17. кйота̄

каттари вихитесупи ма̄нантатйа̄дӣсу парабхӯтесу кйо бхаватӣти вин̃н̃а̄йеййа̄ти ‘бха̄вакаммесӯ’ти на кйасса висесананти а̄ха- ‘ма̄нантатйа̄дӣна’мичча̄ди.

йади хи каттари вихитесу сийа̄, татха̄ сати тесамубхиннам̣ падха̄наттена̄бхидхӣйама̄на̄наман̃н̃аман̃н̃а̄напеккхатта̄ асамбандхо сийа̄, на че вамбхӯта̄намабхидха̄наматтхи, на хи ‘т̣хӣйате’ччасма̄ бха̄во катта̄ ча патӣйате, на̄пи ‘гамйате’ччасма̄ каммам̣ катта̄ча. апи ту бха̄вакамма̄нева гамйанте, тена̄ха- ‘тасма̄’ичча̄ди.

тесамева̄ти ма̄нантатйа̄дӣнамева. парасаман̃н̃а̄бхи паресам̣ качча̄йана̄ нам̣ пароккха̄иччева на̄мам̣. таббаджджитесӯти пароккха̄сан̃н̃ипаччайаваджджитесу. апароккхесӯти еттха парасаман̃н̃а̄васена пароккха̄иччанена саха сама̄сам̣ дассетва̄ ида̄ни ан̃н̃атха̄пи пат̣ипа̄детум̣ ‘атхава̄’тиа̄дима̄ха. пароккхети индрийа̄висайе ка̄ле. пароккхевихита̄ паччайа̄ти имина̄ упача̄рена таддхитаппаччайавасена ва̄ пароккха̄ти садданиппхаттима̄ха. те пана‘а у’ ичча̄дайо. татоти пароккхаппаччайато.

нану пуббапаккхе ‘апароккхесӯ’ти еттха ‘пароккха̄ваджджитесӯ’ти аттха вачанам̣ йуджджати, дутийапаккхе пана ‘пароккхаваджджитесӯ’ти, татха̄ сати катхаметтха ‘пароккха̄ваджджитесӯ’ти аттхавачанам̣ йуджджатӣти а̄ха- ‘тепана̄’тиа̄ди. идха̄ти апароккхесӯти имасмим̣. нану ча ‘‘пароккхе а у’’ичча̄дисутте (6-6) ‘пароккхе’ти пакативисесананти паччайа̄нам̣ пароккхе вихитата̄ катханти манаси нидха̄йа̄ха ‘пароккхе’ичча̄ди. бхаванам̣ бха̄во кирийа̄дха̄тваттхо.

са̄дхӣйама̄на̄ваттхоти имина̄ сиддха̄ваттха̄ нирассате. пуббапарӣбхӯто падха̄накирийа̄вайавабхӯто кирийа̄рӯпо аттхо лаккхан̣ам̣ сабха̄во йасса дха̄тваттхасса со татха̄ вутто. сатвабхӯтоти еттха патӣйатӣти сесо. бахувачанампи хоти па̄ка̄па̄кети адхиппа̄йо, карӣйатӣти каммам̣, тан̃ча йадипи на̄ма̄дикаммаматтхи, татха̄пи крийаттха̄ичча̄дхика̄рато ма̄на̄дӣнаман̃н̃аттха̄лаббханато ча кирийа̄ самбандхова гайхате, су-саване сӯйама̄нам̣.

па̄н̣инийехеттха ‘‘бхиндати кусӯлам̣’тйа̄до йа̄ бхедана̄дикирийа̄ каммани диссате, са̄ йада̄ сукараттаматтена саппадха̄наттавачаниччха̄йам̣ каттуттепйупалаббхати ‘бхиджджате кусуло сайамеве’чча̄дина̄, тада̄сса каттуно суттантарена каммасариккхабха̄во видхӣйате ‘камманиссайам̣ ка̄рийам̣ йатха̄ сийа̄’ти. таннисса̄йа̄ха- ‘йада̄ каммамеве’чча̄ди. йада̄ каммамева каттубха̄вена виваччхӣйатети самбандхо. катхам̣ катва̄ татха̄ виваччхӣйатечча̄ха- ‘аттасамавета̄йа’ичча̄ди. аттасаддена каммаматра виваччхитам̣, аттани самавета̄ екадесӣбхӯта̄ аттасамавета̄, тасса̄ кирийа̄йа каммат̣т̣хакирийа̄йа̄ти вуттам̣ хоти.

субхедатта̄динети хетумхи каран̣е ва̄ татийа̄. аттхатоти ‘каммейева кйо’ти (на саккхи) [тасма̄] вуттанти адхиппа̄йо. татха̄хи ‘бхиджджатети савана̄ каммата̄вагамйате’ти имина̄ аттхато каммейевакйотипат̣ипа̄дитамева. вуттамева пхут̣ӣкарама̄ха- ‘бхиджджате иччасмим̣ паде’ичча̄ди. ан̃н̃атха̄ти йади каммейева тепаччайо на сийа̄. атоти бхиджджате иччасма̄. упасам̣харама̄ха- ‘тасма̄’ичча̄ди. ким̣ вачанена̄ти па̄н̣инӣйа̄намива ким̣ суттаттарена̄ти аттхо.

вачана̄бха̄вепи каммакаттари падасан̇кха̄раккамопадассанамукхена вутти гантхам̣ виваритума̄ха- ‘ва̄кйато’ичча̄ди. ва̄кйато уддхаритва̄ падесан̇кхарийама̄нети ‘бхиджджате кусӯло сайамеве’ти ва̄кйато висум̣ катва̄ бхиджджате’ти паде сан̇кхарийама̄не ниппха̄дӣйама̄нети аттхо. тадева̄ти падаттхаса̄ман̃н̃амева. танниппха̄данети тасса сан̇кхарима̄насса падасса сан̇кхаран̣е. сайантӣмасса̄тра аттана̄ти аттхо. на кевала маненетадева вуттам̣- ‘каммейева паччайо’ти, кин̃чарахи ан̃н̃ампаттхӣти дассетума̄ха- ‘анена че’чча̄ди. чо ваттаббантарасамуччайе. аненабхиджджатети савана̄ичча̄дина̄ идан̃ча̄ха̄ти аттхо. кинтадичча̄ха ‘камма каттуно’чча̄ди, на падамуда̄харан̣анти каммакаттуно ва̄кйамевода̄харан̣ам̣… ва̄кйенева тасса патӣтийа̄ ман̃н̃ате. падамевода̄харан̣ам̣ касма̄ на сийа̄ти а̄ха- ‘падехи’чча̄ди. дутийамуда̄харан̣ам̣ дассетума̄ха- ‘каттуниссайо пи’чча̄ди.

асмим̣ паккхети асмим̣ каттуттена виваччхите паккхе. таббисайаттанти каммава̄чӣсайам̣ саддависайаттам̣. бха̄вакаммесӯтӣмасса каттариччасса ча паччайависесанаттхе сати са̄маттхийаладдхампайоджанам̣ дассетума̄ха- ‘бха̄вакаммесӯ’тиа̄ди. имина̄ анена ча висесисатта̄ти самбандхо. кинтам̣ висеситанти а̄ха- ‘ма̄нанта тйа̄дӣсӯ’ти. кинтампайоджананти пайоджанам̣ дассетума̄ха- ‘тйа̄дӣна’мичча̄ди. йади бха̄вакаммесу каттари ча тена тена [дха̄нена] суттена ма̄на̄дайо на сийум̣, катхантам̣ висеситесу ма̄на̄дӣсу паресу кйа̄дайо сийунтӣмина̄ са̄маттхийена ( ) [(сати)] бха̄вакаммесу каттари ( ) [(ти)] ча ‘‘ваттама̄нети анти’’чча̄диппабхутикехи (6-1) суттехи йатха̄ла̄бхам̣ бха̄ва̄дӣсу паччайа̄ хонтӣти вин̃н̃а̄йатӣти бха̄во.

натадаттхам̣ вачанама̄раддханти бха̄вакаммесу каттари ма̄нантатйа̄дивидха̄наттхам̣ па̄н̣инийехи вийа суттантарам̣ на̄раддханти аттхо. атха бха̄вакаммесу каттари ча ма̄на̄дивидха̄наттхам̣ вачанам̣ на̄раддхам̣ дха̄тунийаманам̣ [дха̄тунийаматтхам̣] твасса ваттаббанти тан̃ча са̄маттхийа̄ва (лаббхатети) дассетума̄ха- ‘кирийаттханийамопи’чча̄ди. акаммака̄ дха̄туто бха̄ве каттари ча сакаммака̄ камме каттари чети кирийаттханийамо йатха̄вуттена са̄маттхийа̄ лаббхатети самбандхо. акаммака̄нам̣ каммавираха̄, сакаммака̄нан̃ча сатопи бха̄васса̄ппадха̄натта̄ акаммака̄ каттари бха̄ве ча бхаванти на камме, сакаммака̄ каммасаббха̄ва̄ каттари камме ча бхаванти на бха̄ветӣдам̣ са̄маттхийам̣.

каммамапеккхатети пача̄дито каттари пат̣хамапурисекавачане кате пачатичча̄дӣсу пача̄дино пачана̄дикирийа̄ одана̄дикам̣ каммамапеккхате. каттуттамапеккхатети бхаватичча̄дӣсу бхӯа̄дӣнам̣ бхавана̄дикирийа̄ каттуматтамапеккхате.