26. чорагха̄такаваттхумхи айама̄нупуббӣкатха̄

екасмим̣ кира самайе амха̄кам̣ бхагава̄ са̄ваттхийам̣ упанисса̄йа джетаване вихарати дхаммадесана̄йа маха̄джанасса саггамоккхасампадам̣ дадама̄но. тасмим̣самайе пан̃часата̄ чора̄ ат̣авито нагарам̣ а̄гантва̄ раттибха̄ге чоракаммам̣ катва̄ тена путтада̄ре посенти. атхекадивасам̣ чора̄ чоракамматтха̄йа нагарам̣ пависанта̄ нагарадва̄ре екам̣ дуккхитам̣ джанападамануссам̣ пасситва̄ хамбхо каттха васатӣти пуччхим̣су, со аттаджана̄ джанападава̄сибха̄вам̣ пака̄сеси. атхасса те касма̄ бхо имина̄ дуккхава̄сена васиссаси, ехи амхехи саддхим̣ чоракаммам̣ каронто ваттха̄лан̇ка̄расампанно путтада̄рам̣ посехи. имина̄ капан̣ава̄сена на васа̄ти а̄хам̣су. со паниме йуттам̣ катхентӣти тесам̣ вачанам̣ сампат̣иччхи. атха те евам̣ сати амхехи саддхим̣ а̄гаччха̄хӣти ватва̄ нам̣ гахетва̄ антонагарам̣ павит̣т̣ха̄ таттха таттха вилумпанта̄ чоракаммам̣ акам̣су. тада̄ джа̄нападико ладдхавибхаво имамева варатаранти техи саддхим̣ чоракаммам̣ каронто джӣвикам̣ каппеси, атхекадивасам̣ ра̄джапуриса̄ катакамме те саббева гахетва̄ паччха̄ба̄хам̣ га̄л̣хам̣ бандхитва̄ косаларан̃н̃о дассесум̣, ра̄джа̄ те дисва̄ евама̄ха, бхан̣е тумха̄кам̣ антаре йо етесам̣ ма̄ретва̄ джӣвитаккхайам̣ па̄пессати, тасса джӣвитада̄нам̣ даммӣти, там̣ сутва̄ те чора̄ саббе ан̃н̃аман̃н̃ан̃а̄тисухадасамбандхабха̄вена там̣ на иччхим̣су. со пана джанападава̄сӣ мануссо ахамете саббе ма̄ресса̄мӣти ран̃н̃о ватва̄ тена̄нун̃н̃а̄то те саббе ма̄реси. там̣ дисва̄ тут̣т̣хо ра̄джа̄ тасса чорагха̄такаммам̣ ада̄си. со чоре ча ваджджхаппатте ча ма̄ренто пан̃чавӣсативасса̄ни васанто апарабха̄ге махаллако ахоси. атха со мандабалатта̄ катипайапаха̄рена̄пи чорам̣ ма̄ретум̣ на саккоти, ра̄джа̄ там̣ н̃атва̄ ан̃н̃асса чорагха̄такаммам̣ ада̄си. атха со чорагха̄такамма̄ [чорагха̄такамма итипикаттхачи] парихӣно аттано гехе васати. тада̄ ан̃н̃атаро мануссо мантам̣ париваттетва̄ на̄са̄ва̄тена мануссама̄ран̣акамантам̣ джа̄на̄ти. татха̄хи хаттхапа̄дакан̣н̣ана̄сасӣса̄дӣсу йам̣кин̃чи чхеджджабхеджджам̣ каттука̄мо мантам̣ париваттетва̄ на̄са̄ва̄там̣ виссаджджети. там̣ там̣ т̣ха̄нам̣ чхиджджати бхиджджати, евам̣ маха̄нубха̄во со манто, атха со там̣ пурисам̣ упат̣т̣хахитва̄ мантам̣ лабхитва̄ ран̃н̃о са̄санам̣ песеси. ахам̣ ито пуббе махаллакатта̄ чора̄нам̣ хаттхапа̄да̄дайо дуккхена чхеджджа бхеджджам̣ кароми, ма̄ретаббепи дуккхена ма̄реми. ида̄ни пана̄хам̣ татха̄ на кароми, мама манта̄нубха̄вена чхеджджабхеджджакаммам̣ карисса̄мӣти. ра̄джа̄ там̣ са̄санам̣ сутва̄ са̄дхӯти там̣ паккоса̄петва̄ т̣ха̄нантарам̣ тассева па̄катика мака̄си. со тато пат̣т̣ха̄йа там̣ каммам̣ каронто пуна пан̃чавасса̄ни атикка̄меси. со махаллако кхӣн̣а̄йуко дуббало маран̣аман̃чапара̄йан̣о хутва̄ маран̣аведана̄дуккхена махантена бхайа̄накена саддена виссарам̣ вираванто нимӣлитена чаккхуна̄ бхайа̄накам̣ наракаггиджа̄ла̄паджджалантаайакӯт̣амуггарадхаре нирайапа̄ле ча пассанто нипанно хоти, тато тасса пат̣ивиссакагехе манусса̄ тасса бхайа̄накасаддасаван̣ена гехам̣ чхат̣т̣етва̄ пала̄йим̣су. тасмим̣ кира дивасе маха̄са̄рипуттаттхеро диббачаккхуна̄ локам̣ олокента̄ там̣ чорагха̄такам̣ тадахева ка̄лам̣катва̄ нирайе ниббаттама̄нам̣ дисва̄ майи таттха гате панеса майи паса̄дена сагге ниббаттатӣти н̃атва̄ аджджа майа̄ тасса̄нуггахам̣ ка̄тум̣ ват̣т̣атӣти пуббан̣хасамайам̣ нива̄сетва̄ тасса гхарадва̄ра магама̄си. атха со тхерам̣ дисва̄ куддхо копена тат̣атат̣а̄йама̄надехо аджджа там̣ виджджхитва̄ пха̄летва̄ ма̄ресса̄мӣти нипаннова мантам̣ париваттетва̄ на̄са̄ва̄там̣ виссаджджеси, тхеро тасмим̣ кхан̣е ниродхасама̄панно ниродха̄ вут̣т̣ха̄йа сурийо вийа вирочама̄но ат̣т̣ха̄си, атха со тхерасса тайо ва̄ре татхева катва̄ кин̃чи ка̄тум̣ асакконто ативийа вимхитачитто тхере читтам̣ паса̄детва̄ аттано пат̣ийаттам̣ па̄йасам̣ тхерасса да̄песи, тхеро ман̇галам̣ вад̣д̣хетва̄ виха̄рамева агама̄си, чорагха̄тако тхерасса диннада̄нам̣ ануссаранто тасмим̣ кхан̣е ка̄лам̣ катва̄ сагге ниббатти. ахо вӣтара̄га̄нам̣ буддхапутта̄нам̣ а̄нубха̄во. евам̣ нараке ниббаттама̄нописса балена сагге ниббаттоти. татха̄хи.

1. да̄нам̣ та̄н̣ам̣ манусса̄нам̣, да̄нам̣ дуггатива̄ран̣ам̣;

да̄нам̣ саггасса сопа̄нам̣, да̄нам̣ сантикарам̣ парам̣.

2. иччхитиччхитада̄нена, да̄нам̣ чинта̄ман̣ӣ вийа;

каппаруккхова сатта̄нам̣, да̄нам̣ бхаддагхат̣овийа.

3. сӣлавантасса да̄нена, чаккаваттисиримпи ча;

лабханти саккасампаттим̣, татха̄ локуттарам̣ сукхам̣.

4. па̄пакаммесу нирато, т̣хитойам̣ нарака̄йане [нарака̄ване итипикаттхачи];

са̄рипуттасса тхерасса, пин̣д̣апа̄тасса ва̄хаса̄.

5. апа̄йам̣ париваджджетва̄, некадуккхасама̄кулам̣;

девасан̇гхапариббӯл̣хо, гато девапурам̣ варам̣.

6. тасма̄ сукхетте саддха̄йа, детха да̄на̄ни ка̄мадам̣;

да̄нам̣ дентехи сӣлампи, па̄ланӣйам̣тисундаранти [па̄ланам̣ча̄тисундарам̣ итипикаттхачи].

атха бхиккхӯ дхаммасабха̄йам̣ саннипатитва̄ нисинна̄ бхагавантам̣ пуччхим̣су, ким̣бханте со па̄по чатӯсу апа̄йесу катарасмим̣ ниббаттоти. атха саттха̄ аджджеса бхиккхаве са̄рипуттасса диннада̄на̄нубха̄вена девалоке ниббатто, тассева ниссандена ана̄гате паччекабуддхо бхависсатӣти бйа̄ка̄сӣти.

7. бхо са̄рипутте нихитаппада̄нам̣,

кхан̣ена па̄пети хи саггамаггам̣;

тасма̄ сукхеттесу дада̄тха да̄нам̣,

ка̄маттха че саггамоккхам̣ параттха.

чорагха̄такаваттхум̣ чхат̣т̣хамам̣.