10. сӣхана̄дасуттаван̣н̣ана̄

64. дасаме а̄сабхам̣ т̣ха̄нанти сет̣т̣хам̣ ниччалат̣т̣ха̄нам̣. сӣхана̄данти абхӣтана̄дам̣ памукхана̄дам̣. брахмачакканти сет̣т̣хан̃а̄н̣ачаккам̣ пат̣иведхан̃а̄н̣ан̃чева десана̄н̃а̄н̣ан̃ча. т̣ха̄нан̃ча т̣ха̄натоти ка̄ран̣ан̃ча ка̄ран̣ато. йампӣти йена н̃а̄н̣ена. идампи татха̄гатасса̄ти идампи т̣ха̄на̄т̣т̣ха̄нан̃а̄н̣ам̣ татха̄гатасса татха̄гатабалам̣ на̄ма хоти. евам̣ саббападесу аттхо ведитаббо. каммасама̄да̄на̄нанти сама̄дийитва̄ ката̄нам̣ кусала̄кусалакамма̄нам̣, каммамева ва̄ каммасама̄да̄нам̣. т̣ха̄насо хетусоти паччайато чева хетуто ча. таттха гатиупадхика̄лапайога̄ випа̄касса т̣ха̄нам̣, каммам̣ хету. джха̄навимоккхасама̄дхисама̄паттӣнанти чатуннам̣ джха̄на̄нам̣ ат̣т̣ханнам̣ вимоккха̄нам̣ тин̣н̣ам̣ сама̄дхӣнам̣ наваннам̣ анупуббасама̄паттӣнан̃ча. сам̣килесанти ха̄набха̄гийам̣ дхаммам̣. вода̄нанти висесабха̄гийам̣ дхаммам̣. вут̣т̣ха̄нанти ‘‘вода̄нампи вут̣т̣ха̄нам̣, тамха̄ тамха̄ сама̄дхимха̄ вут̣т̣ха̄нампи вут̣т̣ха̄на’’нти (вибха. 828) евам̣ вуттам̣ пагун̣аджджха̄нан̃чева бхаван̇ганапхаласама̄паттийо ча. хет̣т̣химам̣ хет̣т̣химан̃хи пагун̣аджджха̄нам̣ упаримасса упаримасса падат̣т̣ха̄нам̣ хоти, тасма̄ ‘‘вода̄нампи вут̣т̣ха̄на’’нти вуттам̣. бхаван̇гена пана саббаджджха̄нехи вут̣т̣ха̄нам̣ хоти, пхаласама̄паттийа̄ ниродхасама̄паттито вут̣т̣ха̄нам̣ хоти. там̣ сандха̄йа ‘‘тамха̄ тамха̄ сама̄дхимха̄ вут̣т̣ха̄нампи вут̣т̣ха̄на’’нти вуттам̣. анекавихитантиа̄дӣни висуддхимагге (висуддхи. 2.402) ван̣н̣ита̄ни. а̄саваккхайан̃а̄н̣ам̣ хет̣т̣ха̄ вуттаттхамева. пуримасса̄пи н̃а̄н̣аттайасса виттха̄ракатхам̣ иччхантена маджджхимат̣т̣хакатха̄йа маха̄сӣхана̄даван̣н̣ана̄ (ма. ни. ат̣т̣ха. 1.146 а̄дайо) олокетабба̄. сама̄хитасса̄ти екаггачиттасса. сама̄дхи магготи сама̄дхи етесам̣ н̃а̄н̣а̄нам̣ адхигама̄йа упа̄йо. асама̄дхӣти анекаггабха̄во. куммагготи миччха̄магго. имасмим̣ сутте татха̄гатасса н̃а̄н̣абалам̣ катхитанти.

маха̄вагго чхат̣т̣хо.