2. антара̄бхавакатха̄ван̣н̣ана̄

505. ида̄ни антара̄бхавакатха̄ на̄ма хоти. таттха йесам̣ ‘‘антара̄ паринибба̄йӣ’’ти суттападам̣ айонисо гахетва̄ ‘‘антара̄бхаво на̄ма аттхи, йаттха сатто диббачаккхуко вийа адиббачаккхуко, иддхима̄ вийа аниддхима̄ ма̄та̄питисама̄гаман̃чева утусамайан̃ча олокайама̄но сатта̄хам̣ ва̄ атирекасатта̄хам̣ ва̄ тит̣т̣хатӣ’’ти ладдхи, сеййатха̄пи пуббаселийа̄нан̃чева саммитийа̄нан̃ча; те сандха̄йа аттхӣти пуччха̄ сакава̄дисса, ладдхийам̣ т̣хатва̄ пат̣ин̃н̃а̄ итарасса. атха нам̣ йе ча бхагавата̄ тайо бхава̄ вутта̄, тесам̣ васена чодетум̣ ка̄мабхавотиа̄дима̄ха. татра̄йам̣ адхиппа̄йо – йади те антара̄бхаво на̄ма кочи бхаво аттхи, тена ка̄мабхава̄дӣнам̣йева ан̃н̃атарена бхавитаббам̣ пан̃чавока̄рабхава̄дина̄ вийа, тена там̣ пуччха̄ми – ‘‘ким̣ те айам̣ антара̄бхаво на̄ма ка̄мабхаво, уда̄ху рӯпабхаво арӯпабхаво ва̄’’ти? итаро татха̄ аниччханто саббам̣ пат̣иккхипати. ка̄мабхавасса ча̄тиа̄ди йади антара̄бхаво на̄ма аттхи, имесам̣ бхава̄нам̣ антара̄ двиннам̣ сӣма̄нам̣ сӣмантарика̄ вийа бхавеййа̄ти чодетум̣ а̄раддхам̣. парава̄дӣ пана татха̄ аниччханто саббапан̃хе пат̣иккхипати кевалам̣ ладдхийа̄, на сахадхаммена. тенева нам̣ сакава̄дӣ ‘но вата ре’ти пат̣иседхети.

506. пан̃чамӣ са̄ йонӣтиа̄дӣнипи йатха̄париччхиннайониа̄дӣсу со самодха̄нам̣ на гаччхати, атха тена тато тато атирекена бхавитаббанти чодетум̣ вутта̄ни. антара̄бхавӯпагам̣ камманти йади сопи еко бхаво, йатха̄ ка̄мабхавӯпага̄дӣни камма̄ни аттхӣти саттха̄ра̄ вибхаджитва̄ дассита̄ни, евам̣ тадупагена̄пи каммена бхавитаббанти чоданаттхам̣ вуттам̣. йасма̄ пана парасамайе антара̄бхавӯпагам̣ на̄ма па̄т̣ийеккам̣ каммам̣ наттхи, йам̣ йам̣ бхавам̣ упападжджиссати, тадупагенева каммена антара̄бхаве ниббаттатӣти тесам̣ ладдхи, тасма̄ ‘нахева’нти пат̣иккхиттам̣. аттхи антара̄бхавӯпага̄ сатта̄ти пут̣т̣хопи ка̄мабхавӯпага̄йева на̄ма тети ладдхийа̄ пат̣иккхипати. джа̄йантӣтиа̄дӣни пут̣т̣хопи таттха джа̄тиджара̄маран̣а̄ни чева чутипат̣исандхипарампаран̃ча аниччханто пат̣иккхипати. рӯпа̄дивасена пут̣т̣хопи йасма̄ антара̄бхавасаттасса анидассанам̣ рӯпам̣, ведана̄дайопи ан̃н̃есам̣ вийа на ол̣а̄рика̄ти тасса ладдхи, тасма̄ пат̣иккхипати. имина̄ва ка̄ран̣ена пан̃чавока̄рабхавабха̄вепи пат̣иккхепо ведитаббо.

507. ида̄ни ка̄мабхаво бхаво гатӣтиа̄ди бхавасам̣санданам̣ на̄ма хоти. татра̄йам̣ адхиппа̄йо – йади те антара̄бхаво на̄ма кочи бхаво бхавеййа, йатха̄ ка̄мабхава̄дӣсу бхавагатиа̄дибхедо лаббхати, татха̄ татра̄пи лаббхетха. йатха̄ ва̄ таттха на лаббхати, татха̄ имесупи на лаббхетха. сама̄насмин̃хи бхавабха̄ве етесвевеса вибха̄го аттхи, на итарасминти ко еттха висесахетӯти. итаро пуна ладдхиматтавасена там̣ там̣ пат̣иджа̄на̄ти чева пат̣иккхипати ча.

508. саббесан̃н̃ева сатта̄нам̣ аттхи антара̄бхавоти пут̣т̣хо йасма̄ нирайӯпагаасан̃н̃асаттӯпагаарӯпӯпага̄нам̣ антара̄бхавам̣ на иччхати, тасма̄ пат̣иккхипати. тенева ка̄ран̣ена пат̣иломе пат̣иджа̄на̄ти. а̄нантарийасса̄тиа̄ди йесам̣ со антара̄бхавам̣ на иччхати, те та̄ва вибхаджитва̄ дассетум̣ вуттам̣. там̣ саббам̣ па̄л̣иануса̄ренева ведитаббам̣ саддхим̣ суттаса̄дханена̄ти.

антара̄бхавакатха̄ван̣н̣ана̄.