1. сама̄дхибха̄вана̄суттаван̣н̣ана̄

41. пан̃чамасса пат̣хаме н̃а̄н̣адассанаппат̣ила̄бха̄йа̄ти диббачаккхун̃а̄н̣адассанасса пат̣ила̄бха̄йа. дива̄сан̃н̃ам̣ адхит̣т̣ха̄тӣти дива̄ти евам̣ сан̃н̃ам̣ адхит̣т̣ха̄ти. йатха̄ дива̄ татха̄ раттинти йатха̄ дива̄ а̄локасан̃н̃а̄ манаси ката̄, татхева там̣ раттимпи манаси кароти. дутийападепи есева найо. саппабха̄санти диббачаккхун̃а̄н̣обха̄сена сахобха̄сам̣. кин̃ча̄пи а̄локасадисам̣ катам̣, аттхо панеттха на евам̣ саллаккхетаббо. диббачаккхун̃а̄н̣а̄локо хи идха̄дхиппето.

видита̄ти па̄кат̣а̄ хутва̄. катхам̣ пана ведана̄ видита̄ уппаджджанти, видита̄ аббхаттхам̣ гаччхантӣти? идха бхиккху ваттхум̣ паригган̣ха̄ти, а̄рамман̣ам̣ паригган̣ха̄ти. тасса париггахитаваттха̄рамман̣ата̄йа та̄ ведана̄ ‘‘евам̣ уппаджджитва̄ евам̣ т̣хатва̄ евам̣ нируджджхантӣ’’ти видита̄ уппаджджанти, видита̄ тит̣т̣ханти, видита̄ аббхаттхам̣ гаччханти на̄ма. сан̃н̃а̄витаккесупи есева найо.

удайаббайа̄нупассӣти удайан̃ча вайан̃ча пассанто. ити рӯпанти евам̣ рӯпам̣ еттакам̣ рӯпам̣ на ито парам̣ рӯпам̣ аттхӣти. ити рӯпасса самудайоти евам̣ рӯпасса уппа̄до. аттхан̇гамоти пана бхедо адхиппето. ведана̄дӣсупи есева найо. идан̃ча пана метам̣, бхиккхаве, сандха̄йа бха̄ситанти, бхиккхаве, йам̣ майа̄ етам̣ пун̣н̣акапан̃хе ‘‘сан̇кха̄йа локасми’’нтиа̄ди бха̄ситам̣, там̣ идам̣ пхаласама̄паттим̣ сандха̄йа бха̄ситанти аттхо.

таттха сан̇кха̄йа̄ти н̃а̄н̣ена джа̄нитва̄. локасминти сатталоке. паропара̄нӣти учча̄вача̄ни уттама̄дхама̄ни. ин̃джитанти чалитам̣. наттхи кухин̃чи локети локасмим̣ каттхачи екаккхандхепи ека̄йатанепи екадха̄туйа̄пи ека̄рамман̣епи наттхи. сантоти паччанӣкакилесавӯпасамена санто. видхӯмоти кодхадхӯмена вигатадхӯмо. еваметтха суттанте маггекаггатампи катхетва̄ га̄тха̄йа пхаласама̄паттийева катхита̄ти.