41. квача

на̄маджа̄тигун̣акирийа̄ даббасамбандхато пан̃чавидхаттепи каммасса крийаттхасса̄вадхирайамупа̄динноти крийаттхасамбандха̄ кирийа̄каммассеха гахан̣ам̣. тан̃ча ниббаттивикатипаттибхедена тивидхам̣, тивидхасса̄пйетасса висеса̄нупа̄нато гахан̣анти каменуда̄харанто а̄ха- ‘каракаран̣е’ичча̄ди.

локавидӯтиа̄дидассанато квачиггахан̣е пайоджанам̣ ваттума̄ха- ‘каммато’чча̄ди. нану ча квачиггахан̣енева ‘а̄диччам̣ пассати’чча̄допи (ниватти) ваттум̣ сакка̄ касма̄ ‘бахула̄дхика̄ра̄’ти вуттанти а̄ха ‘тене’чча̄ди. тена̄ти йена квачиггахан̣ам̣ куточийева̄ти дассанаттхам̣ катам̣ тена̄ти аттхо. тена̄ти ва̄ квачиггахан̣ена. атха а̄диччам̣ пассатичча̄до вийа каммакара̄дӣсупи ниваттимадассетва̄ ‘квачӣти ким̣ каммакаро’ти касма̄ вуттанти а̄ха- ‘йаджджева’мичча̄ди.

тасса̄ти бахулавачанасса, маха̄дхика̄ратта̄ти маха̄висайатта̄. куточийева̄ти куточи дха̄тутойева. атхеха касма̄ на хоти девадатто сайати да̄ттена луна̄ти сунакха̄нам̣ дада̄ти нагара̄ апети тха̄лийам̣ пачати ма̄ту саратӣ’’ти, саббамеведам̣ кирийа̄ (йа̄) бхисамбандхӣйатӣти йадипевам̣, татха̄пи камматтенева йам̣ ватту миччхитам̣ на ка̄ракантараттена на̄пи самбандхабха̄вена, тассева каммасаддена гахан̣ам̣ каммавачанаса̄маттхийа̄, ан̃н̃атха̄ сйа̄диточчева вадеййа ким̣ камма̄ти вачанена̄ти.