1. саммукхӣбха̄васуттаван̣н̣ана̄

41. пан̃чамасса пат̣хаме саммукхӣбха̄ва̄ти саммукхӣбха̄вена, виджджама̄ната̄йа̄ти аттхо. пасаватӣти пат̣илабхати. саддха̄йа саммукхӣбха̄ва̄ти йади хи саддха̄ на бхавеййа, деййадхаммо на бхавеййа, даккхин̣еййасан̇кха̄та̄ пат̣игга̄хакапуггала̄ на бхавеййум̣, катхам̣ пун̃н̃акаммам̣ кареййа. тесам̣ пана саммукхӣбха̄вена сакка̄ ка̄тунти тасма̄ ‘‘саддха̄йа саммукхӣбха̄ва̄’’тиа̄дима̄ха. еттха ча две дхамма̄ сулабха̄ деййадхамма̄ чева даккхин̣еййа̄ ча, саддха̄ пана дуллабха̄. путхуджджанасса хи саддха̄ атха̄вара̄ падава̄рена на̄на̄ хоти, тенева маха̄моггалла̄насадисопи аггаса̄вако па̄т̣ибхого бхавитум̣ асакконто а̄ха – ‘‘двиннам̣ кхо те ахам̣, а̄вусо, дхамма̄нам̣ па̄т̣ибхого бхога̄нан̃ча джӣвитасса ча, саддха̄йа пана твам̣йева па̄т̣ибхого’’ти (уда̄. 18).