5. бра̄хман̣асаччасуттаван̣н̣ана̄

185. пан̃чаме бра̄хман̣асачча̄нӣти бра̄хман̣а̄нам̣ сачча̄ни татха̄ни. со тена на саман̣оти ман̃н̃атӣти со кхӣн̣а̄саво тена саччена ‘‘ахам̣ саман̣о’’ти тан̣ха̄ма̄надит̣т̣хӣхи на ман̃н̃ати. сесападесупи есева найо. йадева таттха саччам̣, тадабхин̃н̃а̄йа̄ти йам̣ таттха ‘‘саббе па̄н̣а̄ аваджджха̄’’ти пат̣ипаттийа̄ саччам̣ татхам̣ авипарӣтам̣. имина̄ вачӣсаччам̣ аббхантарам̣ катва̄ параматтхасаччам̣ нибба̄нам̣ дассети. тадабхин̃н̃а̄йа̄ти там̣ убхайампи абхивисит̣т̣ха̄йа пан̃н̃а̄йа джа̄нитва̄. ануддайа̄йа анукампа̄йа пат̣ипанно хотӣти ануддайаттха̄йа ча анукампаттха̄йа ча йа̄ пат̣ипада̄, там̣ пат̣ипанно хоти, пӯретва̄ т̣хитоти аттхо. сесапат̣ипада̄супи есева найо.

саббе ка̄ма̄ти саббе ваттхука̄макилесака̄ма̄. ити вадам̣ бра̄хман̣о саччама̄ха̄ти евампи ваданто кхӣн̣а̄савабра̄хман̣о саччамева а̄ха. саббе бхава̄ти ка̄мабхава̄дайо тайопи. на̄хам̣ квачанӣти еттха пана чатуккот̣икасун̃н̃ата̄ катхита̄. айан̃хи ‘‘на̄хам̣ квачанӣ’’ти квачи атта̄нам̣ на пассати, кассачи кин̃чанатасминти аттано атта̄нам̣ кассачи парасса кин̃чанабха̄ве упанетаббам̣ на пассати, бха̄тит̣т̣ха̄не бха̄тарам̣, саха̄йат̣т̣ха̄не саха̄йам̣, париккха̄рат̣т̣ха̄не ва̄ париккха̄рам̣ ман̃н̃итва̄ упанетаббам̣ на пассатӣти аттхо. на ча мама квачанӣти еттха мамасаддам̣ та̄ва т̣хапетва̄ ‘‘на ча квачани парасса ча атта̄нам̣ квачи на пассатӣ’’ти айаматтхо. ида̄ни ‘‘мамасаддам̣ а̄харитва̄ мама кисмин̃чи кин̃чанам̣ наттхӣ’’ти со парасса атта̄ мама кисмин̃чи кин̃чанабха̄ве аттхӣти на пассати, аттано бха̄тит̣т̣ха̄не бха̄тарам̣, саха̄йат̣т̣ха̄не саха̄йам̣, париккха̄рат̣т̣ха̄не ва̄ париккха̄ранти кисмин̃чи т̣ха̄не парасса атта̄нам̣ имина̄ кин̃чанабха̄вена упанетаббам̣ на пассатӣти аттхо. евамайам̣ йасма̄ нева каттхачи атта̄нам̣ пассати, на там̣ парасса кин̃чанабха̄ве упанетаббам̣ пассати, на парасса атта̄нам̣ пассати, на парасса атта̄нам̣ аттано кин̃чанабха̄ве упанетаббам̣ пассатӣти. ити вадам̣ бра̄хман̣оти евам̣ чатуккот̣икам̣ сун̃н̃атам̣ вадантопи кхӣн̣а̄савабра̄хман̣о тасса̄ пат̣ипада̄йа самма̄ пат̣ивиддхатта̄ саччамева а̄ха, на муса̄ти саббесупи ва̄ресу ман̃н̃ана̄нам̣ пахӣнатта̄йева на ман̃н̃атӣти ча аттхо ведитаббо. а̄кин̃чан̃н̃ам̣йева пат̣ипаданти кин̃чанабха̄вавирахитам̣ ниппалибодхам̣ ниггахан̣амева пат̣ипадам̣ пат̣ипанно хоти пӯретва̄ т̣хито.

има̄ни кхо парибба̄джака̄ чатта̄ри бра̄хман̣асачча̄ни майа̄ сайам̣ абхин̃н̃а̄ саччхикатва̄ паведита̄нӣти йа̄ни тумхе бхова̄дибра̄хман̣а̄нам̣ сачча̄ни вадетха, техи ан̃н̃а̄ни майа̄ има̄ни ба̄хитапа̄пабра̄хман̣асса чатта̄ри сачча̄ни чатӯхи маггехи сол̣асавидхена киччена джа̄нитва̄ паччаккхам̣ катва̄ паведита̄ни десита̄ни джотита̄нӣти аттхо. ити имасмим̣ сутте чатӯсупи т̣ха̄несу кхӣн̣а̄савасса вачӣсаччамева катхитанти.