11. соса̄никан̇гакатха̄

34. соса̄никан̇гампи ‘‘на суса̄нам̣ пат̣иккхипа̄ми, соса̄никан̇гам̣ сама̄дийа̄мӣ’’ти имесам̣ ан̃н̃атаравачанена сама̄диннам̣ хоти.

тена пана соса̄никена йам̣ манусса̄ га̄мам̣ нивесанта̄ ‘‘идам̣ суса̄на’’нти ваваттхапенти, на таттха васитаббам̣. на хи матасарӣре аджджха̄пите там̣ суса̄нам̣ на̄ма хоти, джха̄питака̄лато пана пат̣т̣ха̄йа сачепи два̄дасавасса̄ни чхад̣д̣итам̣, там̣ суса̄намева.

тасмим̣ пана васантена чан̇камаман̣д̣апа̄дӣни ка̄ретва̄ ман̃чапӣт̣хам̣ пан̃н̃апетва̄ па̄нӣйапарибходжанӣйам̣ упат̣т̣ха̄петва̄ дхаммам̣ ва̄чентена на васитаббам̣. гарукам̣ хи идам̣ дхутан̇гам̣, тасма̄ уппаннапариссайавигха̄таттха̄йа сан̇гхаттхерам̣ ва̄ ра̄джайуттакам̣ ва̄ джа̄на̄петва̄ аппаматтена васитаббам̣. чан̇камантена аддхаккхикена а̄л̣а̄ханам̣ олокентена чан̇камитаббам̣.

суса̄нам̣ гаччхантена̄пи маха̄патха̄ уккамма уппатхамаггена гантаббам̣. дива̄йева а̄рамман̣ам̣ ваваттхапетаббам̣. еван̃хисса там̣ раттим̣ бхайа̄накам̣ на бхависсати, аманусса̄ раттим̣ виравитва̄ виравитва̄ а̄хин̣д̣анта̄пи на кеначи пахаритабба̄. екадивасампи суса̄нам̣ агантум̣ на ват̣т̣ати. маджджхимайа̄мам̣ суса̄не кхепетва̄ паччхимайа̄ме пат̣иккамитум̣ ват̣т̣атӣти ан̇гуттарабха̄н̣ака̄. аманусса̄нам̣ пийам̣ тилапит̣т̣хама̄сабхаттамаччхамам̣сакхӣрателагул̣а̄дикхаджджабходжджам̣ на севитаббам̣. кулагехам̣ на пависитаббанти идамасса видха̄нам̣.

пабхедато пана айампи тивидхо хоти. таттха уккат̣т̣хена йаттха дхувад̣а̄хадхувакун̣ападхувародана̄ни аттхи, таттхева васитаббам̣. маджджхимасса тӣсу екасмимпи сати ват̣т̣ати. мудукасса вуттанайена суса̄налаккхан̣ам̣ паттаматте ват̣т̣ати.

имесам̣ пана тин̣н̣ампи на суса̄намхи ва̄сам̣ каппанена дхутан̇гам̣ бхиджджати. суса̄нам̣ агатадивасети ан̇гуттарабха̄н̣ака̄. айаметтха бхедо.

айам̣ пана̄нисам̣со маран̣ассатипат̣ила̄бхо, аппама̄давиха̄рита̄, асубханимитта̄дхигамо, ка̄мара̄гавиноданам̣, абхин̣хам̣ ка̄йасабха̄вадассанам̣, сам̣вегабахулата̄ а̄рогйамада̄диппаха̄нам̣, бхайабхеравасаханата̄, аманусса̄нам̣ гарубха̄ванӣйата̄, аппиччхата̄дӣнам̣ ануломавуттита̄ти.

соса̄никан̃хи маран̣а̄нусатиппабха̄ва̄,

нидда̄гатампи на пхусанти пама̄дадоса̄;

сампассато ча кун̣апа̄ни бахӯни тасса,

ка̄ма̄нубха̄вавасагампи на хоти читтам̣.

сам̣вегамети випулам̣ на мадам̣ упети,

самма̄ атхо гхат̣ати ниббутимесама̄но;

соса̄никан̇гамитинекагун̣а̄вахатта̄,

нибба̄наниннахадайена нисевитаббанти.

айам̣ соса̄никан̇ге сама̄да̄навидха̄наппабхедабхеда̄нисам̣саван̣н̣ана̄.