1. паттакаммасуттаван̣н̣ана̄

61. дутийасса пат̣хаме анит̣т̣хапат̣иккхепена ит̣т̣ха̄. мане каманти пависантӣти канта̄. манам̣ аппа̄йанти павад̣д̣хентӣти мана̄па̄. дуллабха̄ти парамадуллабха̄. бхога̄ти бхун̃джитабба̄ рӯпа̄дайо висайа̄. сахадхаммена̄ти дхамменева саддхим̣ уппаджджанту, ма̄ дхаммӯпагха̄там̣ катва̄ адхаммена̄ти. атхава̄ сахадхаммена̄ти сака̄ран̣ена, тена тена сена̄патисет̣т̣хит̣т̣ха̄на̄дика̄ран̣ена саддхим̣йева уппаджджантӯти аттхо. йасоти парива̄расампатти. саха н̃а̄тӣбхӣти н̃а̄такехи саддхим̣. саха упаджджха̄йехӣти сукхадуккхесу упаниджджха̄йитаббатта̄ упаджджха̄йасан̇кха̄техи сандит̣т̣хасамбхаттехи саддхим̣.

акиччам̣ каротӣти ака̄таббам̣ кароти. киччам̣ апара̄дхетӣти каттаббайуттакам̣ киччам̣ акаронто там̣ апара̄дхети на̄ма. дхам̣сатӣти патати париха̄йати. абхиджджха̄висамалобханти абхиджджха̄сан̇кха̄там̣ висамалобхам̣. паджахатӣти нудати нӣхарати. маха̄пан̃н̃оти махантапан̃н̃о. путхупан̃н̃оти путхулапан̃н̃о. а̄па̄тадасоти там̣ там̣ аттхам̣ а̄па̄тети тамева пассати, сукхумамписса аттхаджа̄там̣ а̄па̄там̣ а̄гаччхатийева̄ти аттхо.

ут̣т̣ха̄навӣрийа̄дхигатехӣти ут̣т̣ха̄насан̇кха̄тена вӣрийена адхигатехи. ба̄ха̄балапаричитехӣти ба̄ха̄балена паричитехи вад̣д̣хитехи. седа̄ваккхиттехӣти аваккхиттаседехи, седам̣ мун̃читва̄ ва̄йа̄мена пайогена самадхигатехӣти аттхо. дхаммикехӣти дхаммайуттехи. дхаммаладдхехӣти дасакусалакаммапатхадхамме акопетва̄ ладдхехи. паттакамма̄нӣти йуттакамма̄ни ануччхавикакамма̄ни. сукхетӣти сукхитам̣ кароти. пӣн̣етӣти пӣн̣итам̣ баласампаннам̣ кароти. т̣ха̄нагатам̣ хотӣти ка̄ран̣агатам̣ хоти. ким̣ пана танти? чатӯсу паттакаммесу екам̣ бхогехи каттаббакаммам̣ бхогаджа̄тамева т̣ха̄нагатам̣. паттагатанти йуттаппаттат̣т̣ха̄нагатам̣. а̄йатанасо парибхуттанти ка̄ран̣енева парибхуттам̣ бхогаджа̄там̣ хоти.

парийодха̄йа сам̣ваттатӣти пидахитва̄ ваттати. йатха̄ аггиа̄дӣхи уппанна̄су а̄пада̄су, евам̣ а̄диттагеханибба̄пана̄дӣнам̣ аттха̄йа дханапаричча̄гам̣ катва̄ та̄сам̣ а̄пада̄нам̣ маггам̣ пидахати нива̄рети. соттхим̣ атта̄нам̣ каротӣти нирупаддавам̣ кхемам̣ атта̄нам̣ кароти. н̃а̄тибалинти н̃а̄така̄нам̣ балим̣. атитхибалинти а̄гантука̄нам̣ балим̣. пуббапетабалинти паралокагата̄нам̣ н̃а̄така̄нам̣ балим̣. ра̄джабалинти ран̃н̃о каттаббайуттакам̣ ра̄джабалим̣. девата̄балинти девата̄нам̣ каттаббабалим̣. саббаметам̣ тесам̣ тесам̣ йатха̄нуччхавикавасена да̄таббада̄насса адхивачанам̣.

кхантисорачче нивит̣т̣ха̄ти адхива̄санаккхантийан̃ча сусӣлата̄йа ча нивит̣т̣ха̄. екаматта̄нам̣ даментӣти екам̣ аттанова аттабха̄вам̣ индрийадамена даменти. саментӣти аттано читтам̣ килесавӯпасаманена саменти. паринибба̄пентӣти килесапаринибба̄ненева паринибба̄пенти. уддхаггикантиа̄дӣсу упарӯпарибхӯмӣсу пхалада̄навасена уддхамаггамасса̄ти уддхаггика̄. саггасса хита̄ти татрупапаттиджананато соваггика̄. ниббаттаниббаттат̣т̣ха̄не сукхова випа̄ко асса̄ти сукхавипа̄ка̄. сут̣т̣ху агга̄нам̣ диббаван̣н̣а̄дӣнам̣ дасаннам̣ висеса̄нам̣ ниббаттанато саггасам̣ваттаника̄, еварӯпам̣ даккхин̣ам̣ патит̣т̣ха̄петӣти аттхо.

арийадхамме т̣хитоти пан̃часӣладхамме патит̣т̣хито. печча сагге памодатӣти паралокам̣ гантва̄ йаттха сагге пат̣исандхим̣ ган̣ха̄ти, таттха модати. сота̄паннасакада̄га̄мино ва̄ хонту ана̄га̄мӣ ва̄, саббесам̣ айам̣ пат̣ипада̄ лаббхатева̄ти.