5. пан̣д̣итасуттаван̣н̣ана̄

45. пан̃чаме пан̣д̣итапан̃н̃атта̄нӣти пан̣д̣итехи пан̃н̃атта̄ни катхита̄ни пасаттха̄ни. саппурисапан̃н̃атта̄нӣти саппурисехи маха̄пурисехи пан̃н̃атта̄ни катхита̄ни пасаттха̄ни. ахим̣са̄ти карун̣а̄ чева карун̣а̄пуббабха̄го ча. сам̣йамоти сӣласам̣йамо. дамоти индрийасам̣варо, упосатхавасена ва̄ аттадаманам̣, пун̣н̣ова̄де (ма. ни. 3.395 а̄дайо; сам̣. ни. 4.88 а̄дайо) дамоти вутта̄ кхантипи а̄л̣аваке (сам̣. ни. 1.246; су. ни. 183 а̄дайо) вутта̄ пан̃н̃а̄пи имасмим̣ сутте ват̣т̣атийева. ма̄та̄питу упат̣т̣ха̄нанти ма̄та̄питӯнам̣ раккханам̣ гопанам̣ пат̣иджагганам̣. санта̄нанти ан̃н̃аттха буддхапаччекабуддхаарийаса̄вака̄ санто на̄ма, идха пана ма̄та̄питуупат̣т̣ха̄ка̄ адхиппета̄. тасма̄ уттамат̣т̣хена санта̄нам̣, сет̣т̣хачарийат̣т̣хена брахмача̄рӣнам̣. идам̣ ма̄та̄питуупат̣т̣ха̄нам̣ саббхи упан̃н̃а̄танти еваметтха аттхо дат̣т̣хаббо. сатам̣ ета̄ни т̣ха̄на̄нӣти санта̄нам̣ уттамапуриса̄нам̣ ета̄ни т̣ха̄на̄ни ка̄ран̣а̄ни. арийо дассанасампанноти идха имесам̣йева тин̣н̣ам̣ т̣ха̄на̄нам̣ ка̄ран̣ена арийо чева дассанасампанно ча ведитаббо, на буддха̄дайо на сота̄панна̄. атха ва̄ сатам̣ ета̄ни т̣ха̄на̄нӣти ма̄тупат̣т̣ха̄нам̣ питупат̣т̣ха̄нанти ета̄ни т̣ха̄на̄ни санта̄нам̣ уттамапуриса̄нам̣ ка̄ран̣а̄нӣти евам̣ ма̄та̄питуупат̣т̣ха̄кавасена имисса̄ га̄тха̄йа аттхо ведитаббо. ма̄та̄питуупат̣т̣ха̄койева хи идха ‘‘арийо дассанасампанно’’ти вутто. са локам̣ бхаджате сиванти со кхемам̣ девалокам̣ гаччхатӣти.