3. пин̣д̣апа̄тикан̇гакатха̄ван̣н̣ана̄

26. атирекала̄бханти ‘‘пин̣д̣ийа̄лопабходжанам̣ нисса̄йа̄’’ти (маха̄ва. 73, 128) евам̣ вуттабхиккха̄ха̄рала̄бхато атирекала̄бхам̣, сан̇гхабхатта̄динти аттхо. сакаласса сан̇гхасса да̄таббабхаттам̣ сан̇гхабхаттам̣. катипайе бхиккхӯ уддиситва̄ да̄таббабхаттам̣ уддесабхаттам̣. екасмим̣ паккхе екадивасам̣ да̄таббабхаттам̣ паккхикам̣. упосатхе упосатхе да̄таббабхаттам̣ упосатхикам̣. пат̣ипададивасе да̄таббабхаттам̣ па̄т̣ипадикам̣. виха̄рам̣ уддисса да̄таббабхаттам̣ виха̄рабхаттам̣. дхурагехе ева т̣хапетва̄ да̄таббабхаттам̣ дхурабхаттам̣. га̄мава̄сӣа̄дӣхи ва̄рена да̄таббабхаттам̣ ва̄ракабхаттам̣. ‘‘сан̇гхабхаттам̣ ган̣хатха̄тиа̄дина̄’’ти а̄ди-саддена уддесабхатта̄дим̣ сан̇ган̣ха̄ти. са̄дитум̣ ват̣т̣антӣти бхиккха̄парийа̄йена вуттатта̄. бхесаджджа̄дипат̣исам̣йутта̄ нира̄мисасала̄ка̄. йа̄вака̄ликаваджджа̄ти ча ваданти. виха̄ре паккабхаттампӣти упа̄сака̄ идхева бхаттам̣ пачитва̄ ‘‘саббесам̣ аййа̄нам̣ дасса̄ма̄’’ти виха̄рейева бхаттам̣ сампа̄денти, там̣ пин̣д̣апа̄тика̄нампи ват̣т̣ати. а̄харитва̄ти паттам̣ гахетва̄ гехато а̄нетва̄. там̣ дивасам̣ нисӣдитва̄ти ‘‘ма̄, бханте, пин̣д̣а̄йа чариттха, виха̄рейева бхиккха̄ а̄нӣйатӣ’’ти ваданта̄нам̣ сампат̣иччханена там̣ дивасам̣ нисӣдитва̄. серивиха̄расукханти апара̄йаттавиха̄рита̄сукхам̣. арийавам̣соти арийавам̣сасуттапат̣исам̣йутта̄ (дӣ. ни. 3.309; а. ни. 4.28) дхаммакатха̄. дхаммарасанти дхаммӯпасан̃хитам̣ па̄моджджа̄дирасам̣.

джан̇гхабалам̣ нисса̄йа пин̣д̣апарийесанато косаджджаниммадданата̄. ‘‘йатха̄пи бхамаро пуппха’’нтиа̄дина̄ (дха. па. 49; нетти. 123) вуттавидхина̄ а̄ха̄рапарийесанато парисуддха̄джӣвата̄. ниччам̣ антарагхарам̣ пависантассева суппат̣иччханнагамана̄дайо секхийадхамма̄ сампаджджантӣти секхийапат̣ипаттипӯран̣ам̣. пат̣иггахан̣е маттан̃н̃ута̄йа, сам̣сат̣т̣хавиха̄ра̄бха̄вато ча апарапосита̄. куле куле аппакааппакапин̣д̣агахан̣ена пара̄нуггахакирийа̄. антима̄йа джӣвика̄йа ават̣т̣ха̄нена ма̄наппаха̄нам̣. вуттан̃хетам̣ ‘‘антамидам̣, бхиккхаве, джӣвика̄нам̣, йадидам̣ пин̣д̣олйа’’нтиа̄ди (итиву. 91; сам̣. ни. 3.80). миссакабхаттена йа̄панато расатан̣ха̄нива̄ран̣ам̣. нимантана̄сампат̣иччханато ган̣абходжана̄дисиккха̄падехи ана̄паттита̄.

аппат̣ихатавуттита̄йа чатӯсупи диса̄су ваттанат̣т̣хена ча̄туддисо. а̄джӣвасса висуджджхатӣти а̄джӣво асса висуджджхати. аттабхарасса̄ти аппа̄наваджджасулабхарӯпехи паччайехи аттано бхаран̣ато аттабхарасса. тато ева екавиха̄рита̄йа саддхивиха̄рика̄дӣнампи ан̃н̃есам̣ апосанато анан̃н̃апосино. пададвайена̄пи ка̄йапариха̄рикена чӣварена куччхипариха̄рикена пин̣д̣апа̄тена вичаран̣ато саллахукавуттитам̣, субхаратам̣, парамааппиччхатам̣, сантут̣т̣хин̃ча дассети. дева̄пи пихайанти та̄диноти та̄дисасса бхусам̣ ативийа сантака̄йавачӣманокаммата̄йа упасантасса парамена сатинепаккена саманна̄гамато саббака̄лам̣ сатимато пин̣д̣апа̄тикасса бхиккхусса сакка̄дайо дева̄пи пихайанти паттхенти. тасса сӣла̄дигун̣есу бахума̄нам̣ уппа̄дента̄ а̄дарам̣ джаненти, пагева манусса̄. саче со ла̄бхасакка̄расилокасанниссито на хоти, тадабхикан̇кхӣ на хотӣти аттхо.

ити пин̣д̣апа̄тикан̇гакатха̄ван̣н̣ана̄.