6. сӣлавантасуттаван̣н̣ана̄

46. чхат̣т̣хе тӣхи т̣ха̄нехӣти тӣхи ка̄ран̣ехи. ка̄йена̄тиа̄дӣсу бхиккхӯ а̄гаччханте дисва̄ паччуггаманам̣ каронта̄ гаччханте анугаччханта̄ а̄санаса̄ла̄йа саммаджджанаупалепана̄дӣни каронта̄ а̄сана̄ни пан̃н̃а̄пента̄ па̄нӣйам̣ паччупат̣т̣ха̄пента̄ ка̄йена пун̃н̃ам̣ пасаванти на̄ма. бхиккхусан̇гхам̣ пин̣д̣а̄йа чарантам̣ дисва̄ ‘‘йа̄гум̣ детха, бхаттам̣ детха, саппинаванӣта̄дӣни детха, гандхапуппха̄дӣхи пӯджетха, упосатхам̣ упавасатха, дхаммам̣ сун̣а̄тха, четийам̣ вандатха̄’’тиа̄дӣни ваданта̄ ва̄ча̄йа пун̃н̃ам̣ пасаванти на̄ма. бхиккхӯ пин̣д̣а̄йа чаранте дисва̄ ‘‘лабхантӯ’’ти чинтента̄ манаса̄ пун̃н̃ам̣ пасаванти на̄ма. пасавантӣти пат̣илабханти. пун̃н̃ам̣ панеттха локийалокуттарамиссакам̣ катхитам̣.