9. уджджайасуттаван̣н̣ана̄

39. наваме сан̇гха̄там̣ а̄паджджантӣти вадхам̣ маран̣ам̣ а̄паджджанти. ниччада̄нанти сала̄кабхаттам̣. анукулайан̃н̃анти амха̄кам̣ питӯхи пита̄махехи диннатта̄ евам̣ кула̄нукулавасена йаджитаббам̣, да̄таббанти аттхо. ассамедхантиа̄дӣсу ассаметтха медхантӣти ассамедхо, двӣхи парийан̃н̃ехи йаджитаббасса екавӣсатийӯпасса т̣хапетва̄ бхӯмин̃ча пурисе ча авасесасаббавибхавадаккхин̣асса йан̃н̃ассетам̣ адхивачанам̣. пурисаметтха медхантӣти пурисамедхо, чатӯхи парийан̃н̃ехи йаджитаббасса саддхим̣ бхӯмийа̄ ассамедхе вуттавибхавадаккхин̣асса йан̃н̃ассетам̣ адхивачанам̣. саммаметтха па̄сантӣти самма̄па̄со, дивасе дивасе саммам̣ кхипитва̄ тасса патитока̄се ведим̣ катва̄ сам̣ха̄римехи йӯпа̄дӣхи сарассатинадийа̄ нимуггока̄сато пабхути пат̣иломам̣ гаччхантена йаджитаббасса саббайа̄гассетам̣ адхивачанам̣. ва̄джаметтха пивантӣти ва̄джапеййам̣, екена парийан̃н̃ена саттарасахи пасӯхи йаджитаббасса белувайӯпасса саттарасакадаккхин̣асса йан̃н̃ассетам̣ адхивачанам̣. наттхи еттха аггал̣а̄ти нираггал̣о. навахи парийан̃н̃ехи йаджитаббасса саддхим̣ бхӯмийа̄ пурисехи ча ассамедхе вуттавибхавадаккхин̣асса саббамедхапарийа̄йана̄масса ассамедхавикаппассетам̣ адхивачанам̣. маха̄рамбха̄ти маха̄кичча̄ маха̄каран̣ӣйа̄. апича па̄н̣а̄типа̄тасама̄рамбхасса махантата̄йапи маха̄рамбха̄йева. на те хонти махаппхала̄ти еттха ниравасесаттхе са̄васесарӯпанам̣ катам̣. тасма̄ ит̣т̣хапхалена ниппхала̄ва хонтӣти аттхо. идан̃ча па̄н̣а̄типа̄тасама̄рамбхамева сандха̄йа вуттам̣. йам̣ пана таттха антарантара̄ да̄нам̣ диййати, там̣ имина̄ сама̄рамбхена упахататта̄ махаппхалам̣ на хоти, мандапхалам̣ хотӣти аттхо. хан̃н̃арети хан̃н̃анти. йаджанти анукулам̣ сада̄ти йе ан̃н̃е анукулам̣ йаджанти, пуббапурисехи йит̣т̣хатта̄ паччхимапуриса̄пи йаджантӣти аттхо. сеййо хотӣти висесова хоти. на па̄пийоти па̄пам̣ кин̃чи на хоти.