7. кхалупаччха̄бхаттикан̇гакатха̄

30. кхалупаччха̄бхаттикан̇гампи ‘‘атириттабходжанам̣ пат̣иккхипа̄ми, кхалупаччха̄бхаттикан̇гам̣ сама̄дийа̄мӣ’’ти имесам̣ ан̃н̃атаравачанена сама̄диннам̣ хоти.

тена пана кхалупаччха̄бхаттикена пава̄ретва̄ пуна бходжанам̣ каппийам̣ ка̄ретва̄ на бхун̃джитаббам̣. идамасса видха̄нам̣.

пабхедато пана айампи тивидхо хоти. таттха уккат̣т̣хо йасма̄ пат̣хамапин̣д̣е пава̄ран̣а̄ на̄ма наттхи, тасмим̣ пана аджджхохарийама̄не ан̃н̃ам̣ пат̣иккхипато хоти, тасма̄ евам̣ пава̄рито пат̣хамапин̣д̣ам̣ аджджхохаритва̄ дутийапин̣д̣ам̣ на бхун̃джати. маджджхимо йасмим̣ бходжане пава̄рито, тадева бхун̃джати. мудуко пана йа̄ва а̄сана̄ на вут̣т̣ха̄ти та̄ва бхун̃джати.

имесам̣ пана тин̣н̣ампи пава̄рита̄нам̣ каппийам̣ ка̄ра̄петва̄ бхуттаккхан̣е дхутан̇гам̣ бхиджджати. айаметтха бхедо.

айам̣ пана̄нисам̣со, анатириттабходжана̄паттийа̄ дӯрабха̄во, одарикатта̄бха̄во, нира̄мисасаннидхита̄, пуна парийесана̄йа абха̄во, аппиччхата̄дӣнам̣ ануломавуттита̄ти.

парийесана̄йа кхедам̣, на йа̄ти на кароти саннидхим̣ дхӣро;

одарикаттам̣ паджахати, кхалупаччха̄бхаттико йогӣ.

тасма̄ сугатапасаттхам̣, сантосагун̣а̄дивуд̣д̣хисан̃джананам̣;

досе видхунитука̄мо, бхаджеййа йогӣ дхутан̇гамиданти.

айам̣ кхалупаччха̄бхаттикан̇ге сама̄да̄навидха̄наппабхедабхеда̄нисам̣саван̣н̣ана̄.