4. да̄накатха̄ван̣н̣ана̄

478. ида̄ни да̄накатха̄ на̄ма хоти. таттха да̄нам̣ на̄ма тивидхам̣ – ча̄гачетана̄пи, виратипи, деййадхаммопи. ‘‘саддха̄ хирийам̣ кусалан̃ча да̄на’’нти (а. ни. 8.30) а̄гатат̣т̣ха̄не ча̄гачетана̄ да̄нам̣. ‘‘абхайам̣ детӣ’’ти (а. ни. 8.39) а̄гатат̣т̣ха̄не вирати. ‘‘да̄нам̣ дети аннам̣ па̄на’’нти а̄гатат̣т̣ха̄не деййадхаммо. таттха ча̄гачетана̄ ‘‘дети ва̄ деййадхаммам̣, денти ва̄ ета̄йа деййадхамма’’нти да̄нам̣. вирати авакхан̣д̣анат̣т̣хена лаванат̣т̣хена ва̄ да̄нам̣. са̄ хи уппаджджама̄на̄ бхайабхерава̄дисан̇кха̄там̣ дуссӣлйачетанам̣ да̄ти кхан̣д̣ети луна̄ти ва̄ти да̄нам̣. деййадхаммо диййатӣти да̄нам̣. еваметам̣ тивидхампи аттхато четасико чева дхаммо деййадхаммо ча̄ти дувидхам̣ хоти. таттха йесам̣ ‘‘четасикова дхаммо да̄нам̣, на деййадхаммо’’ти ладдхи, сеййатха̄пи ра̄джагирикасиддхаттхика̄нам̣; те сандха̄йа четасикоти пуччха̄ сакава̄дисса, пат̣ин̃н̃а̄ итарасса. атха нам̣ деййадхаммавасена чодетум̣ лаббха̄ти пуччха̄ сакава̄дисса, анна̄дӣни вийа со на сакка̄ да̄тунти пат̣иккхепо итарасса. пуна дал̣хам̣ катва̄ пут̣т̣хе ‘‘абхайам̣ детӣ’’ти суттавасена пат̣ин̃н̃а̄ тассева. пхассапан̃ха̄дӣсу пана пхассам̣ детӣтиа̄дивоха̄рам̣ апассанто пат̣иккхипатева.

479. анит̣т̣хапхалантиа̄ди ачетасикасса дхаммасса да̄набха̄вадӣпанаттхам̣ вуттам̣. на хи ачетасико анна̄дидхаммо а̄йатим̣ випа̄кам̣ дети, ит̣т̣хапхалабха̄ванийаманаттхам̣ панетам̣ вуттанти ведитаббам̣. айампи хеттха адхиппа̄йо – йади ачетасико анна̄дидхаммо да̄нам̣ бхавеййа, хитачиттена анит̣т̣хам̣ акантам̣ бхесаджджам̣ дентасса нимбабӣджа̄дӣхи вийа нимба̄дайо анит̣т̣хамева пхалам̣ ниббаттеййа. йасма̄ панеттха хитапхаран̣ача̄гачетана̄ да̄нам̣, тасма̄ анит̣т̣хепи деййадхамме да̄нам̣ ит̣т̣хапхаламева хотӣти.

евам̣ парава̄дина̄ четасикадхаммасса да̄набха̄ве патит̣т̣ха̄пите сакава̄дӣ итарена парийа̄йена деййадхаммасса да̄набха̄вам̣ са̄дхетум̣ да̄нам̣ ит̣т̣хапхалам̣ вуттам̣ бхагавата̄тиа̄дима̄ха. парава̄дӣ пана чӣвара̄дӣнам̣ ит̣т̣хавипа̄катам̣ апассанто пат̣иккхипати. суттаса̄дханам̣ парава̄дӣва̄депи йуджджати сакава̄дӣва̄депи, на пана екенаттхена. деййадхаммо ит̣т̣хапхалоти ит̣т̣хапхалабха̄ваматтамева пат̣иккхиттам̣. тасма̄ тена хи на ваттаббанти ит̣т̣хапхалабха̄венева на ваттаббата̄ йуджджати. да̄таббат̣т̣хена пана деййадхаммо да̄намева. диннан̃хи да̄на̄нам̣ сан̇карабха̄вамочанаттхамева айам̣ катха̄ти.

да̄накатха̄ван̣н̣ана̄.