7. девата̄вагго

1-3. ана̄га̄мипхаласутта̄диван̣н̣ана̄

65-67. саттамасса пат̣хаме ассаддхийанти ассаддхабха̄вам̣. дуппан̃н̃атанти ниппан̃н̃абха̄вам̣. дутийе пама̄данти сативиппава̄сам̣. татийе а̄бхисама̄ча̄риканти уттамасама̄ча̄рабхӯтам̣ ваттавасена пан̣н̣аттисӣлам̣. секхадхамманти секхапан̣н̣аттисӣлам̣. сӣла̄нӣти чатта̄ри маха̄сӣла̄ни.

4. сан̇ган̣ика̄ра̄масуттаван̣н̣ана̄

68. чатуттхе сан̇ган̣ика̄ра̄моти ган̣асан̇ган̣ика̄ра̄мо. суттантикаган̣а̄дӣсу пана ган̣есу аттано ва̄ париса̄сан̇кха̄те ган̣е раматӣти ган̣а̄ра̄мо. павивекети ка̄йавивеке. читтасса нимиттанти сама̄дхивипассана̄читтасса нимиттам̣ сама̄дхивипассана̄ка̄рам̣. самма̄дит̣т̣хинти випассана̄самма̄дит̣т̣хим̣. сама̄дхинти маггасама̄дхин̃чева пхаласама̄дхин̃ча. сам̣йоджана̄нӣти даса сам̣йоджана̄ни. нибба̄нанти апаччайапаринибба̄нам̣.

5. девата̄суттаван̣н̣ана̄

69. пан̃чаме совачассата̄ти суббачабха̄во. калйа̄н̣амиттата̄ти сучимиттата̄. саттхуга̄равоти саттхари га̄равайутто. еса найо саббаттха.

6. сама̄дхисуттаван̣н̣ана̄

70. чхат̣т̣хе на сантена̄ти паччанӣкакилесехи авӯпасантена. на пан̣ӣтена̄ти на атаппакена. на пат̣иппассаддхиладдхена̄ти килесаппат̣иппассаддхийа̄ аладдхена аппаттена. на екодибха̄ва̄дхигатена̄ти на екаггабха̄вам̣ упагатена.

7. саккхибхаббасуттаван̣н̣ана̄

71. саттаме татра татра̄ти тасмим̣ тасмим̣ висесе. саккхибхаббатанти паччаккхабха̄вам̣. а̄йатанети ка̄ран̣е. ха̄набха̄гийа̄дайо висуддхимагге (висуддхи. 1.39) сам̣ван̣н̣ита̄. асаккаччака̄рӣти на сукатака̄рӣ, на а̄дарака̄рӣ. асаппа̄йака̄рӣти на саппа̄йака̄рӣ, на упака̄рабхӯтадхаммака̄рӣ.

8. баласуттаван̣н̣ана̄

72. ат̣т̣хаме балатанти балабха̄вам̣ тха̄мабха̄вам̣. аса̄таччака̄рӣти на сататака̄рӣ. сесам̣ хет̣т̣ха̄ вуттанайамева.

9-10. таджджха̄насуттадвайаван̣н̣ана̄

73-74. наваме на йатха̄бхӯтам̣ саммаппан̃н̃а̄йа судит̣т̣хо хотӣти ваттхука̄макилесака̄месу а̄дӣнаво на йатха̄сабха̄вато джха̄напан̃н̃а̄йа судит̣т̣хо хоти. дасамам̣ утта̄наттхамева̄ти.

девата̄вагго саттамо.