7. рӯпадха̄туйа̄ а̄йатанакатха̄ван̣н̣ана̄

519. ида̄ни рӯпадха̄туйа̄ а̄йатанакатха̄ на̄ма хоти. таттха йесам̣ ‘‘рӯпӣ маномайо саббан̇гапаччан̇гӣ ахӣниндрийо’’ти (дӣ. ни. 1.87) суттам̣ нисса̄йа брахмака̄йика̄нам̣ гха̄на̄динимитта̄нипи а̄йатана̄нева̄ти каппетва̄ сал̣а̄йатанико тесам̣ аттабха̄воти ладдхи, сеййатха̄пи андхака̄нан̃чева саммитийа̄нан̃ча; те сандха̄йа сал̣а̄йатаникоти пуччха̄ сакава̄дисса, ладдхивасена пат̣ин̃н̃а̄ итарасса. атха нам̣ йам̣ таттха а̄йатанам̣ наттхи, тасса васена чодетум̣ аттхи таттха гха̄на̄йатанантиа̄ди а̄раддхам̣. тато парава̄дӣ йам̣ таттха аджджхаттика̄нам̣ тин̣н̣ам̣ а̄йатана̄нам̣ гха̄на̄дикам̣ сан̣т̣ха̄нанимиттам̣ тадева а̄йатананти ладдхийа̄ пат̣иджа̄на̄ти. ба̄хира̄нам̣ гандха̄йатана̄дӣнам̣ васена пут̣т̣хо гха̄наппаса̄да̄дайо таттха на иччхати, тасма̄ тесам̣ гочарам̣ пат̣иседхенто пат̣иккхипати. пат̣иломапан̃хасам̣санданапан̃хесупи имина̄вупа̄йена аттхо ведитаббо.

521. аттхи таттха гха̄на̄йатанам̣ аттхи гандха̄йатанам̣ тена гха̄нена там̣ гандхам̣ гха̄йатӣти тасмим̣йева парасамайе екачче а̄чарийе сандха̄йа вуттам̣. те кира таттха чха аджджхаттика̄ни а̄йатана̄ни парипун̣н̣а̄ни иччханти, а̄йатанена ча на̄ма сакиччакена бхавитаббанти техи гха̄на̄дӣхи те гандха̄дайо гха̄йанти са̄йанти пхусантӣтипи иччханти. там̣ ладдхим̣ сандха̄йа парава̄дӣ а̄манта̄ти пат̣иджа̄на̄ти.

522. аттхи таттха мӯлагандхотиа̄дӣни пана пут̣т̣хо аттхибха̄вам̣ са̄дхетум̣ асакконто пат̣иккхипати. нану аттхи таттха гха̄нанимиттантиа̄ди сан̣т̣ха̄наматтассева са̄дхакам̣, на а̄йатанасса, тасма̄ уда̄хат̣ампи ануда̄хат̣асадисамева̄ти.

рӯпадха̄туйа̄ а̄йатанакатха̄ван̣н̣ана̄.