3. маха̄кот̣т̣хикасуттаван̣н̣ана̄

173. татийе пхасса̄йатана̄нанти пхасса̄кара̄нам̣, пхассасса уппаттит̣т̣ха̄на̄нанти аттхо. аттхан̃н̃ам̣ кин̃чӣти етесу асесато нируддхесу тато парам̣ кочи аппаматтакопи килесо аттхӣти пуччхати. наттхан̃н̃ам̣ кин̃чӣти идха̄пи ‘‘аппаматтакопи килесо наттхӣ’’ти пуччхати. сесадвайепи есева найо. име пана чатта̄ропи пан̃хе сассатуччхедаекаччасассатаамара̄виккхепавасена пуччхати. тенасса тхеро пуччхитапуччхитам̣ пат̣иба̄ханто ма̄ хеванти а̄ха. еттха хиити нипа̄таматтам̣, евам̣ ма̄ бхан̣ӣти аттхо. аттӯпаладдхивасенева ‘‘аттхан̃н̃ам̣ кин̃чи ан̃н̃о кочи атта̄ на̄ма аттхӣ’’ти сассата̄диа̄ка̄рена пуччхати. ким̣ панеса аттӯпаладдхикоти? на аттӯпаладдхико. евам̣ладдхико пана таттхеко бхиккху нисинно, со пуччхитум̣ на саккоти. тасса ладдхим̣ виссаджджа̄панаттхам̣ евам̣ пуччхати. йепи ча ана̄гате евам̣ладдхика̄ бхависсанти, тесам̣ ‘‘буддхака̄лепесо пан̃хо маха̄са̄вакехи виссаджджито’’ти вачанока̄супаччхеданаттхам̣ пуччхатийева.

аппапан̃чам̣ папан̃четӣти на папан̃четаббат̣т̣ха̄не папан̃чам̣ кароти, ана̄чаритаббам̣ маггам̣ чарати. та̄вата̄ папан̃часса гатӣти йаттака̄ чханнам̣ пхасса̄йатана̄нам̣ гати, таттака̄ва тан̣ха̄дит̣т̣хима̄наппабхедасса папан̃часса гати. чханнам̣, а̄вусо, пхасса̄йатана̄нам̣ асесавира̄ганиродха̄ папан̃чаниродхо папан̃чавӯпасамоти етесу чхасу а̄йатанесу саббасо нируддхесу папан̃ча̄пи нируддха̄ва хонти, вӯпасанта̄ва хонтӣти аттхо. а̄руппе пана путхуджджанадевата̄нам̣ кин̃ча̄пи пан̃ча пхасса̄йатана̄ни нируддха̄ни, чхат̣т̣хасса пана анируддхатта̄ тайопи папан̃ча̄ аппахӣна̄ва. апича пан̃чавока̄рабхававасенева пан̃хо катхитоти. чатуттхе имина̄ва найена аттхо ведитаббо.