намо тасса бхагавато арахато самма̄самбуддхасса.
расава̄хинӣ
пан̣а̄ма̄дикатха̄
1. саттхуппасаттхачаран̣ам̣ саран̣ам̣ джана̄нам̣,
брахма̄димол̣и ман̣ирам̣си сама̄вахантам̣,
пан̇керуха̄бхамудукомалача̄руван̣н̣ам̣;
ванда̄ми чаккаваралаккхан̣ама̄дадха̄нам̣.
2. сиддхам̣ джинена чирака̄ламатандитена,
йам̣ бха̄вако самадхигаччхати кхемамаггам̣;
йам̣ каппаруккха ручида̄на ман̣ива бха̄ти,
там̣ дхаммамагга масамам̣ пан̣ама̄ми ниччам̣.
3. сантиндрийам̣ сугатасӯнуварам̣ висуддхам̣,
йам̣ даккхин̣еййаматадам̣ сучипун̃н̃акхеттам̣;
та̄н̣есинам̣ саран̣амуджджхитасаббадуккхам̣,
ванда̄ми сан̇гха манагхам̣ сираса̄ махаггхам̣.
4. йампаттаметтха ратанаттайатхоманена,
пун̃н̃ена тена дуритам̣ сакалам̣ пан̣уджджа,
ваккха̄махам̣ сумадхурам̣ расава̄хининтам̣,
бхо бхо сун̣анту суджана̄ бхимуда̄ваха̄ са̄.
5. таттхататтхӯпапанна̄ни, ваттхӯни араха̄ пуре;
абха̄сум̣ дӣпабха̄са̄йа, т̣хапесум̣ там̣ пура̄тана̄.
6. маха̄виха̄ре тан̇гутта, ван̇капаривен̣ава̄сико;
рат̣т̣хапа̄лоти на̄мена, сӣла̄ча̄ра гун̣а̄каро.
7. хита̄йа париваттеси, паджа̄нам̣ па̄л̣ибха̄сато;
пунарутта̄дидосехи, тама̄си саббама̄кулам̣;
ана̄кулам̣ карисса̄ми, там̣ сун̣а̄тха сама̄хита̄.
8. витара̄га̄ пуре вочум̣, йасма̄ тасма̄ хи бха̄ситам̣;
етама̄даран̣ӣйан̃хи, са̄дху са̄дхӯхи саббада̄ти.
джамбудӣпуппатти ваттхӯни.
дхаммасон̣д̣акавагго
1. дхаммасон̣д̣акасса ваттхумхи айама̄нупуббӣкатха̄
таттха тесам̣ ваттхӯна муппаттийо двидха̄ бхаванти джамбудӣпе сӣхал̣адӣпеча̄ти, таттха джамбудӣпе та̄л̣ӣса, сӣхал̣адӣпе тесат̣т̣хи, тесу та̄ва джамбудӣпуппаттиваттхӯни а̄ви бхависсанти, татопи дхаммасон̣д̣акасса ваттху а̄ди, катхам̣, амха̄кам̣ кира бхагавато пуббе имасмим̣йева бхаддакаппе кассапона̄ма саттха̄ локе удапа̄ди, тасса кхо пана бхагавато са̄санантарадха̄нато на чиренева ка̄лена амха̄кам̣ бодхисатто ба̄ра̄н̣асӣран̃н̃о аггамахесийа̄ куччхисмим̣ ниббатти, тассу ппатти ка̄ласаманантарамева саббасатта̄нам̣ манаси дхаммасан̃н̃а̄ удапа̄ди, тасма̄сса дхаммасон̣д̣отина̄ма макам̣су, со панесо кума̄ро махантена парива̄рена вад̣д̣хенто саббасиппесу ниппхаттим̣ патва̄ питара̄ упараджджена пӯджито хутва̄ да̄на̄дайо дасакусалакаммапатхе пӯренто питуаччайена̄маччехи раджджена̄бхисин̃чито ахоси, со панеса дхаммасон̣д̣акамаха̄ра̄джа̄ деванагарасадисе ба̄ра̄н̣асӣнагаре чаккаваттисадисам̣ ба̄ра̄н̣асӣраджджам̣ ка̄ренто ма̄саддхама̄саччайена сирисайанагато евам̣ чинтеси, мамевам̣ раджджасириманубхаванам̣ на собхати дхаммавийогена, дива̄кара вирахито набхо вийа̄тиа̄дина̄ на̄на̄ка̄ран̣ам̣ чинтеси, тенеттха.
1. пун̃н̃ена сӣла̄димайена пуббе,
катена паттосми атандитена,
масаккаса̄ре вийа девара̄джа̄;
ра̄джаттамиддхе пурамуттамамхи.
2. рӯпена ха̄рӣнайануссавена,
саддена самма̄ саван̣а̄матена,
гандхена гха̄нуссавасобханена,
расан̃н̃апун̃н̃ена расенача̄пи.
3. пхассена гаттасса супхассадена,
самиддхипаттосми махиддхикохам̣,
неветтакенева пама̄дабха̄ва,
ма̄ паджджитум̣ йуттарӯпанти н̃атва̄.
4. дасса̄ми ан̇гаапи джӣвитан̃ча,
дхан̃н̃ам̣ дханам̣ ча̄пи пасанначитто,
сосса̄ми дхаммам̣ сивама̄дадха̄нам̣,
джинеритам̣ джа̄тиджара̄паха̄н̣ам̣.
5. на собхати йатха̄ка̄сам̣, джалам̣ дха̄мапатим̣вина̄,
раджджакаран̣ам̣ татха̄ майхам̣, вина̄ дхамма̄ на собхати.
6. на собхати хатха̄ ратти, ниса̄на̄тхам̣ вина̄ сада̄,
раджджакаран̣ам̣ татха̄ майхам̣, вина̄ дхамма̄ на собхати.
7. алан̇катопи че хаттхӣ, вина̄ да̄т̣ха̄ на собхати,
раджджакаран̣ам̣ татха̄ майхам̣, вина̄ дхамма̄ на собхати.
8. йатха̄ каллолама̄лӣйам̣,
вина̄ вела̄ на собхати,
раджджакаран̣ам̣ татха̄ майхам̣,
вина̄ дхамма̄ на собхати.
9. йатха̄ суман̣д̣ито ра̄джа̄,
купат̣о нева собхати,
раджджакаран̣ам̣ татха̄ майхам̣,
вина̄ дхамма̄ на собхати.
10. дхаммамева сун̣исса̄ми, дхамме ме раматӣ мано,
на хи дхамма̄ парам̣ аттхи, дхаммамӯлам̣ тисампаданти.
евам̣ чинтетва̄ па̄това сиригаббха̄ никкхамма сусаджджите самусситасетаччхатте ра̄джапаллен̇ке амаччаган̣а паривуто нисӣди девара̄джа̄вийа вирочама̄но, нисинно пана ра̄джа̄ амачче евама̄ха, йо панеттха бхонто буддхабха̄ситесу дхаммесу кин̃чидхаммам̣ джа̄на̄ти, со бха̄сату, сотумиччха̄мидхамманти, те саббепи майам̣ дева на джа̄на̄ма̄ти а̄хам̣су, там̣ сутва̄ а на тта ма но ра̄джа̄ евам̣ чинтеси, йаннӯна̄хам̣ хаттхиккхандхе сахассам̣ т̣хапетва̄ нагаре бхерим̣чара̄пеййам̣, йам̣ аппевана̄ма кочи дханалобхена ча̄туппадика̄йапи га̄тха̄йа дхаммам̣ десеййа. там̣ ме дӣгхараттам̣ хита̄йа сукха̄йа бхависсатӣти, тато со татха̄ катва̄пи дхаммадесакам̣ алабханто пуна двисахассам̣ тичатупан̃часахассантийа̄вакот̣иппакот̣им̣даммӣти, тато га̄ма нигама джанападе, тато сет̣т̣хит̣т̣ха̄нам̣ сена̄пати упара̄джат̣т̣ха̄на̄ дайопи, пуна сетаччхаттам̣ дамми, ра̄джавесам̣ паха̄йа атта̄нам̣ да̄сам̣ са̄ветва̄ дхаммадесентасса даммити ватва̄ бхери чара̄петва̄пи дхамма десакамалабхитва̄ сам̣вигго кимме дхаммавийогена раджджена̄ти амачча̄нам̣ раджджам̣ нӣййа̄тетва̄ саддхаммагавесако дхаммасон̣д̣акамаха̄ра̄джа̄ маха̄ванам̣ па̄виси га̄ма нигама ра̄джадха̄ни парампара̄йа, тенеттха.
11. пуре бхерим̣ чара̄петва̄,
дхаммасон̣д̣о нара̄дхипо;
саддхаммаджджхесакам̣ саттху,
аладдха̄ дханакот̣ихи.
12. да̄со хоми паха̄йа̄хам̣,
ра̄джаттам̣ десакасса ме;
ичча̄ха со махӣпа̄ло,
ахо дхаммесу лолата̄.
13. раджджам̣ нӣййа̄тайитва̄на, амачча̄нам̣ манорамам̣,
ванам̣ па̄виси со ра̄джа̄, гавесам̣ дхаммамуттаманти.
маха̄ванам̣ павит̣т̣хаккхан̣е пана маха̄саттасса пун̃н̃атеджена саккасса̄санам̣ ун̣ха̄ка̄рам̣ дассеси, атха девара̄джа̄ чинтеси ака̄мам̣ ме пан̣д̣укамбала сила̄санам̣ ун̣хамахоси, киннукхо ка̄ран̣анти локам̣ олокенто сакко девара̄джа̄ дхаммасон̣д̣ака маха̄ра̄джа̄нам̣ сакаладжамбудӣпам̣ вичинитва̄ саддхаммаджджхесакам̣ алабхитва̄ ванам̣ павит̣т̣хабха̄вам̣ аддаса, дхаммасон̣д̣акамаха̄ра̄джа̄ саддхамматтха̄йа раджджа дхана бандху джӣвитампи паха̄йа аран̃н̃ам̣ павит̣т̣хо, на со вата̄йам̣ йова̄ сова̄ сатто, имасмим̣йева каппе буддхо бхависсати, буддхабодхисатто ча̄йам̣ аджджева маха̄ран̃н̃ам̣ павит̣т̣хо саддхаммам̣ аладдха̄ маха̄дуккхам̣ па̄пун̣еййа, на четам̣ йуттам̣, аджджа майа̄ таттха гантхаббам̣ дхамма̄матарасена тамабхисин̃читва̄ радждже пахит̣т̣ха̄петунти чинтетва̄ аттабха̄вам̣ виджахитва̄ бхайа̄накам̣ махантам̣ раккхасавесам̣ ниммин̣итва̄ маха̄сатта̄бхимукхо авидӯре атта̄нам̣ дассеси, тенеттха.
14. бйаггхаччхасӣхамахисо рагахаттхидӣпи,
мига̄кулам̣ кан̣т̣акаселаруккхам̣;
нара̄наминдо пависитвака̄нанам̣,
иточито виббхами дхаммака̄мо.
15. тасса̄нубха̄вена пуриндадасса,
сила̄санам̣ ун̣хамахоси ка̄мам̣;
тенева со локамудиккхама̄но,
аддаккхи дхӣрам̣ випине чарантам̣.
16. майаджджа там̣ дхаммарасена самма̄,
сантаппайитва̄ гаманам̣ варанти;
мантва̄ субхӣман̃джанакӯт̣аван̣н̣ам̣,
маха̄мукхам̣ ниггата бхӣмада̄т̣хам̣.
17. диттаггисан̇ка̄са виса̄ланеттам̣,
маджджхена бхаггам̣ чипит̣аггана̄сам̣;
кхаратамбада̄т̣хим̣ гханамассувантам̣,
нӣлодарам̣ гаджджитабхӣмагхосам̣.
18. карорухам̣ тиккхасалохита̄йатам̣,
виса̄ладхота̄йатакхаггахаттхам̣;
гада̄йудхенан̇китаман̃н̃аба̄хум̣,
дат̣т̣хот̣т̣хабхӣмам̣ савалӣлала̄т̣ам̣.
19. мануссамам̣са̄данараттапа̄нам̣,
бхайа̄накам̣ каккхалайаккхаван̣н̣ам̣;
сума̄пайитва̄на ванантарасмим̣,
дассеси аттам̣ са нара̄дхипасса̄ти.
атха маха̄сатто аттано авидӯре т̣хитам̣ раккхасам̣ аддаккхи, там̣ дисва̄на̄сса бхайам̣ва̄ чхамбхитаттам̣ва̄ читтхутра̄саматтам̣ва̄ на̄хоси, киматра чинтеси, апина̄ма еварӯпо пираккхасо дхаммам̣ джа̄неййа, йаннӯна̄хам̣ тасса сантике дхаммам̣ сун̣исса̄ми, тамме дӣгхараттам̣ хита̄йа сукха̄йа бхависсатӣти чинтеси. чинтетва̄ чапана аджджа майа̄ тамупасан̇камма пуччхитам̣ ват̣т̣атӣти гантва̄ раккхасена саддхим̣ саллапанто а̄ха.
20. асмим̣ ванасмим̣ тарусан̣д̣а ман̣д̣ите;
супхуллита̄некалата̄кула̄куле;
адхиггахӣто си маха̄нубха̄ва,
пуччха̄ми там̣ дева вадехи кан̇кхам̣.
21. дхаммам̣ гавесам̣ ванама̄гатомхи,
паха̄йа раджджам̣ апи н̃а̄тисан̇гхам̣;
джа̄на̄си че самма вадехи майхам̣,
екампи га̄тхам̣ сугатена деситам̣.
тато йаккхо а̄ха.
22. дхаммам̣ паджа̄на̄махамекадесам̣,
джинеритам̣ са̄дхутарам̣ раса̄нам̣,
десеми чехам̣ тава дхамма маггам̣,
туван̃хи ким̣ ка̄хаси десакасса̄ти.
атха маха̄сатто а̄ха.
23. радждже т̣хито ассамахам̣ саче бхо,
анаппарӯпам̣ пакароми пӯджам̣;
ида̄ни еко ванамаджджхапатто,
кароми ким̣ дехамимам̣ т̣хапетва̄.
24. йадиччхаси твам̣ мама мам̣салохитам̣,
каромахам̣ сан̇гахамаджджа тена,
на чаттхи ан̃н̃ам̣ тава аччанӣйам̣,
десехи дхаммам̣ сугата ппасаттханти.
тато йаккхо а̄ха.
25. бхутва̄на мам̣сам̣ сухитова санто,
хантва̄ пипа̄сам̣ рудхирам̣ пивитва̄;
дхаммам̣ катхетум̣ пабхава̄ми туйхам̣,
ваттум̣ на саккоми кхуда̄паретоти.
атха маха̄сатто а̄ха.
26. бхутва̄ тувам̣ мам̣ патхаман̃хи йаккха,
паччха̄ ту десессаси касса дхаммам̣;
дхаммасса майхам̣ тава мам̣сала̄бхам̣,
твамева джа̄на̄хи йатха̄ бхавеййа̄ти.
евам̣ вутте сакко дева̄наминдо са̄дху маха̄ра̄джа ахамева йуттам̣ джа̄на̄мӣти ватва̄ тасса̄видӯре тига̄вутуббедхам̣ ан̃джанаван̣н̣ам̣ махантам̣ паббатам̣ ма̄петва̄ маха̄ра̄джа имама̄руйха паббатамуддханит̣т̣хито мама мукхе патату, ахам̣ патантхасса те дхаммам̣ десесса̄ми, евам̣ санте туйхам̣ дхаммапат̣ила̄бхо, майхам̣ча мам̣сапат̣ила̄бхо бхависсатӣти. там̣ сутва̄ маха̄сатто анаматагге сам̣са̄ре сам̣сарато ме сӣхабйаггхаччхамаччхакаччхапавихан̇га̄дӣнам̣ бхаккхабхӯтасса джа̄тӣсу пама̄н̣ам̣ натти, аджджа майа̄ самбуддхасса дхамматтха̄йа джӣвитам̣ париччаджитум̣ ват̣т̣атӣти чинтетва̄ евама̄ха.
27. сам̣са̄рават̣т̣есу виват̣т̣ама̄на̄,
паппонти дуккхам̣ джаната̄ анека̄;
етан̃хи бхо аттано ва̄ парасса,
аттха̄йа на̄хоси ахоси туччхам̣.
28. твамадиннаха̄рӣ тича па̄рада̄рико,
па̄н̣а̄типа̄тӣси муса̄ абха̄си;
тва маджджапа̄йӣти ака̄си досам̣,
паггайха дуккхам̣ бахусо даданти.
29. етан̃хи бхо аттано ва̄ парасса,
аттха̄йа на̄хоси ахоси туччхам̣;
руккха̄ папа̄та̄ папатитвакечи,
дуббандхийа̄ дуггависа̄данена.
30. бйа̄дхӣхи на̄на̄кхараведана̄хи,
маранти сатта̄ утуведана̄хи;
етан̃хи бхо аттано ва̄ парасса,
аттха̄йа на̄хоси ахоси туччхам̣.