5. вачӣбхедакатха̄ван̣н̣ана̄

326. ида̄ни вачӣбхедакатха̄ на̄ма хоти. таттха йесам̣ ‘‘сота̄паттимаггаккхан̣е пат̣хамам̣ джха̄нам̣ сама̄паннасса дуккханти ва̄ча̄ бхиджджатӣ’’ти ладдхи, сеййатха̄пи етарахи пуббаселийа̄дӣнам̣; те сандха̄йа сама̄паннасса аттхи вачӣбхедоти пуччха̄ сакава̄дисса, ладдхийам̣ т̣хатва̄ пат̣ин̃н̃а̄ парава̄дисса. пуна саббаттха̄ти тайо бхаве сандха̄йа пут̣т̣хо арӯпам̣ сандха̄йа пат̣иккхипати. саббада̄ти ка̄лавасена пут̣т̣хо пат̣хамамаггаккхан̣е пат̣хамаджджха̄никасама̄паттито ан̃н̃ам̣ саббам̣ сама̄паттика̄лам̣ сандха̄йа пат̣иккхипати. саббесам̣ сама̄панна̄нанти пут̣т̣хо локийасама̄паттийо сама̄панне сандха̄йа пат̣иккхипати. саббасама̄паттӣсӯти пут̣т̣хо дутийаджджха̄на̄дикам̣ локуттарам̣ саббан̃ча локийасама̄паттим̣ сандха̄йа пат̣иккхипати.

ка̄йабхедоти абхиккама̄дивасена паваттака̄йавин̃н̃атти. идам̣ ‘‘йа̄ни читта̄ни вачӣвин̃н̃аттим̣ самут̣т̣ха̄пенти, та̄нева ка̄йавин̃н̃аттим̣. евам̣ санте касма̄ ка̄йабхедопи на хотӣ’’ти чоданаттхам̣ пуччхати. итаро ладдхивасена пат̣иккхипати чева пат̣иджа̄на̄ти ча. ида̄ни йади со маггаккхан̣е ‘‘дуккха’’нти ва̄чам̣ бха̄сати, ‘‘самудайо’’тиа̄дикампи бха̄сеййа. йади ва̄ там̣ на бха̄сати, итарампи на бха̄сеййа̄ти чоданаттхам̣ дуккханти джа̄нантотиа̄дайо пан̃ха̄ вутта̄. итаро пана аттано ладдхивасенева пат̣иджа̄на̄ти чева пат̣иккхипати ча. локуттарам̣ пат̣хамаджджха̄нам̣ сама̄панно дуккхадуккханти випассатӣти хисса ладдхи.

328. н̃а̄н̣анти локуттарам̣ чатусаччан̃а̄н̣ам̣. сотанти сотавин̃н̃а̄н̣ам̣ адхиппетам̣, йена там̣ саддам̣ сун̣а̄ти. двиннам̣ пхасса̄нанти сотасампхассаманосампхасса̄нам̣.

329. но вата ре ваттаббети йади ависесена йам̣кин̃чи сама̄паннасса наттхи вачӣбхедо, на ависесена ваттаббам̣ ‘‘сама̄паннасса аттхи вачӣбхедо’’ти. сесаметтха утта̄наттхамева саддхим̣ суттаса̄дхана̄йа. йам̣ панетена ‘‘сикхисса а̄нанда, бхагавато’’ти парийоса̄не суттам̣ а̄бхатам̣, таттха йена сама̄паттичиттена со вачӣбхедо самут̣т̣хито, ка̄йабхедопи тена самут̣т̣ха̄тийева, на ча там̣ локуттарам̣ пат̣хамаджджха̄начиттам̣, тасма̄ аса̄дхаканти.

вачӣбхедакатха̄ван̣н̣ана̄.