппатит̣т̣ха̄пита̄ва хотӣти.

найатха̄читтасса ва̄ча̄тикатха̄ван̣н̣ана̄.