27. саддхопа̄сакасса ваттхумхи айама̄нупуббӣкатха̄

атӣте кира кассападасабаласса ка̄ле еко пурисо саддхо ратанаттайесу пасанно уччхуйантакаммена джӣвикам̣ каппенто пат̣ивасати. атха со екам̣ гила̄набхиккхум̣ дисва̄ тасса ул̣ун̇каматтам̣ саппим̣ ада̄си, татхевекасса бхиккхусса екам̣ гул̣апин̣д̣ам̣ ада̄си, атха̄парасмим̣дивасе екам̣ чха̄таджджхаттам̣ сунакхам̣ дисва̄ тасса бхаттапин̣д̣ена сан̇гаха мака̄си, атхекасса ин̣ат̣т̣хакасса екам̣ каха̄пан̣ам̣ ада̄си, атхекадивасам̣ дхаммам̣ сун̣ама̄но дхаммадесакасса бхиккхусса са̄т̣акам̣ пӯджеси, со еттакам̣ пун̃н̃акаммам̣ катва̄ бхавесу чарама̄нохам̣ самуддапаббата̄дӣсупи йам̣ йам̣ иччха̄ми. там̣ там̣ самиджджхатӯти паттханам̣ ака̄си, со апарабха̄ге ка̄лам̣ катва̄ техева кусаламӯлехи суттаппабуддхо вийа девалоке ниббаттитва̄ таттха махантам̣ диббасампаттим̣ анубхавитва̄ тато чуто амха̄кам̣ бхагавато ка̄ле са̄ваттхийам̣ махаддхане маха̄са̄лакуле ниббаттитва̄ тато со вин̃н̃утам̣ патто ка̄лена ка̄лам̣ дхаммам̣ сун̣анто гхара̄ва̄се а̄дӣнавам̣ паббаджджа̄йа ча а̄нисам̣сам̣ сутва̄ паббаджито на чиренева арахаттам̣ па̄пун̣и. со апарабха̄ге саттха̄рам̣ вандитва̄ пан̃часатабхиккхупарива̄ро угганагарам̣ агама̄си, таттха сет̣т̣хино бхарийа̄ саддха̄ ахоси пасанна̄. са̄ тхерам̣ пан̃чахи бхиккхусатехи саддхим̣ бхиккха̄йа чарантам̣ дисва̄ туритатурита̄ гантва̄ тхерасса паттам̣ гахетва̄ саддхим̣ пан̃часатехи бхиккхӯхи бходжетва̄ тхерам̣ таттха нибаддхава̄саттхам̣ йа̄читва̄ пан̃часатакӯт̣а̄га̄ра̄ни ка̄ра̄петва̄ алан̇каритва̄ пан̃часатабхиккхӯ таттха ва̄сентӣ нибаддхам̣ чатупаччайехи упат̣т̣ха̄намака̄си. тато тхеро там̣ пан̃часу сӣлесу патит̣т̣ха̄петва̄ таттха йатха̄бхирантам̣ вихаритва̄ ан̃н̃атта гантука̄мо анупуббена пат̣т̣анага̄мам̣ агама̄си, таттха васитва̄ тато на̄вам̣ абхируйха пан̃часатабхиккхӯхи паривуто самуддапит̣т̣хена гаччхати, самуддам̣ тарантасса тасса са̄гарамаджджхе ударава̄то самут̣т̣хахитва̄ пӣл̣ети, там̣ дисва̄ бхиккхӯ бханте идам̣ пуббе кена вӯпасамессатӣти пуччхим̣су, тхеро пуббе ме а̄вусо улун̇каматте саппипӣте рого вӯпасамматӣти а̄ха, бхиккхӯ бханте самуддапит̣т̣хе катхам̣ саппим̣ лабхисса̄ма, адхива̄сетха̄ти а̄хам̣су, там̣ сутва̄ тхерена [тхеронаноа̄йасманта̄ итисаббаттха] на но а̄йасманта̄ саппи дуллабха̄, мама паттам̣ гахетва̄ самуддодакам̣ уддхаритва̄ а̄нетха̄ти вутте бхиккхӯ татха̄ акам̣су. уддхат̣аматтамева там̣удакам̣ париваттетва̄ саппи ахоси, атха бхиккхӯ там̣ дисва̄ аччхарийаббхутачитта̄ джа̄та̄ тхерасса саппим̣ упана̄месум̣, тхерена саппино [саппина̄ итисаббаттха] пӣтаматте со а̄ба̄дхо вӯпасами, атхасса бхиккхӯхи ки метам̣ бханте аччхарийам̣, на но ито пуббе еварӯпам̣ дит̣т̣хапуббам̣ти вутте тхеро тенахи катапун̃н̃а̄нам̣ пун̃н̃авипа̄кам̣ пассиссатха̄ти ватва̄ самуддам̣ олокеси идам̣ саппи хотӯти. атхасса чаккхупатхе самудде саббодакам̣ париваттетва̄ саппи ахоси. атхасса бхиккхӯ аббхутачитта̄ ан̃н̃ампи ӣдисам̣ пун̃н̃ам̣ аттхи бхантети пуччхим̣су, тато тхеро тенахи пассатха̄йасманта̄ мама пун̃н̃анти ватва̄ саманта̄ таттха таттха гханаселапаббате олокеси, сабба̄ни та̄ни гул̣апин̣д̣а̄ни ахесум̣, тато чаккхупатхе саманта̄ бхаттабха̄джана̄ни дассеси сабйан̃джанам̣ сопакаран̣ам̣. тато химавантам̣ олокеси, саббам̣ там̣ суван̣н̣амайам̣ ахоси. атха̄бхимукхат̣т̣ха̄не махантам̣ ванасан̣д̣ам̣ олокеси, сакалаванасан̣д̣ам̣на̄на̄вира̄гаваттхехи сан̃чханнам̣ ахоси, бхиккхӯ там̣ там̣ па̄т̣иха̄рийам̣ дисва̄ атӣва вимхита̄ бханте кена те пун̃н̃акаммена ета̄диса̄ни па̄т̣иха̄рийа̄ни бхависсантӣти пуччхим̣су, тхеро кассападасабаласса ка̄ле аттана̄ катам̣ саббам̣ там̣ кусалам̣ пака̄сеси. тенеттха.

1. имасмим̣ бхаддаке каппе, кассапо на̄ма на̄йако;

саббалокахитаттха̄йа, локе уппаджджи чаккхума̄.

2. тада̄хам̣ уччхуйантамхи, нийутто гул̣ака̄рако;

тена каммена джӣва̄ми, посенто путтада̄раке.

3. килантиндрийамаддаккхим̣, бхиккхум̣ рога̄турам̣ тада̄;

бхиккха̄ча̄ракаваттена, гхататтхам̣ [гхатаматтамупа̄гатам̣ итисаббаттха] самупа̄гатам̣.

4. улун̇каматтам̣ сапписса, ададам̣ тасса бхиккхуно;

саддаханто да̄напхалам̣, дайа̄йу даггама̄насо.

.5

тена каммена сам̣са̄ре, сам̣саранто бхава̄бхаве;

йаттхиччха̄ми гхатам̣ таттха, уппаджджати анаппакам̣.

6. иччха̄махам̣ самуддасмим̣, пхалампи гхатаматтано;

там̣ там̣ саббам̣ гхатам̣ хоти, гхатада̄нассидам̣ пхалам̣.

7. сун̣а̄тха майхам̣ ан̃н̃ампи, пун̃н̃акаммам̣ манорамам̣;

тада̄ дисва̄нахам̣ бхиккхум̣, рогена парипӣл̣итам̣.

8. гул̣апин̣д̣ам̣ гахетва̄на, патте тасса сама̄кирим̣;

тена со сукхито а̄си, рогам̣ бйапагатам̣ тада̄.

9. тена ме гул̣ада̄нена, сам̣сарам̣ девама̄нусе;

йаттхаттхосми гул̣ена̄хам̣, таттха там̣ сулабхам̣ мама.

10. села̄ча випула̄ майхам̣, хонти читта̄нуваттака̄;

махантагул̣апин̣д̣а̄ва, гул̣ада̄не идам̣ пхалам̣.

11. атха̄пи ме катам̣ пун̃н̃ам̣, сун̣а̄тха са̄дху бхиккхаво;

чха̄таджджхаттам̣ пхандама̄нам̣, дисва̄на сунакхам̣ тада̄.

12. бхаттапӣн̣д̣ена сан̇ган̣хим̣, тампи да̄нам̣ пхала̄вахам̣;

тато пат̣т̣ха̄йа на̄хоси, аннапа̄нена ӯната̄.

13. сулабханнапа̄но сукхито, ахосим̣джа̄тиджа̄тийам̣;

аджджа̄пи йади иччха̄ми, бходжанена пайоджанам̣.

14. чаккхупатхе саманта̄ ме, джа̄йантуккхалийо бахӯ;

атха̄парампи кусалам̣, ака̄сим̣там̣ сан̣а̄тха ме.

15. ин̣ат̣т̣хакасса посасса, ада̄секам̣ каха̄пан̣ам̣;

тена ме пун̃н̃акаммена, аномабхавасампадам̣.

16. пачурам̣ джа̄тарӯпан̃ча, лабха̄ми джа̄тиджа̄тийам̣;

сачаджджа дханака̄мохам̣, гханаселопи паббато;

хоти хемамайам̣ саббам̣, ин̣ато мочане пхалам̣.

17. ан̃н̃ампи мама пун̃н̃ам̣ бхо, сун̣а̄тха сутисобханам̣;

кассапасса бхагавато, са̄санекам̣ бахуссутам̣.

18. десентам̣ мунино дхаммам̣, сутва̄ пӣн̣итама̄насо;

пӯджесим̣са̄т̣акам̣ майхам̣, дхаммасса дхаммаса̄мино.

19. тена̄хам̣ пун̃н̃акаммена, сам̣сарам̣ девама̄нусе;

лабха̄ми пачурам̣ ваттхам̣, йам̣ локасмим̣ варам̣ парам̣.

20. иччхама̄но саче аджджа [джа̄нама̄нопахам̣аджджа; джа̄надха̄ночахам̣аджджа итикаттхачи], химавантампи паббатам̣;

на̄на̄вира̄гаваттхехи, чха̄дайиссам̣ самантато.

21. саче иччха̄ми аджджева, ваттхеначчха̄дайа̄ мите;

джантаво чатудӣпасмим̣, ваттхада̄нассидам̣ пхалам̣.

22. етесам̣ пун̃н̃акамма̄нам̣, ва̄хаса̄ ка̄мабхӯмийам̣;

сампатти манубхутва̄на, са̄ваттхипура муттаме.

23. джа̄то куле маха̄бхоге,

вуддхиппатто сукхедхито;

тасса дхаммам̣ сун̣итва̄на,

паббаджитва̄на са̄сане.

24. локуттарам̣ аггарасам̣, бхун̃чанто мунива̄хаса̄;

килесе паджахитва̄на, арахаттамапа̄пун̣им̣.

25. кусалам̣ на̄ вамантаббам̣, кхуддаканти када̄чипи;

анантапхаладам̣ хоти, нибба̄н̣ампи дада̄ти там̣.

атхасса дхаммадесанам̣ сутва̄ бхиккхӯ ча маха̄джано ча да̄на̄дикусалакаммам̣ катва̄ йебхуййена саггапара̄йан̣а̄ ахесум̣ти.

26. манопаса̄денапи аппапун̃н̃ам̣,

евам̣ махантам̣ бхаватӣти н̃атва̄;

ма̄ аппапун̃н̃анти памаджджатхамбхо;

сара̄тха девим̣ идха ла̄джада̄йим̣.

саддхопа̄сакасса ваттхум̣ саттамам̣.