10. бхаддаджисуттаван̣н̣ана̄

170. дасаме абхибхӯти абхибхавитва̄ т̣хито джет̣т̣хако. анабхибхӯтоти ан̃н̃ехи анабхибхӯто. ан̃н̃адаттхӯти екам̣савачане нипа̄то. дассанавасена дасо, саббам̣ пассатӣти адхиппа̄йо. васаваттӣти саббам̣ джанам̣ васе ваттети. йатха̄ пассатоти ит̣т̣ха̄рамман̣ам̣ ва̄ хоту анит̣т̣ха̄рамман̣ам̣ ва̄, йена̄ка̄рена там̣ пассантасса. анантара̄ а̄сава̄нам̣ кхайо хотӣти анантара̄йева арахаттам̣ уппаджджати. йатха̄ сун̣атоти еттха̄пи есева найо. атха ва̄ йам̣ чаккхуна̄ рӯпам̣ дисва̄ нирантарамева випассанам̣ пат̣т̣хапетва̄ арахаттам̣ па̄пун̣а̄ти, там̣ тасса арахаттам̣ чаккхувин̃н̃а̄н̣а̄нантарам̣ на̄ма хоти. там̣ сандха̄йа вуттам̣ – идам̣ дассана̄нам̣ агганти. дутийападепи есева найо.

йатха̄ сукхитасса̄ти йена маггасукхена сукхитасса. анантара̄ а̄сава̄нам̣ кхайо хотӣти саманантарамева арахаттам̣ уппаджджати. идам̣ сукха̄нам̣ агганти идам̣ маггасукхам̣ сукха̄нам̣ уттамам̣. йатха̄ сан̃н̃исса̄ти идха̄пи маггасан̃н̃а̄ва адхиппета̄. йатха̄ бхӯтасса̄ти йасмим̣ бхаве йасмим̣ аттабха̄ве т̣хитасса. анантара̄ти анантара̄йена арахаттам̣ уппаджджати. идам̣ бхава̄нам̣ агганти айам̣ паччхимо аттабха̄во бхава̄нам̣ аггам̣ на̄ма. атха ва̄ йатха̄ бхӯтасса̄ти йехи кхандхехи маггаккхан̣е бхӯтасса виджджама̄насса. анантара̄ а̄сава̄нам̣ кхайо хотӣти магга̄нантарамева пхалам̣ уппаджджати. идам̣ бхава̄нам̣ агганти идам̣ маггаккхан̣е кхандхапан̃чакам̣ бхава̄нам̣ аггам̣ на̄ма̄ти.

а̄гха̄тавагго дутийо.