11. соса̄никан̇гакатха̄ван̣н̣ана̄

34. на суса̄нанти асуса̄нам̣. ан̃н̃аттхо на-ка̄ро, суса̄налаккхан̣арахитам̣ васанат̣т̣ха̄нанти адхиппа̄йо. на таттха̄ти ‘‘суса̄на’’нти ваваттхапитаматте т̣ха̄не на васитаббам̣. на хи на̄маматтена суса̄налаккхан̣ам̣ сиджджхати. тена̄ха ‘‘на хӣ’’тиа̄ди. джха̄питака̄лато пана пат̣т̣ха̄йа…пе… суса̄намева чхавена сайитаматта̄йа суса̄налаккхан̣аппаттито. чхавасайанам̣ хи ‘‘суса̄на’’нти вуччати.

соса̄никена на̄ма аппакиччена саллахукавуттина̄ бхавитаббанти дассетум̣ ‘‘тасмим̣ пана васантена̄’’тиа̄ди вуттам̣. гаруканти дуппариха̄рам̣. тамева хи дуппариха̄рабха̄вам̣ дассетум̣ ‘‘тасма̄’’тиа̄ди вуттам̣. таттха уппаннапариссайавигха̄таттха̄йа̄ти ‘‘суса̄нам̣ на̄ма мануссара̄хассеййака’’нти чора̄ катакамма̄пи акатакамма̄пи осаранти, таттха чоресу бхан̣д̣аса̄мике дисва̄ бхиккхусамӣпе бхан̣д̣ам̣ чхад̣д̣етва̄ пала̄тесу манусса̄ бхиккхум̣ ‘‘чоро’’ти гахетва̄ потхеййум̣, тасма̄ виха̄ре сан̇гхаттхерам̣ ва̄ гочарага̄ме ран̃н̃а̄ нийуттам̣ ра̄джайуттакам̣ ва̄ аттано соса̄никабха̄вам̣ джа̄на̄петва̄ йатха̄ та̄дисо, ан̃н̃о ва̄ париссайо на хоти, татха̄ аппаматтена васитаббам̣. чан̇камантасса йада̄ а̄л̣аханам̣ абхимукхам̣ на хоти, тада̄пи сам̣вегаджананаттхам̣ таттха дит̣т̣хи виссаджджетабба̄ти дассетум̣ ‘‘аддхаккхикена а̄л̣аханам̣ олокентена̄’’ти вуттам̣.

уппатхамаггена гантаббам̣ аттано соса̄никабха̄васса апа̄кат̣абха̄ваттхам̣. а̄рамман̣анти тасмим̣ суса̄не ‘‘айам̣ ваммико, айам̣ руккхо, айам̣ кха̄н̣уко’’тиа̄дина̄ дива̄йева а̄рамман̣ам̣ ваваттхапетаббам̣. бхайа̄наканти бхайаджанакам̣ ваммика̄дим̣. кеначи лед̣д̣упа̄са̄н̣а̄дина̄ а̄санне вичарантӣти на пахаритабба̄. тилапит̣т̣хам̣ вуччати палалам̣. ма̄самиссам̣ бхаттам̣ ма̄сабхаттам̣. гул̣а̄дӣти а̄ди-саддена тиласам̣гул̣ика̄дигханапӯван̃ча сан̇ган̣ха̄ти. кулагехам̣ на пависитаббанти петадхӯмена ва̄ситатта̄, писа̄ча̄нубандхатта̄ ча кулагехасса аббхантарам̣ на пависитаббам̣. девасикам̣ чхавад̣а̄хо дхувад̣а̄хо. матан̃а̄така̄нам̣ таттха гантва̄ девасикам̣ роданам̣ дхувароданам̣. вуттанайена̄ти ‘‘джха̄питака̄лато пана пат̣т̣ха̄йа̄’’ти вуттанайена. ‘‘паччхимайа̄ме пат̣иккамитум̣ ват̣т̣атӣ’’ти иччхитатта̄ ‘‘суса̄нам̣ агатадивасе’’ти ан̇гуттарабха̄н̣ака̄.

суса̄не ниччака̄лам̣ сиватхикадассанена маран̣ассатипат̣ила̄бхо. тато ева аппама̄давиха̄рита̄. таттха чхад̣д̣итасса матакал̣еварасса дассанена асубханимитта̄дхигамо. тато ева ка̄мара̄гавиноданам̣. бахулам̣ сарӣрасса асучидуггандхаджегуччхабха̄васаллаккхан̣ато абхин̣хам̣ ка̄йасабха̄вадассанам̣. тато маран̣ассатипат̣ила̄бхато ча сам̣вегабахулата̄. бйа̄дхика̄нам̣, джара̄джин̣н̣а̄нан̃ча мата̄нам̣ таттха дассанена а̄рогйайоббанаджӣвитамадаппаха̄нам̣. кхуддакасса, махато ча бхайасса абхибхаванато бхайабхеравасаханата̄. сам̣виггасса йонисо падаханам̣ самбхаватӣти аманусса̄нам̣ гарубха̄ванӣйата̄. нидда̄гатампӣти суттампи, супинантепӣти адхиппа̄йо.

ити соса̄никан̇гакатха̄ван̣н̣ана̄.