12. йатха̄сантхатикан̇гакатха̄

35. йатха̄сантхатикан̇гампи ‘‘сена̄саналолуппам̣ пат̣иккхипа̄ми, йатха̄сантхатикан̇гам̣ сама̄дийа̄мӣ’’ти имесам̣ ан̃н̃атаравачанена сама̄диннам̣ хоти.

тена пана йатха̄сантхатикена йадасса сена̄санам̣ ‘‘идам̣ туйхам̣ па̄пун̣а̄тӣ’’ти га̄хитам̣ хоти, тенева тут̣т̣хаббам̣, на ан̃н̃о ут̣т̣ха̄петаббо. идамасса видха̄нам̣.

пабхедато пана айампи тивидхо хоти. таттха уккат̣т̣хо аттано паттасена̄санам̣ дӯрети ва̄ ачча̄саннети ва̄ амануссадӣгхаджа̄тика̄дӣхи упаддутанти ва̄ ун̣ханти ва̄ сӣталанти ва̄ пуччхитум̣ на лабхати. маджджхимо пуччхитум̣ лабхати. гантва̄ пана олокетум̣ на лабхати. мудуко гантва̄ олокетва̄ сачасса там̣ на руччати, ан̃н̃ам̣ гахетум̣ лабхати.

имесам̣ пана тин̣н̣ампи сена̄саналолуппе уппаннаматте дхутан̇гам̣ бхиджджатӣти айаметтха бхедо.

айам̣ пана̄нисам̣со, ‘‘йам̣ ладдхам̣ тена тут̣т̣хабба’’нти (джа̄. 1.1.136; па̄чи. 793) вуттова̄дакаран̣ам̣, сабрахмача̄рӣнам̣ хитесита̄, хӣнапан̣ӣтавикаппапаричча̄го, ануродхавиродхаппаха̄нам̣, атриччхата̄йа два̄рапидаханам̣, аппиччхата̄дӣнам̣ ануломавуттита̄ти.

йам̣ ладдхам̣ тена сантут̣т̣хо, йатха̄сантхатико йати;

ниббикаппо сукхам̣ сети, тин̣асантхаракесупи.

на со раджджати сет̣т̣хамхи, хӣнам̣ ладдха̄ на куппати;

сабрахмача̄ринаваке, хитена анукампати.

тасма̄ арийасата̄чин̣н̣ам̣, мунипун̇гававан̣н̣итам̣;

ануйун̃джетха медха̄вӣ, йатха̄сантхатара̄матанти.

айам̣ йатха̄сантхатикан̇ге сама̄да̄навидха̄наппабхедабхеда̄нисам̣саван̣н̣ана̄.