21. йаккхаван̃чита ваттхумхи айама̄нупуббӣкатха̄

бхагавати париниббутамхи косаларан̃н̃о кира джанападе тун̣д̣ага̄мона̄ма ахоси. таттхеко буддхада̄со на̄ма мануссо ‘‘йа̄ваджӣвам̣ буддхам̣ саран̣ам̣ гаччха̄ми. буддхо ме саран̣ам̣ та̄н̣ам̣ лен̣ам̣ пара̄йан̣анти’’ евам̣ джӣвитапарийантам̣ буддхам̣ саран̣ам̣ гато пат̣ивасати, тасмим̣ самайе еко джанападава̄сико таттха таттха а̄хин̣д̣анто там̣ тун̣д̣ага̄мам̣ патва̄ тассева гхаре нива̄сам̣ каппеси, тасса пана джа̄нападикасса сарӣре еко йаккхо а̄виситва̄ пӣл̣ети, тада̄ тасса га̄масса пависанака̄ле йаккхо буддхада̄со па̄сакасса гун̣атеджена тасса гехам̣ пависитум̣ асакконто там̣ мун̃читва̄ бахига̄ме сатта̄хам̣ ат̣т̣ха̄си тасса̄гаманам̣ олокенто. тато со джа̄нападико саттадивасам̣ таттха васитва̄ саттаме дивасе сакарат̣т̣хам̣ гантука̄мо га̄ма̄ никкхами. атха там̣ татха̄ никкхантам̣ дисва̄ йаккхо аггахеси, атха со там̣ еттакам̣ ка̄лам̣ кухим̣гатосӣти пуччхи. йаккхо бхо таваттха̄йа еттха васантасса ме сатта̄хам̣ атиккантанти. тато со ко те майа̄ аттхо, ким̣ те даммӣти, атха йаккхена бхо ахам̣ кхуда̄йа пӣл̣ито бхаттена ме аттхоти вутто со евам̣ сати касма̄ мам̣ антогехе васантам̣ на ган̣хӣти а̄ха. йаккхена бхо тасмим̣ гхаре буддхам̣ саран̣ам̣ гато еко упасако аттхи, тасса сӣлатеджена гехам̣ пависитумасакконто ат̣т̣ха̄синти вутто джа̄нападико саран̣ам̣ на̄ма кинти аджа̄нанто кинти ватва̄ со саран̣ам̣ аггахесӣти йаккхам̣ пуччхи. йаккхо ‘‘буддхам̣ саран̣ам̣ гаччха̄мӣ’’ти ватва̄ саран̣ам̣ аггахесӣти а̄ха. там̣ сутва̄ джа̄нападико ида̄ни имам̣ ван̃чесса̄мӣти чинтетва̄ тенахи йаккха ахампи буддхам̣ саран̣ам̣ гаччха̄мӣти а̄ха. евам̣ вуттаматтейева йаккхо маха̄саддам̣ каронто бха йе на бхаманто пала̄йи, евам̣ самма̄самбуддхасса саран̣ам̣ идхалоке бхайо паддава нива̄ран̣аттхам̣ хоти, паралоке саггамоккха̄вахам̣. татха̄хи.

1. буддхоти вачанам̣ етам̣, аманусса̄нам̣ бхайа̄вахам̣;

буддхабхаттикаджантӯнам̣, саббада̄ мудама̄вахам̣.

2. саббопаддавана̄са̄йа, паччаккхадиббамосадхам̣;

диббамантам̣ маха̄теджам̣, маха̄йантам̣ махаббхутам̣.

3. тасма̄ со да̄рун̣о йаккхо,

дисва̄ там̣ саран̣е т̣хитхам̣;

уббигго ча бхайаппатто,

ломахат̣т̣хо ча чхамбхӣто.

4. бхаманто дха̄витам̣ дисва̄, тимирова сурийуггате,

симбалитӯлабхат̣т̣хам̣ва, чан̣д̣ава̄тена кхан̣д̣итам̣.

5. йам̣ дуккхам̣ ра̄джачора̄ри, йаккхапета̄ дисамбхавам̣;

ниччхантена мануссена, гантаббам̣ саран̣аттайам̣ти.

тато джа̄нападико саран̣а̄гамане маха̄гун̣ам̣ маха̄нисам̣сам̣ олокетва̄ буддхе сага̄раво саппемо ‘‘джӣвитапарийантам̣ буддхам̣ саран̣ам̣ гаччха̄мӣ’’ти саран̣ам̣ гантва̄ тенева саран̣а̄гамана̄нубха̄вена джӣвитапарийоса̄не суттаппабуддховийа девалоке ниббаттӣти.

6. дисва̄на евам̣ саран̣ам̣ гатам̣ там̣,

апенти йаккха̄пи махаббхайена;

па̄летха сӣлам̣ саран̣ан̃ча тасма̄,

джаха̄тха дуритам̣ сугатим̣ бхаджавхоти.

йаккхаван̃читаваттхум̣ патхамам̣.