9. рӯпам̣ каммантикатха̄ван̣н̣ана̄

527-537. ида̄ни рӯпам̣ каммантикатха̄ на̄ма хоти. таттха йесам̣ ка̄йавачӣвин̃н̃аттисан̇кха̄там̣ рӯпамева ка̄йакаммам̣ вачӣкаммам̣ на̄ма, тан̃ча кусаласамут̣т̣ха̄нам̣ кусалам̣, акусаласамут̣т̣ха̄нам̣ акусаланти ладдхи, сеййатха̄пи махиса̄сака̄нан̃чева саммитийа̄нан̃ча; те сандха̄йа кусалена читтена самут̣т̣хитанти пуччха̄ сакава̄дисса, пат̣ин̃н̃а̄ итарасса. атха нам̣ саче там̣ кусалам̣, йва̄йам̣ са̄рамман̣а̄дибхедо кусаласса лаббхати, аттхи те со тасса̄ти чодетум̣ са̄рамман̣антиа̄ди а̄раддхам̣. таттха паттхана̄ пан̣идхӣти четана̄йеветам̣ вевачанам̣. кусалачетана̄йева хи пакаппайама̄на̄ паттхана̄ти. пакаппанавасена т̣хитатта̄ пан̣идхӣти ча вуччати. парато пана кусалена читтена самут̣т̣хита̄ ведана̄ сан̃н̃а̄ четана̄ саддха̄тиа̄дӣсу ведана̄дӣнан̃н̃ева четтха паттхана̄ пан̣идхӣти лаббхати, на четана̄йа. касма̄? двиннам̣ четана̄нам̣ екато абха̄ва̄, сотапатитатта̄ пана евам̣ танти гата̄ти ведитабба̄. рӯпа̄йатанантиа̄ди пуримава̄ре ‘‘саббантам̣ кусала’’нти сам̣кхиттасса пабхедадассанаттхам̣ вуттам̣. сеса̄ сам̣сандананайа̄, вачӣкаммакатха̄ ‘‘акусалена читтена самут̣т̣хита’’нтиа̄дивидха̄нан̃ча саббам̣ па̄л̣иануса̄ренева ведитаббам̣. асучӣти панеттха суккам̣ адхиппетам̣. суттаса̄дханам̣ утта̄наттхамева.

рӯпам̣ каммантикатха̄ван̣н̣ана̄.