10. ниддасаваттхусуттаван̣н̣ана̄

20. дасаме ниддасаваттхӯнӣти ниддаса̄диваттхӯни, ‘‘ниддасо бхиккху, ниббӣсо, ниттим̣со, ниччатта̄лӣсо, ниппан̃н̃а̄со’’ти евам̣ вачанака̄ран̣а̄ни. айам̣ кира пан̃хо титтхийасамайе уппанно. титтхийа̄ хи дасавассака̄ле матам̣ ниган̣т̣хам̣ ниддасоти ваданти. со кира пуна дасавассо на хоти. на кевалан̃ча дасавассо, нававассопи екавассопи на хоти. етенева найена вӣсативасса̄дика̄лепи матам̣ ниган̣т̣хам̣ ‘‘ниббӣсо ниттим̣со ниччатта̄лӣсо ниппан̃н̃а̄со’’ти ваданти. а̄йасма̄ а̄нандо га̄ме вичаранто там̣ катхам̣ сутва̄ виха̄рам̣ гантва̄ бхагавато а̄рочеси. бхагава̄ а̄ха – ‘‘на идам̣, а̄нанда, титтхийа̄нам̣ адхивачанам̣, мама са̄сане кхӣн̣а̄савассетам̣ адхивачанам̣. кхӣн̣а̄саво хи дасавассака̄ле париниббуто пуна дасавассо на хоти. на кевалан̃ча дасавассова, нававассопи…пе… екавассопи. на кевалан̃ча екавассова, ека̄дасама̄сикопи…пе… екама̄сикопи екамухуттикопи на хотийева’’. касма̄? пуна пат̣исандхийа̄ абха̄ва̄. ниббӣса̄дӣсупи есева найо. ити бхагава̄ ‘‘мама са̄сане кхӣн̣а̄савассетам̣ адхивачана’’нти ватва̄ йехи ка̄ран̣ехи ниддасо хоти, та̄ни дассетум̣ имам̣ десанам̣ а̄рабхи.

таттха идха̄ти имасмим̣ са̄сане. сиккха̄сама̄да̄не тиббаччхандо хотӣти сиккха̄ттайапӯран̣е балаваччхандо хоти. а̄йатин̃ча сиккха̄сама̄да̄не авигатапемоти ана̄гате пунадиваса̄дӣсупи сиккха̄пӯран̣е авигатапеменева саманна̄гато хоти. дхамманисантийа̄ти дхамманиса̄мана̄йа. випассана̄йетам̣ адхивачанам̣. иччха̄винайети тан̣ха̄винайе. пат̣исалла̄нети екӣбха̄ве. вӣрийа̄рамбхети ка̄йикачетасикасса вӣрийасса пӯран̣е. сатинепаккети сатийан̃чева нипакабха̄ве. дит̣т̣хипат̣иведхети маггадассане. сесам̣ саббаттха утта̄намева̄ти.

анусайавагго дутийо.